秋分 ê 芝加哥 大樓城市

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Chicagohenge: Equinox in an Aligned City
• 影像來源 kah 版權：Anthony Artese
• 台文翻譯：An-Li Tsai (NSYSU)

[漢羅] 秋分 ê 芝加哥 大樓城市

Ùi 某一个角度來看，芝加哥就親像是一个現代 ê 岩石陣。 這條路是東西向，這个時間是今仔日。 今仔日是 秋分，kah 春分仝款，是 日頭 tī 地球 ùi 正西方 落去 ê 日子。 所以，今仔日 tī 芝加哥，日頭 會 ùi kah 赤道方向平行 ê 街仔路 kah 大樓 中央 落去，這个景色咱 kā 叫做 芝加哥 岩石陣。 這張相片 是 2017 年 9 月中 秋分 ê 時陣，tī 芝加哥 ê Upper Wacker 大路 翕--ê 芝加哥 大樓城市，嘛算是一款 芝加哥 岩石陣。 毋過 誠濟城市 ê 街仔路 抑是 其他 特性，嘛會佮 地球 自轉軸 對予好勢。 所以誠有可能，你 上愛 ê 街仔路 嘛是東西向--ê。 今仔日日頭落山 ê 時陣，你只要小可影一下，應該就會揣著。

[POJ] Chhiu-hun ê Chi-ka-ko Tōa-lâu Siâⁿ-chhī

Ùi bó͘ chi̍t-ê kak-tō͘ lâi-khòaⁿ, Chi-ka-ko to̍h chhin-chhiūⁿ sī chi̍t-ê hiān-tāi ê giâm-chio̍h-tīn. Chit tiâu lō͘ sī tang-sai-hiòng, chit-ê sî-kan sī kin-á-ji̍t. Kin-á-ji̍t sī chhiu-hun, kah chhun-hun kāng-khoán, sī ji̍t-thâu tī Tē-kiû ùi chiàⁿ se-hong lo̍h-khì ê ji̍t-chí. Só͘-í, kin-á Ji̍t-tī Chi-ka-ko, ji̍t-thâu ē ùi kah chhek-tō hong-hiòng pêng-hêng ê ke-á-lō͘ kah tōa-lâu tiong-ng lo̍h-khì, chit-ê kéng-sek lán kā kiò-chò Chi-ka-ko Giâm-chio̍h-tīn. Chit-tiuⁿ siòng-phìⁿ sī 2017 nî 9 goe̍h-tiong chhiu-hun ê sî-chūn tī Chi-ka-ko ê Upper Wacker tōa-lō͘ hip--ê Chi-ka-ko tōa-lâu siâⁿ-chhī, mā sǹg-sī chi̍t-khoán Chi-ka-ko Giâm-chio̍h-tīn. M̄-koh chiâⁿ chē siâⁿ-chhī ê ke-á-lō͘ ia̍h-sī kî-thaⁿ te̍k-sèng, mā ē kah Tē-kiû chū-choán-te̍k tùi hō͘ hó-sè. Só͘-í chiâⁿ ū khó-lêng, lí siōng-ài ê ke-á-lō͘ mā-sī tang-sai-hiòng--ê. Kin-á-ji̍t ji̍t-thâu lo̍h-soaⁿ ê sî-chūn, lí chí-iàu sió-khóa iáⁿ--chi̍t-ē, eng-kai to̍h ē chhōe-tio̍h.

[KIP] Tshiu-hun ê Tsi-ka-ko Tuā-lâu Siânn-tshī

Uì bóo tsi̍t-ê kak-tōo lâi-khuànn, Tsi-ka-ko to̍h tshin-tshiūnn sī tsi̍t-ê hiān-tāi ê giâm-tsio̍h-tīn. Tsit tiâu lōo sī tang-sai-hiòng, tsit-ê sî-kan sī kin-á-ji̍t. Kin-á-ji̍t sī tshiu-hun, kah tshun-hun kāng-khuán, sī ji̍t-thâu tī Tē-kiû uì tsiànn se-hong lo̍h-khì ê ji̍t-tsí. Sóo-í, kin-á Ji̍t-tī Tsi-ka-ko, ji̍t-thâu ē uì kah tshik-tō hong-hiòng pîng-hîng ê ke-á-lōo kah tuā-lâu tiong-ng lo̍h-khì, tsit-ê kíng-sik lán kā kiò-tsò Tsi-ka-ko Giâm-tsio̍h-tīn. Tsit-tiunn siòng-phìnn sī 2017 nî 9 gue̍h-tiong tshiu-hun ê sî-tsūn tī Tsi-ka-ko ê Upper Wacker tuā-lōo hip--ê Tsi-ka-ko tuā-lâu siânn-tshī, mā sǹg-sī tsi̍t-khuán Tsi-ka-ko Giâm-tsio̍h-tīn. M̄-koh tsiânn tsē siânn-tshī ê ke-á-lōo ia̍h-sī kî-thann ti̍k-sìng, mā ē kah Tē-kiû tsū-tsuán-ti̍k tuì hōo hó-sè. Sóo-í tsiânn ū khó-lîng, lí siōng-ài ê ke-á-lōo mā-sī tang-sai-hiòng--ê. Kin-á-ji̍t ji̍t-thâu lo̍h-suann ê sî-tsūn, lí tsí-iàu sió-khuá iánn--tsi̍t-ē, ing-kai to̍h ē tshuē-tio̍h.

[English] Chicagohenge: Equinox in an Aligned City

Chicago, in a way, is like a modern Stonehenge. The way is east to west, and the time is today. Today, and every equinox, the Sun will set exactly to the west, everywhere on Earth. Therefore, today in Chicago, the Sun will set directly down the long equatorially-aligned grid of streets and buildings, an event dubbed #chicagohenge. Featured here is a Chicago Henge picture taken during the equinox in mid-September of 2017 looking along part of Upper Wacker Drive. Many cities, though, have streets or other features that are well-aligned to Earth's spin axis. Therefore, quite possibly, your favorite street may also run east - west. Tonight at sunset, with a quick glance, you can actually find out.

詞彙學習