月出彼陣 ê 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet at Moonrise
• 影像來源 kah 版權：Gabriel Zaparolli
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] 月出彼陣 ê 彗星

彗星 C/2023 A3 嘛叫做 紫金山-ATLAS 彗星，伊這馬 tī 地球天頂是愈來愈光。 這粒彗星 嘛叫做 A3 彗星，是 ùi 遙遠 ê Oort 雲 來--ê，這馬已經來到 內太陽系矣。 這粒彗星 tī 9 月 27 ê 時陣行到 近日點，這是離太陽上倚 ê 所在。 伊會 tī 10 月 12 行到 近地點，就是離咱地球上倚 ê 所在。 時到伊就會變做夜空中上引人注意 ê 天體。 毋過咧翕這張相片 ê 時陣，A3 彗星是透早 peh 起來--ê。 伊 ê 彗鬚是足光--ê，而且彗尾已經足長矣。 巴西南部 ùi Praia Grande 到 Santa Catarina ê 暗暝天頂攏看會著。 下月眉嘛拄 ùi 東爿地平線 peh 起來偷看。 雖罔講彗星 ê 路線實在是 真歹臆，毋過 紫金山-ATLAS 彗星 可能會變做一粒 kah 彗星 C/2020 F3 (NEOWISE 彗星) 仝款壯觀 ê 彗星。 NEOWISE 彗星 tī 2020 年熱天彼陣，媠甲予天文觀星者呵咾甲會觸舌。

[POJ] Goe̍h-chhut hit-chūn ê Hūi-chheⁿ

Hūi-chheⁿ C/2023 A3 mā kiò-chò Chí-kim-soaⁿ ATLAS hūi-chheⁿ, i chit-má tī Tē-kiû thiⁿ-téng sī lú-lâi-lú kng. Chit lia̍p hūi-chheⁿ mā kiò-chò A3 hūi-chheⁿ, sī ùi iâu-oán ê Oort hûn lâi--ê, chit-má í-keng lâi-kàu Lāi Thài-iông-hē--ah. Chit lia̍p hūi-chheⁿ tī 9 goe̍h 27 ê sî-chūn kiâⁿ kàu kīn-ji̍t-tiám, che-sī lī Thài-iông siōng óa ê só͘-chāi. I ē tī 10 goe̍h 12 kiâⁿ kàu kīn-tē-tiám, to̍h-sī lī lán Tē-kiû siōng óa ê só͘-chāi. Sî-kàu i to̍h ē piàn-chò iā-khong tiong siōng ín-lâng chù-ì ê thian-thé. M̄-koh leh hip chit-tiuⁿ siòng-phìⁿ ê sî-chūn, A3 hūi-chheⁿ sī thàu-chá peh--khí-lâi--ê. I ê hūi-chhiu sī chiok kng--ê, jî-chhiáⁿ hūi-bóe í-keng chiok tn̂g--ah. Pa-se lâm-pō͘ ùi Praia Grande kàu Santa Catarina ê àm-mê thiⁿ-téng lóng khòaⁿ-ē-tio̍h. Ē-goe̍h-bâi mā tú ùi tang-pêng tē-pêng-sòaⁿ peh--khí-lâi thau-khòaⁿ. Sui-bóng kóng hūi-chheⁿ ê lō͘-sòaⁿ si̍t-chāi sī chin pháiⁿ ioh, m̄-koh Chí-kim-soaⁿ ATLAS hūi-chheⁿ khó-lêng ē piàn-chò chi̍t-lia̍p kah hūi-chheⁿ C/2020 F3 (NEOWISE hūi-chheⁿ) kāng-khoán chòng-koan ê hūi-chheⁿ. NEOWISE hūi-chheⁿ tī 2020 nî joa̍h-thiⁿ hit-chūn, súi kah hō͘ thian-bûn koan-seng-chiá o-ló kah ē tak-chi̍h.

[KIP] Gue̍h-tshut hit-tsūn ê Huī-tshenn

Huī-tshenn C/2023 A3 mā kiò-tsò Tsí-kim-suann ATLAS huī-tshenn, i tsit-má tī Tē-kiû thinn-tíng sī lú-lâi-lú kng. Tsit lia̍p huī-tshenn mā kiò-tsò A3 huī-tshenn, sī uì iâu-uán ê Oort hûn lâi--ê, tsit-má í-king lâi-kàu Lāi Thài-iông-hē--ah. Tsit lia̍p huī-tshenn tī 9 gue̍h 27 ê sî-tsūn kiânn kàu kīn-ji̍t-tiám, tse-sī lī Thài-iông siōng uá ê sóo-tsāi. I ē tī 10 gue̍h 12 kiânn kàu kīn-tē-tiám, to̍h-sī lī lán Tē-kiû siōng uá ê sóo-tsāi. Sî-kàu i to̍h ē piàn-tsò iā-khong tiong siōng ín-lâng tsù-ì ê thian-thé. M̄-koh leh hip tsit-tiunn siòng-phìnn ê sî-tsūn, A3 huī-tshenn sī thàu-tsá peh--khí-lâi--ê. I ê huī-tshiu sī tsiok kng--ê, jî-tshiánn huī-bué í-king tsiok tn̂g--ah. Pa-se lâm-pōo uì Praia Grande kàu Santa Catarina ê àm-mê thinn-tíng lóng khuànn-ē-tio̍h. Ē-gue̍h-bâi mā tú uì tang-pîng tē-pîng-suànn peh--khí-lâi thau-khuànn. Sui-bóng kóng huī-tshenn ê lōo-suànn si̍t-tsāi sī tsin pháinn ioh, m̄-koh Tsí-kim-suann ATLAS huī-tshenn khó-lîng ē piàn-tsò tsi̍t-lia̍p kah huī-tshenn C/2020 F3 (NEOWISE huī-tshenn) kāng-khuán tsòng-kuan ê huī-tshenn. NEOWISE huī-tshenn tī 2020 nî jua̍h-thinn hit-tsūn, suí kah hōo thian-bûn kuan-sing-tsiá o-ló kah ē tak-tsi̍h.

[English] Comet at Moonrise

Comet C/2023 A3 (Tsuchinshan–ATLAS) is growing brighter in planet Earth's sky. Fondly known as comet A3, this new visitor to the inner Solar System is traveling from the distant Oort cloud. The comet reached perihelion, its closest approach to the Sun, on September 27 and will reach perigee, its closest to our fair planet, on October 12, by then becoming an evening sky apparition. But comet A3 was an early morning riser on September 30 when this image was made. Its bright coma and already long tail share a pre-dawn skyscape from Praia Grande, Santa Catarina in southern Brazil with the waning crescent Moon just peeking above the eastern horizon. While the behaviour of comets is notoriously unpredictable, Tsuchinshan–ATLAS could become a comet visually rivaling C/2020 F3 (NEOWISE). Comet NEOWISE wowed skygazers in the summer of 2020.

詞彙學習