紫金山-ATLAS 彗星 欲走矣

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Tsuchinshan-ATLAS Flys Away
• 影像來源 kah 版權：Xingyang Cai
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (TARA)

[漢羅] 紫金山-ATLAS 彗星 欲走矣

這六張是連紲六工 ê C/2023 A3 紫金山-ATLAS 彗星 tī 過去這一禮拜離開咱地球 ê 相片。 這寡影像是 tī 美國加州 用仝一台 kha-mé-lah kah 鏡頭 tī 指定地點 kah 指定時間翕--ê。 上正爿彼張是 10 月 12 翕--ê。 這粒 ùi 遙遠 Oort 雲來 ê 人客 已經行到 kah 咱上倚 ê 地點矣，差不多是 7000 萬公里，按呢差不多是 4 光分遠。 伊有足光 ê 彗鬚 kah 長長 ê 塗粉尾溜，離日頭足倚--ê，毋過 tī 西爿地平線方向猶是真好揣。 紲落拉幾若工，這粒欲離開 ê 彗星沓沓仔 peh 到黃道頂懸，較倚北爿較暗 ê 夜空，開始 ùi 視野內底消失去。 10 月 14 紫金山-ATLAS 彗星 行過地球軌道面，產生一條 倒反彗尾，向西爿地平線伸過去。 10 月 17 日落 ê 時陣，彗星消失 tī 上倒爿 ê 夜空中，彼當陣伊 kah 地球 ê 距離是 7700 萬公里。 希望你嘛認為 紫金山-ATLAS 彗星 是 2024 年上讚 ê 彗星。 這粒彗星 ê 軌道週期，上開始算是 8 萬年，實際上 伊嘛有可能袂閣轉來內太陽系。

[POJ] Chí-kim-soaⁿ ATLAS Hūi-chheⁿ beh cháu-ah

Che la̍k tiuⁿ sī liân-sòa la̍k kang ê C/2023 A3 Chí-kim-soaⁿ ATLAS Hūi-chheⁿ tī kòe-khì che chi̍t lé-pài lī-khui lán Tē-kiû ê siòng-phìⁿ. Chit kóa iáⁿ-siōng sī tī Bí-kok Ka-chiu iōng kāng chi̍t tâi kha-mé-lah kah kiàⁿ-thâu tī chí-tēng tē-tiám kah chí-tēng sî-kan hip--ê. siōng chiàⁿ-pêng hit tiuⁿ sī 10 goe̍h 12 hip--ê. Chit lia̍p ùi iâu-oán Oort hûn lâi ê lâng-kheh í-keng kiâⁿ kàu kah lán siōng óa ê tē-tiám--ah, chha-put-to sī 7000 bān kong-lí, án-ne chha-put-to sī 4 kng-hun hn̄g. I ū chiok kng ê hūi-chhiu kah tn̂g-tn̂g ê thô͘-hún bóe-liu, lī ji̍t-thâu chiok óa--ê, m̄-koh tī sai-pêng tē-pêng-sòaⁿ hong-hiòng iáu-sī chin hó-chhōe. Sòa--lo̍h-la kúi-nā kang, chit lia̍p beh lī-khui ê hūi-chheⁿ tau̍h-tau̍h-á peh kàu n̂g-tō téng-koân, khah óa pak-pêng khah àm ê iā-khong, khai-sí ùi sī-iá lāi-té siau-sit--khì. 10 goe̍h 14 Chí-kim-soaⁿ ATLAS Hūi-chheⁿ kiâⁿ-kòe Tē-kiû kúi-tō bīn,sán-seng chi̍t tiâu tò-péng hūi-bóe, hiòng sai-pêng tē-pêng-sòaⁿ chhun kòe-khì. 10 goe̍h 17 ji̍t-lo̍h ê sî-chūn, hūi-chheⁿ siau-sit tī siōng tò-pêng ê iā-khong tiong, hit-tang-chūn i kah Tē-kiû ê kī-lī sī 7700 bān kong-lí. Hi-bāng lí mā līn-ûi Chí-kim-soaⁿ ATLAS Hūi-chheⁿ sī 2024 nî siōng chán ê hūi-chheⁿ. Chit lia̍p hūi-chheⁿ ê kúi-tō chiu-kî, siōng khai-sí sǹg sī chiah 8-bān-nî, si̍t-chè-siōng i mā ū khó-lêng bē koh tńg-lâi Lāi Thài-iông-hē.

[KIP] Tsí-kim-suann ATLAS Huī-tshenn beh tsáu-ah

Tse la̍k tiunn sī liân-suà la̍k kang ê C/2023 A3 Tsí-kim-suann ATLAS Huī-tshenn tī kuè-khì tse tsi̍t lé-pài lī-khui lán Tē-kiû ê siòng-phìnn. Tsit kuá iánn-siōng sī tī Bí-kok Ka-tsiu iōng kāng tsi̍t tâi kha-mé-lah kah kiànn-thâu tī tsí-tīng tē-tiám kah tsí-tīng sî-kan hip--ê. siōng tsiànn-pîng hit tiunn sī 10 gue̍h 12 hip--ê. Tsit lia̍p uì iâu-uán Oort hûn lâi ê lâng-kheh í-king kiânn kàu kah lán siōng uá ê tē-tiám--ah, tsha-put-to sī 7000 bān kong-lí, án-ne tsha-put-to sī 4 kng-hun hn̄g. I ū tsiok kng ê huī-tshiu kah tn̂g-tn̂g ê thôo-hún bué-liu, lī ji̍t-thâu tsiok uá--ê, m̄-koh tī sai-pîng tē-pîng-suànn hong-hiòng iáu-sī tsin hó-tshuē. Suà--lo̍h-la kuí-nā kang, tsit lia̍p beh lī-khui ê huī-tshenn ta̍uh-ta̍uh-á peh kàu n̂g-tō tíng-kuân, khah uá pak-pîng khah àm ê iā-khong, khai-sí uì sī-iá lāi-té siau-sit--khì. 10 gue̍h 14 Tsí-kim-suann ATLAS Huī-tshenn kiânn-kuè Tē-kiû kuí-tō bīn,sán-sing tsi̍t tiâu tò-píng huī-bué, hiòng sai-pîng tē-pîng-suànn tshun kuè-khì. 10 gue̍h 17 ji̍t-lo̍h ê sî-tsūn, huī-tshenn siau-sit tī siōng tò-pîng ê iā-khong tiong, hit-tang-tsūn i kah Tē-kiû ê kī-lī sī 7700 bān kong-lí. Hi-bāng lí mā līn-uî Tsí-kim-suann ATLAS Huī-tshenn sī 2024 nî siōng tsán ê huī-tshenn. Tsit lia̍p huī-tshenn ê kuí-tō tsiu-kî, siōng khai-sí sǹg sī tsiah 8-bān-nî, si̍t-tsè-siōng i mā ū khó-lîng bē koh tńg-lâi Lāi Thài-iông-hē.

[English] Comet Tsuchinshan-ATLAS Flys Away

These six panels follow daily apparitions of comet C/2023 A3 Tsuchinshan-ATLAS as it moved away from our fair planet during the past week. The images were taken with the same camera and lens at the indicated dates and locations from California, planet Earth. At far right on October 12 the visitor from the distant Oort cloud was near its closest approach, some 70 million kilometers (about 4 light-minutes) away. Its bright coma and long dust tail were close on the sky to the setting Sun but still easy to spot against a bright western horizon. Over the following days, the outbound comet steadily climbs above the ecliptic and north into the darker western evening sky, but begins to fade from view. Crossing the Earth's orbital plane around October 14, Tsuchinshan-ATLAS exhibits a noticeable antitail extended toward the western horizon. Higher in the evening sky at sunset by October 17 (far left) the comet has faded and reached a distance of around 77 million kilometers from planet Earth. Hopefully you enjoyed some of Tsuchinshan-ATLAS's bid to become the best comet of 2024. This comet's initial orbital period estimates were a mere 80,000 years, but in fact it may never return to the inner Solar System.

詞彙學習