林肯紀念堂 天頂 ê 紫金山-ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Tsuchinshan-ATLAS Over the Lincoln Memorial
• 影像來源 kah 版權：Brennan Gilmore
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] 林肯紀念堂 天頂 ê 紫金山-ATLAS 彗星

下暗日落 ê 時陣，咱來去外口看彗星！ C/2023 A3 (紫金山-ATLAS 彗星) tī 北半球天區 ê 暗頭仔，已經光甲目睭看會著矣！ 你若是想欲看著彗星，請向西爿地平線附近揣看覓咧。 天氣若是袂䆀，天色有夠暗 ê 時陣，免 雙筒望遠鏡嘛 看會著。 你應該看會著 暗暗 ê 彗尾，伊會出現 tī 地平線頂懸 差不多一點鐘久 ê 時間。 這張相片 是 2 工前翕--ê 紫金山-ATLAS 彗星，伊就出現 tī 美國 華盛頓特區 林肯紀念堂 ê 天頂。 日子一工一工過去，彗星 kah 逐工咧變化 ê 彗尾 tī 天頂嘛愈來愈懸。 是講伊這馬偌光？彗尾偌長？咱就 干焦會當用臆--ê。

[POJ] Lîm-khéng Kì-liām-tn̂g thiⁿ-téng ê Chí-kim-soaⁿ ATLAS Hūi-chheⁿ

E-àm ji̍t-lo̍h ê sî-chūn, lán lâi-khì gōa-kháu khòaⁿ hūi-chheⁿ! C/2023 À (Chí-kim-soaⁿ ATLAS hūi-chheⁿ) tī Pak-pòaⁿ-kiû thian-khu ê àm-thâu-á, í-keng kng kah ba̍k-chiu khòaⁿ-ē-tio̍h-ah! Lí nā-sī siūⁿ-beh khòaⁿ-tio̍h hūi-chheⁿ, chhiáⁿ hiòng se-pêng tē-pêng-sòaⁿ hù-kīn chhōe khòaⁿ-māi leh. Thiⁿ-khì nā-sī bē-bái, thiⁿ-sek ū-kàu àm ê sî-chūn, bián siang-tâng bōng-oán-kiàⁿ mā khòaⁿ-ē-tio̍h. Lí eng-kai khòaⁿ-ē-tio̍h àm-àm ê hūi-bóe, i ē chhut-hiān tī tē-pêng-sòaⁿ téng-koân chha-put-to chi̍t tiám-cheng kú ê sî-kan. Chit-tiuⁿ siòng-phìⁿ sī 2 kang chêng hip--ê Chí-kim-soaⁿ ATLAS hūi-chheⁿ, i to̍h chhut-hiān tī Bí-kok Hôa-sēng-tùn Te̍k-khu Lîm-khéng Kì-liām-tn̂g ê thiⁿ-téng. Ji̍t-chí chi̍t-kang chi̍t-kang kòe-khì, hūi-chheⁿ kah ta̍k-kang leh piàn-hòa ê hūi-bóe tī thiⁿ-téng mā lú-lâi-lú koân. Sī-kóng i chit-má gōa kng? Hūi-bóe gōa tn̂g? Lán to̍h kan-na ē-tàng ēng ioh--ê.

[KIP] Lîm-khíng Kì-liām-tn̂g thinn-tíng ê Tsí-kim-suann ATLAS Huī-tshenn

E-àm ji̍t-lo̍h ê sî-tsūn, lán lâi-khì guā-kháu khuànn huī-tshenn! C/2023 A3 (Tsí-kim-suann ATLAS huī-tshenn) tī Pak-puànn-kiû thian-khu ê àm-thâu-á, í-king kng kah ba̍k-tsiu khuànn-ē-tio̍h-ah! Lí nā-sī siūnn-beh khuànn-tio̍h huī-tshenn, tshiánn hiòng se-pîng tē-pîng-suànn hù-kīn tshuē khuànn-māi leh. Thinn-khì nā-sī bē-bái, thinn-sik ū-kàu àm ê sî-tsūn, bián siang-tâng bōng-uán-kiànn mā khuànn-ē-tio̍h. Lí ing-kai khuànn-ē-tio̍h àm-àm ê huī-bué, i ē tshut-hiān tī tē-pîng-suànn tíng-kuân tsha-put-to tsi̍t tiám-tsing kú ê sî-kan. Tsit-tiunn siòng-phìnn sī 2 kang tsîng hip--ê Tsí-kim-suann ATLAS huī-tshenn, i to̍h tshut-hiān tī Bí-kok Huâ-sīng-tùn Ti̍k-khu Lîm-khíng Kì-liām-tn̂g ê thinn-tíng. Ji̍t-tsí tsi̍t-kang tsi̍t-kang kuè-khì, huī-tshenn kah ta̍k-kang leh piàn-huà ê huī-bué tī thinn-tíng mā lú-lâi-lú kuân. Sī-kóng i tsit-má guā kng? Huī-bué guā tn̂g? Lán to̍h kan-na ē-tàng īng ioh--ê.

[English] Comet Tsuchinshan-ATLAS Over the Lincoln Memorial

Go outside at sunset tonight and see a comet! C/2023 A3 (Tsuchinshan–ATLAS) has become visible in the early evening sky in northern locations to the unaided eye. To see the comet, look west through a sky with a low horizon. If the sky is clear and dark enough, you will not even need binoculars -- the faint tail of the comet should be visible just above the horizon for about an hour. Pictured, Comet Tsuchinshan-ATLAS was captured two nights ago over the Lincoln Memorial monument in Washington, DC, USA. With each passing day at sunset, the comet and its changing tail should be higher and higher in the sky, although exactly how bright and how long its tails will be can only be guessed.

詞彙學習