墨西哥 天頂 ê 紫金山-ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Tsuchinshan-ATLAS over Mexico
• 影像來源 kah 版權：Daniel Korona
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (NSYSU)

[漢羅] 墨西哥 天頂 ê 紫金山-ATLAS 彗星

這粒新 ê 彗星已經飛過 kah 太陽上倚 ê 所在，這馬當咧倚近地球。 彗星 C/2023 A3 (紫金山-ATLAS 彗星) 這馬拄 ùi 金星 軌道內底 徙出來，差不多閣 2 禮拜就會行到離 地球 上倚 ê 所在。 紫金山-ATLAS 彗星 這馬已經光甲目睭有機會看著矣，若是用 kha-mé-lah 長時間感光，應該是翕會起來。 這馬地球北半球 kah 南半球 ê 觀星者應該攏看會著這粒彗星矣！ 這張相片是幾若工前 tī 墨西哥 Zacatecas 天頂翕--ê。 因為天頂攏是雲，所以天文攝影師駛一台 無人機 到雲頂去翕，kā 其中幾若張相片疊起來了後才看會著彗星。 雖罔講彗星未來會變甲偌光是 真歹臆，毋過逐家攏希望 紫金山-ATLAS 彗星 會 tī 暗頭仔彼陣 愈來愈光。

[POJ] Be̍k-se-ko thiⁿ-téng ê Chí-kim-soaⁿ ATLAS hūi-chheⁿ

Chit lia̍p sin ê hūi-chheⁿ í-keng poe-kòe kah Thài-iông siōng óa ê só͘-chāi, chit-má tng-leh óa-kīn Tē-kiû. Hūi-chheⁿ C/2023 A3 (Chí-kim-soaⁿ ATLAS hūi-chheⁿ) chit-má tú ùi Kim-chheⁿ kúi-tō lāi-té sóa--chhut-lâi, chha-put-to koh 2 lé-pài to̍h ē kiâⁿ kàu lī Tē-kiû siōng óa ê só͘-chāi. Chí-kim-soaⁿ ATLAS hūi-chheⁿ chit-má í-keng kng kah ba̍k-chiu ū ki-hōe khòaⁿ--tio̍h--ah, nā-sī iōng kha-mé-lah tn̂g sî-kan kám-kng, eng-kai sī hip ē khí-lâi. Chit-má Tē-kiû Pak-pòaⁿ-kiû kah Lâm-pòaⁿ-kiû ê koan-seng-chiá eng-kai lóng khòaⁿ-ē-tio̍h chit lia̍p hūi-chheⁿ--ah! Chit-tiuⁿ siòng-phìⁿ sī kúi-nā kang chêng tī Be̍k-se-ko Zacatecas thiⁿ-téng hip--ê. In-ūi thiⁿ-téng lóng sī hûn, só͘-í thian-bûn liap-iáⁿ-su sái chi̍t tâi bô-lâng-ki kàu hûn-téng khì hip, kā kî-tiong kúi-nā tiuⁿ siòng-phìⁿ tha̍h khí-lâi liáu-āu chiah khòaⁿ-ē-tio̍h hūi-chheⁿ. Sui-bóng kóng hūi-chheⁿ bī-lâi ē piàn-kah gōa kng sī chin pháiⁿ ioh, m̄-koh ta̍k-ke lóng hi-bāng Chí-kim-soaⁿ ATLAS hūi-chheⁿ ē tī àm-thâu-á hit-chūn lú-lâi-lú kng.

[KIP] Bi̍k-se-ko thinn-tíng ê Tsí-kim-suann ATLAS huī-tshenn

Tsit lia̍p sin ê huī-tshenn í-king pue-kuè kah Thài-iông siōng uá ê sóo-tsāi, tsit-má tng-leh uá-kīn Tē-kiû. Huī-tshenn C/2023 A3 (Tsí-kim-suann ATLAS huī-tshenn) tsit-má tú uì Kim-tshenn kuí-tō lāi-té suá--tshut-lâi, tsha-put-to koh 2 lé-pài to̍h ē kiânn kàu lī Tē-kiû siōng uá ê sóo-tsāi. Tsí-kim-suann ATLAS huī-tshenn tsit-má í-king kng kah ba̍k-tsiu ū ki-huē khuànn--tio̍h--ah, nā-sī iōng kha-mé-lah tn̂g sî-kan kám-kng, ing-kai sī hip ē khí-lâi. Tsit-má Tē-kiû Pak-puànn-kiû kah Lâm-puànn-kiû ê kuan-sing-tsiá ing-kai lóng khuànn-ē-tio̍h tsit lia̍p huī-tshenn--ah! Tsit-tiunn siòng-phìnn sī kuí-nā kang tsîng tī Bi̍k-se-ko Zacatecas thinn-tíng hip--ê. In-uī thinn-tíng lóng sī hûn, sóo-í thian-bûn liap-iánn-su sái tsi̍t tâi bô-lâng-ki kàu hûn-tíng khì hip, kā kî-tiong kuí-nā tiunn siòng-phìnn tha̍h khí-lâi liáu-āu tsiah khuànn-ē-tio̍h huī-tshenn. Sui-bóng kóng huī-tshenn bī-lâi ē piàn-kah guā kng sī tsin pháinn ioh, m̄-koh ta̍k-ke lóng hi-bāng Tsí-kim-suann ATLAS huī-tshenn ē tī àm-thâu-á hit-tsūn lú-lâi-lú kng.

[English] Comet Tsuchinshan-ATLAS over Mexico

The new comet has passed its closest to the Sun and is now moving closer to the Earth. C/2023 A3 (Tsuchinshan–ATLAS) is currently moving out from inside the orbit of Venus and on track to pass its nearest to the Earth in about two weeks. Comet Tsuchinshan-ATLAS, pronounced "Choo-cheen-shahn At-less,", is near naked-eye visibility and easily picked up by long-exposure cameras. The comet can also now be found by observers in Earth's northern hemisphere as well as the south. The featured image was captured just a few days ago above Zacatecas, Mexico. Because clouds were obscuring much of the pre-dawn sky, the astrophotographer released a drone to take pictures from higher up, several of which were later merged to enhance the comet's visibility. Although the future brightness of comets is hard to predict, there is increasing hope that Comet Tsuchinshan-ATLAS will further brighten as it enters the early evening sky.

詞彙學習