澳洲 日出時 拄著 ê A3 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet A3 Through an Australian Sunrise
• 影像來源 kah 版權：Lucy Yunxi Hu
• 巡天觀測：Color Blindness and Astronomical Images
• 天文相簿：Comet Tsuchinsan-ATLAS in 2024
• 台文翻譯：An-Li Tsai (NSYSU)

[漢羅] 澳洲 日出時 拄著 ê A3 彗星

彗星 C/2023 A3，簡稱 A3，嘛叫做 紫金山-ATLAS 彗星。 咱這馬會當 tī 透早看著 紫金山-ATLAS 彗星 矣！ 這粒 大粒 垃圾冰山 用 足奇怪 ê 角度 入內到 內 太陽系。 閣兩工伊就會接近 太陽 矣！ 伊會行到 水星 kah 金星 之間。 這張相片 是 長時間感光 ê 相片，翕 ê 是 彗星 kah 伊 ê 塗粉尾溜 tī 日出進前 kah 日出期間 ê 變化。 相片是 4 工前翕--ê，彗星就 tī 澳洲 New South Wales 州 George 湖 天頂 peh 起來。 倒爿一條一條直 ê 影格是咧翕 彗星 tī 日出了後，背景 ê 天色變甲愈來愈光、愈來愈多彩。 目前咱猶毋知這粒彗星 tī 後個月會變甲偌光，這愛看 彗核 會噴 偌濟氣體 kah 塗粉。 樂觀 ê 天文觀測者 希望 會當看著一場精彩 ê 表演。 紫金山-ATLAS 彗星 會 tī 地球天頂變出 塗粉尾溜 kah 離子尾溜，成做 2024 年 ê 大彗星。

[POJ] Ò-chiu ji̍t-chhut sî tú-tio̍h ê A3 Hūi-chhiⁿ

Hūi-chhiⁿ C/2023 À, kán-chheng A3, mā kiò-chò Chí-kim-soaⁿ ATLAS hūi-chhiⁿ. Lán chit-má ē-tàng tī thàu-chá khòaⁿ-tio̍h Chí-kim-soaⁿ ATLAS hūi-chhiⁿ ah! Chit lia̍p tōa-lia̍p lah-sap peng-soaⁿ iōng chiok kî-koài ê kak-tō͘ ji̍p-lāi kàu Lāi Thài-iông-hē. Koh nn̄g-kang i tio̍h ē chiap-kīn Thài-iông ah! I ē kiâⁿ kàu Chúi-chhiⁿ kah Kim-chhiⁿ chi-kan. Chit-tiuⁿ siòng-phìⁿ sī tn̂g sî-kan kám-kng ê siòng-phìⁿ, hip--ê sī hūi-chhiⁿ kah i ê thô͘-hún bóe-liu tī ji̍t-chhut chìn-chêng kah ji̍t-chhut kî-kan ê piàn-hòa. Siòng-phìⁿ sī 4 kang chêng hip--ê, hūi-chhiⁿ to̍h tī Ò-chiu New South Wales chiu George ô͘ thiⁿ-téng peh--khí-lâi. Tò-pêng chi̍t-tiâu chi̍t tiâu ti̍t ê iáⁿ-keh sī leh hip hūi-chhiⁿ tī ji̍t-chhut liáu-āu, pōe-kéng ê thiⁿ-sek piàn-kah lú-lâi-lú kng, lú-lâi-lú to-chhái. Bo̍k-chiân lán iah m̄-chai chit lia̍p hūi-chhiⁿ tī āu kò goe̍h ē piàn-kah gōa kng, che ài khòaⁿ hūi-he̍k ē phùn gōa-chē khì-thé kah thô͘-hún. Lo̍k-koan ê thian-bûn koan-chhek-chiá hi-bāng ē-tàng khòaⁿ-tio̍h chi̍t tiûⁿ cheng-chhái ê piáu-ián. Chí-kim-soaⁿ ATLAS hūi-chhiⁿ ē tī Tē-kiû thiⁿ-téng piàn-chhut thô͘-hún bóe-liu kah lī-chú bóe-liu, chiâⁿ-chò 2024 nî ê Tōa-hūi-chhiⁿ.

[KIP] Ò-tsiu ji̍t-tshut sî tú-tio̍h ê A3 Huī-tshinn

Huī-tshinn C/2023 A3, kán-tshing A3, mā kiò-tsò Tsí-kim-suann ATLAS huī-tshinn. Lán tsit-má ē-tàng tī thàu-tsá khuànn-tio̍h Tsí-kim-suann ATLAS huī-tshinn ah! Tsit lia̍p tuā-lia̍p lah-sap ping-suann iōng tsiok kî-kuài ê kak-tōo ji̍p-lāi kàu Lāi Thài-iông-hē. Koh nn̄g-kang i tio̍h ē tsiap-kīn Thài-iông ah! I ē kiânn kàu Tsuí-tshinn kah Kim-tshinn tsi-kan. Tsit-tiunn siòng-phìnn sī tn̂g sî-kan kám-kng ê siòng-phìnn, hip--ê sī huī-tshinn kah i ê thôo-hún bué-liu tī ji̍t-tshut tsìn-tsîng kah ji̍t-tshut kî-kan ê piàn-huà. Siòng-phìnn sī 4 kang tsîng hip--ê, huī-tshinn to̍h tī Ò-tsiu New South Wales tsiu George ôo thinn-tíng peh--khí-lâi. Tò-pîng tsi̍t-tiâu tsi̍t tiâu ti̍t ê iánn-keh sī leh hip huī-tshinn tī ji̍t-tshut liáu-āu, puē-kíng ê thinn-sik piàn-kah lú-lâi-lú kng, lú-lâi-lú to-tshái. Bo̍k-tsiân lán iah m̄-tsai tsit lia̍p huī-tshinn tī āu kò gue̍h ē piàn-kah guā kng, tse ài khuànn huī-hi̍k ē phùn guā-tsē khì-thé kah thôo-hún. Lo̍k-kuan ê thian-bûn kuan-tshik-tsiá hi-bāng ē-tàng khuànn-tio̍h tsi̍t tiûnn tsing-tshái ê piáu-ián. Tsí-kim-suann ATLAS huī-tshinn ē tī Tē-kiû thinn-tíng piàn-tshut thôo-hún bué-liu kah lī-tsú bué-liu, tsiânn-tsò 2024 nî ê Tuā-huī-tshinn.

[English] Comet A3 Through an Australian Sunrise

Comet Tsuchinshan-ATLAS is now visible in the early morning sky. Diving into the inner Solar System at an odd angle, this large dirty iceberg will pass its closest to the Sun -- between the orbits of Mercury and Venus -- in just two days. Long camera exposures are now capturing C/2023 A3 (Tsuchinshan–ATLAS), sometimes abbreviated as just A3, and its dust tail before and during sunrise. The featured image composite was taken four days ago and captured the comet as it rose above Lake George, NSW, Australia. Vertical bands further left are images of the comet as the rising Sun made the predawn sky increasingly bright and colorful. Just how bright the comet will become over the next month is currently unknown as it involves how much gas and dust the comet's nucleus will expel. Optimistic skywatchers are hoping for a great show where Tsuchinshan–ATLAS creates dust and ion tails visible across Earth's sky and becomes known as the Great Comet of 2024.

詞彙學習