日出帶食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Eclipse at Sunrise
• 影像來源 kah 版權：Wang Letian (Eyes at Night)
• 天文相簿：Annular Solar Eclipse 2024 October
• 台文翻譯：An-Li Tsai (NSYSU)

[漢羅] 日出帶食

2024 年 ê 第二擺日食 出現 tī 太平洋。 10 月 2 號，月球 ê 烏影 ùi 西爿向東爿行過。 你若是 tī 這條狹狹 ê 月影路線下底就會看著 日環食。 這條路線經過海洋，迵過南美洲上南爿附近 ê 陸地，落尾行到南大西洋。 有一寡人 kā 這个戲劇性 ê 日環食 叫做 火環日食。 就算是按呢，猶是有足大區所在看會著日偏食。 這張速翕是 10 月日食上開始 ê 時陣翕著--ê，tī 日出 ê 時陣就會當 tī 雲頂看著。 Tī 地球 夏威夷島 ê Mauna Kea 天文台 遊客中心 看著 ê 日偏食，是日頭去予閘著上濟 ê 日偏食。

[POJ] Ji̍t-chhut-tài-si̍t

2024 nî ê tē-jī pái ji̍t-si̍t chhut-hiān tī Thài-pêng-iûⁿ. 10 goe̍h 2 hō, Goe̍h-kiû ê o͘-iáⁿ ùi sai-pêng hiòng tang-pêng kiâⁿ-kòe. Lí nā-sī tī chit tiâu e̍h-e̍h ê goe̍h-iáⁿ lō͘-sòaⁿ ē-té to̍h ē khòaⁿ-tio̍h ji̍t-khoân-si̍t. Chit tiâu lō͘-sòaⁿ keng-kòe hái-iûⁿ, thàng-kòe Lâm-bí-chiu siōng lâm-pêng hù-kīn ê lio̍k-tē, lo̍h-bóe kiâⁿ kàu Lâm Tāi-se-iûⁿ. Ū chi̍t-kóa lâng kā chit-ê hì-kio̍k sèng ê ji̍t-khoân-si̍t kiò-chò hóe-khoân ji̍t-si̍t. Tiō-sǹg-sī án-ne, iáu-sī ū chiok tōa khu só͘-chāi khòaⁿ-ē-tio̍h ji̍t-phian-si̍t. Chit-tiuⁿ sok-hip sī 10 goe̍h ji̍t-si̍t siōng khai-sí ê sî-chūn hip--tio̍h--ê, tī ji̍t-chhut ê sî-chūn to̍h ē-tàng tī hûn-téng khòaⁿ--tio̍h. Tī Tē-kiû Ha-óa-ih tó ê Mauna Kea Thian-bûn-tâi Iû-kheh Tiong-sim khòaⁿ--tio̍h ê ji̍t-phian-si̍t, sī ji̍t-thâu khì hō͘ cha̍h-tio̍h siōng-chē ê ji̍t-phian-si̍t.

[KIP] Ji̍t-tshut-tài-si̍t

2024 nî ê tē-jī pái ji̍t-si̍t tshut-hiān tī Thài-pîng-iûnn. 10 gue̍h 2 hō, Gue̍h-kiû ê oo-iánn uì sai-pîng hiòng tang-pîng kiânn-kuè. Lí nā-sī tī tsit tiâu e̍h-e̍h ê gue̍h-iánn lōo-suànn ē-té to̍h ē khuànn-tio̍h ji̍t-khuân-si̍t. Tsit tiâu lōo-suànn king-kuè hái-iûnn, thàng-kuè Lâm-bí-tsiu siōng lâm-pîng hù-kīn ê lio̍k-tē, lo̍h-bué kiânn kàu Lâm Tāi-se-iûnn. Ū tsi̍t-kuá lâng kā tsit-ê hì-kio̍k sìng ê ji̍t-khuân-si̍t kiò-tsò hué-khuân ji̍t-si̍t. Tiō-sǹg-sī án-ne, iáu-sī ū tsiok tuā khu sóo-tsāi khuànn-ē-tio̍h ji̍t-phian-si̍t. Tsit-tiunn sok-hip sī 10 gue̍h ji̍t-si̍t siōng khai-sí ê sî-tsūn hip--tio̍h--ê, tī ji̍t-tshut ê sî-tsūn to̍h ē-tàng tī hûn-tíng khuànn--tio̍h. Tī Tē-kiû Ha-uá-ih tó ê Mauna Kea Thian-bûn-tâi Iû-kheh Tiong-sim khuànn--tio̍h ê ji̍t-phian-si̍t, sī ji̍t-thâu khì hōo tsa̍h-tio̍h siōng-tsē ê ji̍t-phian-si̍t.

[English] Eclipse at Sunrise

The second solar eclipse of 2024 began in the Pacific. On October 2nd the Moon's shadow swept from west to east, with an annular eclipse visible along a narrow antumbral shadow path tracking mostly over ocean, crossing land near the southern tip of South America, and ending in the southern Atlantic. The dramatic total annular eclipse phase is known to some as a ring of fire. Still, a partial eclipse of the Sun was experienced over a wide region. Captured at one of its earliest moments, October's eclipsed Sun is seen just above the clouds near sunrise in this snapshot. The partially eclipsed solar disk is close to the maximum eclipse as seen from Mauna Kea Observatory Visitor Center, Island of Hawaii, planet Earth.

詞彙學習