Europa 快艇 kah 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Clipper and the Comet
• 影像來源 kah 版權：Ben Cooper (Launch Photography)
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] Europa 快艇 kah 彗星

NASA ê Europa 快艇 這馬當咧飛去 地球以外 ê 海洋世界。 這張相片是 火箭發射前一工 tī Kennedy 太空中心翕--ê。 大隻太空船去予櫼入去獵鷹號重型火箭上頂懸 ê 保護蓋內底。 Europa 快艇 ê 星際旅行會先飛去火星，才閣飛轉來地球。 紲落來會 利用引力來協助調整軌道，通予伊 tī 2030 年 4 月 ê 時陣飛入去踅 木星 ê 軌道。 等伊開始踅木星了後，太空船就會飛過 木衛二 Europa 49 擺，探索這粒有全球地下海洋、通支持性命發展 ê 衛星。 相片背景 tī 火箭邊仔 ê 是 紫金山-ATLAS 彗星，這工是彗星離地球上倚 ê 隔轉工。 這粒目睭看會著 ê 彗星，是目前夜空中逐家上愛 ê 天體，伊是 ùi 遙遠 ê Oort 雲 來 ê 人客。

[POJ] Europa Khoài-théng kah Hūi-chheⁿ

NASA ê Europa khoài-théng chit-má tng-teh poe-khì Tē-kiû í-gōa ê hái-iûⁿ sè-kài. Chit-tiuⁿ siòng-phìⁿ sī hóe-chìⁿ hoat-siā chêng-chi̍t-kang tī Kennedy Thài-khong Tiong-sim hip--ê. Tōa-chiah thài-khong-chûn khì hō͘ chiⁿ-ji̍p-khì La̍h-eng-hō Tāng-hêng Hóe-chìⁿ siōng téng-koân ê pó-hō͘-kòa lāi-té. Europa khoài-théng ê seng-chè lú-hêng ē seng poe-khì Hóe-chheⁿ, chiah-koh poe tńg-lâi Tē-kiû. Sòa--lo̍h-lâi ē lī-iōng ín-le̍k lâi hia̍p-chō͘ tiâu-chéng kúi-tō, thang hō͘ i tī 2030 nî 4 goe̍h ê sî-chūn poe ji̍p-khì se̍h Bo̍k-chheⁿ ê kúi-tō. Tán i khai-sí se̍h Bo̍k-chheⁿ liáu-āu, thài-khong-chûn to̍h ē poe-kòe Bo̍k-ūi-jī Europa 49 pái, thàm-soh chit lia̍p ū choân-kiû tē-hā hái-iûⁿ, thang chi-chhî sèⁿ-miā hoat-tián ê ūi-chhiⁿ. Siòng-phìⁿ pōe kéng-tī hóe-chìⁿ piⁿ-á ê sī Chí-kim-soaⁿ ATLAS Hūi-chheⁿ, chit kang sī hūi-chheⁿ lī Tē-kiû-siōng óa ê keh-tńg-kang. Chit lia̍p ba̍k-chiu khòaⁿ-ē-tio̍h ê hūi-chheⁿ, sī bo̍k-chiân iā-khong-tiong ta̍k-ke siōng-ài ê thian-thé, i sī ùi iâu-oán ê Oort hûn lâi ê lâng-kheh.

[KIP] Europa Khuài-thíng kah Huī-tshenn

NASA ê Europa khuài-thíng tsit-má tng-teh pue-khì Tē-kiû í-guā ê hái-iûnn sè-kài. Tsit-tiunn siòng-phìnn sī hué-tsìnn huat-siā tsîng-tsi̍t-kang tī Kennedy Thài-khong Tiong-sim hip--ê. Tuā-tsiah thài-khong-tsûn khì hōo tsinn-ji̍p-khì La̍h-ing-hō Tāng-hîng Hué-tsìnn siōng tíng-kuân ê pó-hōo-kuà lāi-té. Europa khuài-thíng ê sing-tsè lú-hîng ē sing pue-khì Hué-tshenn, tsiah-koh pue tńg-lâi Tē-kiû. Suà--lo̍h-lâi ē lī-iōng ín-li̍k lâi hia̍p-tsōo tiâu-tsíng kuí-tō, thang hōo i tī 2030 nî 4 gue̍h ê sî-tsūn pue ji̍p-khì se̍h Bo̍k-tshenn ê kuí-tō. Tán i khai-sí se̍h Bo̍k-tshenn liáu-āu, thài-khong-tsûn to̍h ē pue-kuè Bo̍k-uī-jī Europa 49 pái, thàm-soh tsit lia̍p ū tsuân-kiû tē-hā hái-iûnn, thang tsi-tshî sènn-miā huat-tián ê uī-tshinn. Siòng-phìnn puē kíng-tī hué-tsìnn pinn-á ê sī Tsí-kim-suann ATLAS Huī-tshenn, tsit kang sī huī-tshenn lī Tē-kiû-siōng uá ê keh-tńg-kang. Tsit lia̍p ba̍k-tsiu khuànn-ē-tio̍h ê huī-tshenn, sī bo̍k-tsiân iā-khong-tiong ta̍k-ke siōng-ài ê thian-thé, i sī uì iâu-uán ê Oort hûn lâi ê lâng-kheh.

[English] The Clipper and the Comet

NASA's Europa Clipper is now headed toward an ocean world beyond Earth. The large spacecraft is tucked into the payload fairing atop the Falcon Heavy rocket in this photo, taken at Kennedy Space Center the day before the mission's successful October 14 launch. Europa Clipper's interplanetary voyage will first take it to Mars, then back to Earth, and then on to Jupiter on gravity assist trajectories that will allow it to enter orbit around Jupiter in April 2030. Once orbiting Jupiter, the spacecraft will fly past Europa 49 times, exploring a Jovian moon with a global subsurface ocean that may have conditions to support life. Posing in the background next to the floodlit rocket is Comet Tsuchinsan-ATLAS, about a day after the comet's closest approach to Earth. A current darling of evening skies, the naked-eye comet is a visitor from the distant Oort cloud

詞彙學習