動畫：紫金山-ATLAS 彗星 彗尾 預測

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Animation: Comet Tsuchinshan-ATLAS Tails Prediction
• 動畫來源 kah 版權：Nico Lefaudeux
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] 動畫：紫金山-ATLAS 彗星 彗尾 預測

紫金山-ATLAS 彗星 ê 彗尾 會變甲偌光？偌特別？ 這粒彗星 幾若禮拜前 才拄經過 伊 kah 太陽 上倚 ê 時期，三工前才拄經過伊 kah 地球上倚 ê 時期。 C/2023 A3 (紫金山-ATLAS 彗星) tī 過去幾若工，變做是這世紀 上光 ê 彗星 之一。 毋過真不幸，伊 kah 咱 ê 日頭行傷倚，結果煞真歹看著。 這粒 彗星 欲離開太陽 ê 時陣，伊會變甲 足引人注意，毋過嘛有可能會隨變暗去。 這支動畫 有展示 ùi 地球看著 ê 彗尾是按怎形成--ê？ 而且嘛有預測伊會按怎發展。 影片 kā 咱講，本來 kah 彗星仝方向 ê 塗粉尾溜，較重 ê 部份 已經開始 變到 倒反爿 去矣。 較輕 ê 部份 猶是 kah 離子尾溜 仝爿。 離子尾溜 是去予 太陽風 kā 捒出來--ê，就是藍色彼條尾溜。

[POJ] Tōng-ōe: Chí-kim-soaⁿ ATLAS Hūi-chheⁿ Hūi-bóe ī-chhek

Chí-kim-soaⁿ ATLAS hūi-chheⁿ ê hūi-bóe ē piàn-kah gōa kng? Gōa te̍k-pia̍t? Chit lia̍p hūi-chheⁿ kúi-nā lé-pài chêng chiah tú keng-kòe i kah Thài-iông siōng óa ê sî-kî, saⁿ kang chêng chiah tú keng-kòe i kah Tē-kiû siōng óa ê sî-kî. C/2023 À (Chí-kim-soaⁿ ATLAS hūi-chheⁿ)tī kòe-khì kúi-nā kang,piàn-chò sī chit sè-kí siōng kng ê hūi-chheⁿ Chi-it. M̄-koh chin put-hēng, i kah lán ê ji̍t-thâu kiâⁿ siuⁿ óa, kiat-kó soah chin pháiⁿ khòaⁿ--tio̍h. Chit lia̍p hūi-chheⁿ beh lī-khui Thài-iông ê sî-chūn, i ē piàn-kah chiok ín-lâng-chù-ì, m̄-koh mā ū khó-lêng ē sûi piàn àm--khì. Chit-ki tōng-ōe ū tián-sī ùi Tē-kiû khòaⁿ--tio̍h ê hūi-bóe sī án-nóa hêng-sêng--ê? Jî-chhiáⁿ mā ū ī-chhek i ē án-chóaⁿ hoat-tián. Iáⁿ-phìⁿ kā lán kóng, pún-lâi kah hūi-chheⁿ kāng hong-hiòng ê thô͘-hún bóe-liu, khah tāng ê pō͘-hūn í-keng khai-sí piàn kàu tó-péng-pêng khì--ah. Khah khin ê pō͘-hūn iáu-sī kah lī-chú bóe-liu kāng pêng. Lī-chú bóe-liu sī khì hō͘ thài-iông-hong kā sak--chhut-lâi--ê, tio̍h-sī nâ-sek hit tiâu bóe-liu.

[KIP] Tōng-uē: Tsí-kim-suann ATLAS Huī-tshenn Huī-bué ī-tshik

Tsí-kim-suann ATLAS huī-tshenn ê huī-bué ē piàn-kah guā kng? Guā ti̍k-pia̍t? Tsit lia̍p huī-tshenn kuí-nā lé-pài tsîng tsiah tú king-kuè i kah Thài-iông siōng uá ê sî-kî, sann kang tsîng tsiah tú king-kuè i kah Tē-kiû siōng uá ê sî-kî. C/2023 A3 (Tsí-kim-suann ATLAS huī-tshenn)tī kuè-khì kuí-nā kang,piàn-tsò sī tsit sè-kí siōng kng ê huī-tshenn Tsi-it. M̄-koh tsin put-hīng, i kah lán ê ji̍t-thâu kiânn siunn uá, kiat-kó suah tsin pháinn khuànn--tio̍h. Tsit lia̍p huī-tshenn beh lī-khui Thài-iông ê sî-tsūn, i ē piàn-kah tsiok ín-lâng-tsù-ì, m̄-koh mā ū khó-lîng ē suî piàn àm--khì. Tsit-ki tōng-uē ū tián-sī uì Tē-kiû khuànn--tio̍h ê huī-bué sī án-nuá hîng-sîng--ê? Jî-tshiánn mā ū ī-tshik i ē án-tsuánn huat-tián. Iánn-phìnn kā lán kóng, pún-lâi kah huī-tshenn kāng hong-hiòng ê thôo-hún bué-liu, khah tāng ê pōo-hūn í-king khai-sí piàn kàu tó-píng-pîng khì--ah. Khah khin ê pōo-hūn iáu-sī kah lī-tsú bué-liu kāng pîng. Lī-tsú bué-liu sī khì hōo thài-iông-hong kā sak--tshut-lâi--ê, tio̍h-sī nâ-sik hit tiâu bué-liu.

[English] Animation: Comet Tsuchinshan-ATLAS Tails Prediction

How bright and strange will the tails of Comet Tsuchinshan-ATLAS become? The comet has brightened dramatically over the few weeks as it passed its closest to the Sun and, just three days ago, passed its closest to the Earth. C/2023 A3 (Tsuchinshan–ATLAS) became of the brightest comets of the past century over the past few days, but was unfortunately hard to see because it was so nearly superposed on the Sun. As the comet appears to move away from the Sun, it is becoming a remarkable sight -- but may soon begin to fade. The featured animated video shows how the comet's tails have developed, as viewed from Earth, and gives one prediction about how they might further develop. As shown in the video, heavier parts of the dust tail that trails the comet have begun to appear to point in nearly the opposite direction from lighter parts of the dust tail as well as the comet's ion tail, the blue tail that is pushed directly out from the Sun by the solar wind.

詞彙學習