意大利 Alps 山 天頂 ê 極光縮時攝影影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Aurora Timelapse Over Italian Alps
• 影片來源 kah 版權：Cristian Bigontina
• 天文相簿：Global aurora during October 10/11, 2024 年 10 月 10/11 全球極光
• 台文翻譯：An-Li Tsai (NSYSU)

[漢羅] 意大利 Alps 山 天頂 ê 極光縮時攝影影片

你敢有看著 chăng 暗 ê 極光？ 幾若工前，這个問題變做是一个世界性 ê 問題。 因為極光風暴 通常袂 tī 離地球 南北極 遮爾遠 ê 所在出現。 這个原因主要是因為 拜二 ê 時陣太陽發生一擺強烈 ê X 級太陽爍光，kā 高能 電子 kah 質子 噴到 太陽系 內底，kah 地球 磁場 相迵。 這寡粒子攏著 地球 高層大氣 ê 酸素 原子 ê 時陣 會發出 紅光，就親像是影片按呢，規个天頂攏是，閣會 tī 墜直方向 跳舞。 這支影片是 tī 意大利 北部 Alps 山 山頂 Cortina d'Ampezzo 鎮 翕--ê 一點鐘 縮時攝影影片。 背景是 銀河系 ê 天星，前景是飛龍機 kah 衛星。 太陽 最近 ê 活動較強，未來這一年，咱會繼續 tī 地球天頂看著足濟 美麗 ê 極光景色。

[POJ] I-tá-lī Alps soaⁿ thiⁿ-téng ê Ke̍k-kng Sok-sî-liap-iáⁿ iáⁿ-phìⁿ

Lí kám-ū khòaⁿ-tio̍h cha̋ng àm ê ke̍k-kng? Kúi-nā kang chêng, chit-ê būn-tê piàn-chò sī chi̍t-ê sè-kài sèng ê būn-tê. In-ūi ke̍k-kng hong-pō thong-siông bē tī lī Tē-kiû lâm-pak-ke̍k chiah-nī hn̄g ê só͘-chāi chhut-hiān. Chit-ê goân-in chú-iàu sī in-ūi pài-jī ê sî-chūn Thài-iông hoat-seng chi̍t-pái kiông-lia̍t ê X kip thài-iông sih-kng, kā ko-lêng tiān-chú kah chit-chú phùn kàu Thài-iông-hē lāi-té, kah Tē-kiû chú-tiûⁿ sio-thàng. Chit kóa lia̍p-chú lóng tio̍h Tē-kiû ko-chân tāi-khì ê sàng-sò͘ goân-chú ê sî-chūn ē hoat-chhut âng-kng, to̍h chhin-chhiūⁿ sī iáⁿ-phìⁿ án-ne, kui-ê thiⁿ-téng lóng sī, koh ē tī tūi-ti̍t hong-hiòng thiàu-bú. Chit-ki iáⁿ-phìⁿ sī tī I-tá-lī pak-pō͘ Alps soaⁿ soaⁿ-téng Cortina d'Ampezzo tìn hip--ê chi̍t tiám-cheng sok-sî-liap-iáⁿ iáⁿ-phìⁿ. Pōe-kéng sī gîn-hô-hē ê thiⁿ-chheⁿ, chiân-kéng sī poe-lêng-ki kah ōe-chheⁿ. Thài-iông chòe-kīn ê oa̍h-tōng khah kióng, bī-lâi che chi̍t-nî, lán ē kè-sio̍k tī Tē-kiû thiⁿ-téng khòaⁿ-tio̍h chiok chē bí-lē ê ke̍k-kng kéng-sek.

[KIP] I-tá-lī Alps suann thinn-tíng ê Ki̍k-kng Sok-sî-liap-iánn iánn-phìnn

Lí kám-ū khuànn-tio̍h tsa̋ng àm ê ki̍k-kng? Kuí-nā kang tsîng, tsit-ê būn-tê piàn-tsò sī tsi̍t-ê sè-kài sìng ê būn-tê. In-uī ki̍k-kng hong-pō thong-siông bē tī lī Tē-kiû lâm-pak-ki̍k tsiah-nī hn̄g ê sóo-tsāi tshut-hiān. Tsit-ê guân-in tsú-iàu sī in-uī pài-jī ê sî-tsūn Thài-iông huat-sing tsi̍t-pái kiông-lia̍t ê X kip thài-iông sih-kng, kā ko-lîng tiān-tsú kah tsit-tsú phùn kàu Thài-iông-hē lāi-té, kah Tē-kiû tsú-tiûnn sio-thàng. Tsit kuá lia̍p-tsú lóng tio̍h Tē-kiû ko-tsân tāi-khì ê sàng-sòo guân-tsú ê sî-tsūn ē huat-tshut âng-kng, to̍h tshin-tshiūnn sī iánn-phìnn án-ne, kui-ê thinn-tíng lóng sī, koh ē tī tuī-ti̍t hong-hiòng thiàu-bú. Tsit-ki iánn-phìnn sī tī I-tá-lī pak-pōo Alps suann suann-tíng Cortina d'Ampezzo tìn hip--ê tsi̍t tiám-tsing sok-sî-liap-iánn iánn-phìnn. Puē-kíng sī gîn-hô-hē ê thinn-tshenn, tsiân-kíng sī pue-lîng-ki kah uē-tshenn. Thài-iông tsuè-kīn ê ua̍h-tōng khah kióng, bī-lâi tse tsi̍t-nî, lán ē kè-sio̍k tī Tē-kiû thinn-tíng khuànn-tio̍h tsiok tsē bí-lē ê ki̍k-kng kíng-sik.

[English] Aurora Timelapse Over Italian Alps

Did you see last night's aurora? This question was relevant around much of the world a few days ago because a powerful auroral storm became visible unusually far from the Earth's poles. The cause was a giant X-class solar flare on Tuesday that launched energetic electrons and protons into the Solar System, connecting to the Earth via our planet's magnetic field. A red glow of these particles striking oxygen atoms high in Earth's atmosphere pervades the frame, while vertical streaks dance. The featured video shows a one-hour timelapse as seen from Cortina d'Ampezzo over Alps Mountain peaks in northern Italy. Stars from our Milky Way Galaxy dot the background while streaks from airplanes and satellites punctuate the foreground. The high recent activity of our Sun is likely to continue to produce picturesque auroras over Earth during the next year or so.

詞彙學習