加州天頂 ê 紫金山-ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Tsuchinshan-ATLAS over California
• 影像來源 kah 版權：Brian Fulda
• 天頂予你 ê 禮物：你 ê APOD 生日相片是啥物？ (post 1995)
• 台文翻譯：An-Li Tsai (TARA)

[漢羅] 加州天頂 ê 紫金山-ATLAS 彗星

紫金山-ATLAS 彗星 ê 尾溜實在是引人注意。 相片內底是 C/2023 A3 紫金山-ATLAS 彗星，是頂禮拜伊上媠 ê 時陣 tī 美國 加州 東 Sierra 山脈 天頂翕著--ê。 這粒彗星毋但有 足光 ê 彗尾，而且閣有反向 ê 倒反彗尾。 正爿是 球形星團 M5，tī 足遠 ê 所在。 伊倚近咱 ê 時陣，咱猶毋知影這粒 冰球 是毋是會因為日光傷強 造成溫度變懸 煞破去。 實際上，這粒彗星有活落來，而且變甲比夜空中 其他天星 閣較光，伊 ê 視星等 有到 -4.9。 毋過真不幸，伊彼陣 離太陽傷近，所以 tùi 一寡臨時欲揣伊 ê 人來講，就較歹揣。 紫金山-ATLAS 彗星 是毋是會變做 2024 年 上大粒 ê 彗星，愛看紲落來 欲來 ê 彗星 C/2024 S1 (ATLAS 彗星) tī 未來兩禮拜，是毋是會予人印象閣較深。

[POJ] Ka-chiu thiⁿ-téng ê Chí-kim-soaⁿ ATLAS Hūi-chheⁿ

Chí-kim-soaⁿ ATLAS Hūi-chheⁿ ê bóe-liu si̍t-chāi sī ín-lâng-chù-ì. Siòng-phìⁿ lāi-té sī C/2023 À Chí-kim-soaⁿ ATLAS Hūi-chheⁿ, sī téng-lé-pài i siōng súi ê sî-chūn tī Bí-kok Ka-chiu Tang Sierra soaⁿ-me̍h thiⁿ-téng hip-tio̍h--ê. Chit lia̍p hūi-chheⁿ m̄-nā ū chiok kng ê hūi-bóe, jî-chhiáⁿ koh-ū hoán-hiòng ê tò-péng hūi-bóe. Chiàⁿ-pêng sī kiû-hêng seng-thoân M̂,tī chiok hn̄g ê só͘-chāi. I óa-kīn lán ê sî-chūn,lán iáu m̄-chai-iáⁿ chit lia̍p peng-kiû sī-m̄-sī ē in-ūi ji̍t-kng siuⁿ kiông chō-sêng un-tō͘ piàn koân soah phòa--khì. Si̍t-chè-siōng, chit lia̍p hūi-chheⁿ ū oa̍h lo̍h-lâi, jî-chhiáⁿ piàn-kah pí iā-khong-tiong kî-thaⁿ thiⁿ-chheⁿ koh-khah kng, i ê sī-seng-téng ū kàu -4.9. M̄-koh chin put-hēng, i hit-chūn lī Thài-iông siuⁿ kīn, só͘-í tùi chi̍t-kóa lîm-sî beh chhōe i ê lâng lâi-kóng, to̍h khah pháiⁿ chhōe. Chí-kim-soaⁿ ATLAS Hūi-chheⁿ sī-m̄-sī ē piàn-chò 2024 nî siōng tōa-lia̍p ê hūi-chheⁿ, ài khòaⁿ sòa-lo̍h-lâi beh lâi ê hūi-chheⁿ C/2024 S1 (ATLAS hūi-chheⁿ) tī bī-lâi nn̄g lé-pài, sī-m̄-sī ē hō͘ lâng ìn-siōng koh-khah chhim.

[KIP] Ka-tsiu thinn-tíng ê Tsí-kim-suann ATLAS Huī-tshenn

Tsí-kim-suann ATLAS Huī-tshenn ê bué-liu si̍t-tsāi sī ín-lâng-tsù-ì. Siòng-phìnn lāi-té sī C/2023 A3 Tsí-kim-suann ATLAS Huī-tshenn, sī tíng-lé-pài i siōng suí ê sî-tsūn tī Bí-kok Ka-tsiu Tang Sierra suann-me̍h thinn-tíng hip-tio̍h--ê. Tsit lia̍p huī-tshenn m̄-nā ū tsiok kng ê huī-bué, jî-tshiánn koh-ū huán-hiòng ê tò-píng huī-bué. Tsiànn-pîng sī kiû-hîng sing-thuân M5,tī tsiok hn̄g ê sóo-tsāi. I uá-kīn lán ê sî-tsūn,lán iáu m̄-tsai-iánn tsit lia̍p ping-kiû sī-m̄-sī ē in-uī ji̍t-kng siunn kiông tsō-sîng un-tōo piàn kuân suah phuà--khì. Si̍t-tsè-siōng, tsit lia̍p huī-tshenn ū ua̍h lo̍h-lâi, jî-tshiánn piàn-kah pí iā-khong-tiong kî-thann thinn-tshenn koh-khah kng, i ê sī-sing-tíng ū kàu -4.9. M̄-koh tsin put-hīng, i hit-tsūn lī Thài-iông siunn kīn, sóo-í tuì tsi̍t-kuá lîm-sî beh tshuē i ê lâng lâi-kóng, to̍h khah pháinn tshuē. Tsí-kim-suann ATLAS Huī-tshenn sī-m̄-sī ē piàn-tsò 2024 nî siōng tuā-lia̍p ê huī-tshenn, ài khuànn suà-lo̍h-lâi beh lâi ê huī-tshenn C/2024 S1 (ATLAS huī-tshenn) tī bī-lâi nn̄g lé-pài, sī-m̄-sī ē hōo lâng ìn-siōng koh-khah tshim.

[English] Comet Tsuchinshan-ATLAS over California

The tails of Comet Tsuchinshan-ATLAS were a sight to behold. Pictured, C/2023 A3 (Tsuchinshan–ATLAS) was captured near peak impressiveness last week over the Eastern Sierra Mountains in California, USA. The comet not only showed a bright tail, but a distinct anti-tail pointing in nearly the opposite direction. The globular star cluster M5 can be seen on the right, far in the distance. As it approached, it was unclear if this crumbling iceberg would disintegrate completely as it warmed in the bright sunlight. In reality, the comet survived to become brighter than any star in the night (magnitude -4.9), but unfortunately was then so nearly in front of the Sun that it was hard for many casual observers to locate. Whether Comet Tsuchinshan-Atlas becomes known as the Great Comet of 2024 now depends, in part, on how impressive incoming comet C/2024 S1 (ATLAS) becomes over the next two weeks.

詞彙學習