差不多是 紫金山-ATLAS 彗星 ê 全身相片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Most of Comet Tsuchinshan-ATLAS
• 影像來源 kah 版權：Adam Block
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] 差不多是 紫金山-ATLAS 彗星 ê 全身相片

10 月 14 已經真歹翕著 整個 C/2023 A3 紫金山-ATLAS 彗星 矣。 這張是 tī 彗星離咱美麗地球上倚彼陣翕--ê，彼工暗頭仔 ê 天空景色 to̍h 是按呢。 這是 kā 兩張長焦鏡頭翕 ê 相片組合起來--ê 影像，這是 tùi Arizona 州 Tucson 市 ê Gates Pass 向西爿看去 ê 景色，ùi 頂懸到下底差不多有 26 度闊。 彼暗，逐彗星 ê 人甚至 會當認出 球形星團 M5 kah 週期彗星 13P Olbers 暗暗 ê 光。 這粒彗星就 tī 紫金山-ATLAS 彗星 長長白白 ê 塗粉尾溜 內底彼粒足光 ê 彗鬚頂懸。 因為地球拄經過彗星 ê 軌道面，所以 這个角度看著 ê 紫金山-ATLAS 彗星，有一條足顯目 ê 倒反彗尾。 倒反彗尾是進前 ê 塗粉尾溜來--ê，ùi 太陽方向 tùi 彗星軌道方向 展開。 你會當看著 彗鬚下底 尖尖 ê 彗尾，伸 tùi 西方敧敧曲曲 ê 地平線去。

[POJ] Chha-put-to sī Chí-kim-soaⁿ ATLAS Hūi-chheⁿ ê Choân-sin Siòng-phìⁿ

10 goe̍h 14 í-keng chin pháiⁿ hip-tio̍h chéng-kô C/2023 A3 Chí-kim-soaⁿ ATLAS Hūi-chheⁿ--ah. Chit-tiuⁿ sī tī hūi-chheⁿ lī lán bí-lē Tē-kiû siōng óa hit-chūn hip--ê, hit-kang àm-thâu-á ê thian-khong kéng-sek to̍h-sī án-ne. Che-sī kā nn̄g tiuⁿ tn̂g-chiau kiàⁿ-thâu hip ê siòng-phìⁿ cho͘-ha̍p khí-lâi--ê iáⁿ-siōng, che-sī tùi Arizona chiu Tucson chhī ê Gates Pass hiòng se-pêng khòaⁿ-khì ê kéng-sek, ùi téng-koân kàu ē-té chha-put-to ū 26 tō͘ khoah. Hit àm, jiok hūi-chheⁿ ê lâng sīm-chì ē-tàng jīn-chhut kiû-hêng seng-thoân M5 kah chiu-kî hūi-chheⁿ 13P Olbers àm-àm ê kng. Chit lia̍p hūi-chheⁿ to̍h tī Chí-kim-soaⁿ ATLAS Hūi-chheⁿ tn̂g-tn̂g pe̍h-pe̍h ê thô͘-hún bóe-liu lāi-té hit lia̍p chiok kng ê hūi-chhiu téng-koân. In-ūi Tē-kiû tú keng-kòe hūi-chheⁿ ê kúi-tō-bīn, só͘-í chit-ê kak-tō͘ khòaⁿ--tio̍h ê Chí-kim-soaⁿ ATLAS Hūi-chheⁿ, ū chi̍t tiâu chiok hiáⁿ-ba̍k ê tò-péng hūi-bóe. Tò-péng hūi-bóe sī chìn-chêng ê thô͘-hún bóe-liu lâi--ê, ùi Thài-iông hong-hiòng tùi hūi-chheⁿ kúi-tō hong-hiòng thián--khui. Lí ē-tàng khòaⁿ-tio̍h hūi-chhiu ē-té chiam-chiam ê hūi-bóe, chhun tùi se-hong khi-khi-khiau-khiau ê tē-pêng-sòaⁿ khì.

[KIP] Tsha-put-to sī Tsí-kim-suann ATLAS Huī-tshenn ê Tsuân-sin Siòng-phìnn

10 gue̍h 14 í-king tsin pháinn hip-tio̍h tsíng-kô C/2023 A3 Tsí-kim-suann ATLAS Huī-tshenn--ah. Tsit-tiunn sī tī huī-tshenn lī lán bí-lē Tē-kiû siōng uá hit-tsūn hip--ê, hit-kang àm-thâu-á ê thian-khong kíng-sik to̍h-sī án-ne. Tse-sī kā nn̄g tiunn tn̂g-tsiau kiànn-thâu hip ê siòng-phìnn tsoo-ha̍p khí-lâi--ê iánn-siōng, tse-sī tuì Arizona tsiu Tucson tshī ê Gates Pass hiòng se-pîng khuànn-khì ê kíng-sik, uì tíng-kuân kàu ē-té tsha-put-to ū 26 tōo khuah. Hit àm, jiok huī-tshenn ê lâng sīm-tsì ē-tàng jīn-tshut kiû-hîng sing-thuân M5 kah tsiu-kî huī-tshenn 13P Olbers àm-àm ê kng. Tsit lia̍p huī-tshenn to̍h tī Tsí-kim-suann ATLAS Huī-tshenn tn̂g-tn̂g pe̍h-pe̍h ê thôo-hún bué-liu lāi-té hit lia̍p tsiok kng ê huī-tshiu tíng-kuân. In-uī Tē-kiû tú king-kuè huī-tshenn ê kuí-tō-bīn, sóo-í tsit-ê kak-tōo khuànn--tio̍h ê Tsí-kim-suann ATLAS Huī-tshenn, ū tsi̍t tiâu tsiok hiánn-ba̍k ê tò-píng huī-bué. Tò-píng huī-bué sī tsìn-tsîng ê thôo-hún bué-liu lâi--ê, uì Thài-iông hong-hiòng tuì huī-tshenn kuí-tō hong-hiòng thián--khui. Lí ē-tàng khuànn-tio̍h huī-tshiu ē-té tsiam-tsiam ê huī-bué, tshun tuì se-hong khi-khi-khiau-khiau ê tē-pîng-suànn khì.

[English] Most of Comet Tsuchinshan-ATLAS

On October 14 it was hard to capture a full view of Comet C/2023 A3 Tsuchinshan-ATLAS. Taken after the comet's closest approach to our fair planet, this evening skyview almost does though. With two telephoto frames combined, the image stretches about 26 degrees across the sky from top to bottom, looking west from Gates Pass, Tucson, Arizona. Comet watchers that night could even identify globular star cluster M5 and the faint apparition of periodic comet 13P Olbers near the long the path of Tsuchinshan-ATLAS's whitish dust tail above the bright comet's coma. Due to perspective as the Earth is crossing the comet's orbital plane, Tsuchinshan-ATLAS also has a pronounced antitail. The antitail is composed of dust previously released and fanning out away from the Sun along the comet's orbit, visible as a needle-like extension below the bright coma toward the rugged western horizon.

詞彙學習