少年星團 NGC 1333

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Young Star Cluster NGC 1333
• 影像來源：ESA/Webb, NASA, CSA, A. Scholz, K. Muzic, A. Langeveld, R. Jayawardhana
• 台文翻譯：An-Li Tsai (NSYSU)

[漢羅] 少年星團 NGC 1333

James Webb 太空望遠鏡 翕--ê 這張 壯麗 ê 拼鬥影像，是 少年星團 NGC 1333 ê 中心。 伊是一个 tī 英仙座 方向，大型 英仙座分子雲邊仔 ê 星團。 而且伊無偌遠，才 1000 光年遠 爾爾。 Webb 太空望遠鏡 ê 深空 探索 包括觀測這區，主要是欲辨識 低質量棕矮星 kah 獨立行星。 太空望遠鏡 ê 視野有 2 光年闊，kā 這个厚塗粉星團 ê 恆星工場 包 tī 內底。 實際上， 咱已經知影 NGC 1333 內底有 比 100 萬歲閣較少歲 ê 恆星，毋過大部份攏去予 滿四界 ê 星塗 閘牢矣，所以 光學望遠鏡看袂著。 這个亂糟糟 ê 環境可能 kah 咱 太陽 tī 45 億年前 拄形成 ê 時陣有成。

[POJ] Siàu-liân Seng-thoân NGC 1333

James Webb Thài-khong Bōng-oán-kiàⁿ hip--ê chit-tiuⁿ chòng-lē ê pheng-tàu iáⁿ-siōng, sī siàu-liân seng-thoân NGC 1333 ê tiong-sim. I sī chi̍t-ê tī Eng-sian-chō hong-hiòng, tōa-hêng Eng-sian-chō hun-chú hûn piⁿ-á ê seng-thoân. Jî-chhiáⁿ i bô gōa hn̄g, chiah 1000 kng-nî hn̄g niā-niā. Webb Thài-khong Bōng-oán-kiàⁿ ê chhim-khong thàm-soh pau-koat koan-chhek chit khu, chú-iàu sī beh piān-sek kē chit-liōng chang-é-chhiⁿ kah to̍k-li̍p kiâⁿ-chhiⁿ. Thài-khong bōng-oán-kiàⁿ ê sī-iá ū 2 kng-nî khoah, kā chit-ê kāu thô͘-hún seng-thoân ê hêng-chhiⁿ kang-tiûⁿ pau tī lāi-té. Si̍t-chè-siōng, lán í-keng chai-iáⁿ NGC 1333 lāi-té ū pí 100 bān hòe koh-khah chió-hòe ê hêng-chhiⁿ, m̄-koh tōa-pō͘-hūn lóng khì hō͘ móa-sì-kè ê seng-thô͘ cha̍h-tiâu--ah, só͘-í kng-ha̍k bōng-oán-kiàⁿ khòaⁿ bē-tio̍h. Chit-ê loān-chau-chau ê khoân-kéng khó-lêng kah lán Thài-iông tī 45 ek nî-chêng tú hêng-sêng ê sî-chūn ū sêng.

[KIP] Siàu-liân Sing-thuân NGC 1333

James Webb Thài-khong Bōng-uán-kiànn hip--ê tsit-tiunn tsòng-lē ê phing-tàu iánn-siōng, sī siàu-liân sing-thuân NGC 1333 ê tiong-sim. I sī tsi̍t-ê tī Ing-sian-tsō hong-hiòng, tuā-hîng Ing-sian-tsō hun-tsú hûn pinn-á ê sing-thuân. Jî-tshiánn i bô guā hn̄g, tsiah 1000 kng-nî hn̄g niā-niā. Webb Thài-khong Bōng-uán-kiànn ê tshim-khong thàm-soh pau-kuat kuan-tshik tsit khu, tsú-iàu sī beh piān-sik kē tsit-liōng tsang-é-tshinn kah to̍k-li̍p kiânn-tshinn. Thài-khong bōng-uán-kiànn ê sī-iá ū 2 kng-nî khuah, kā tsit-ê kāu thôo-hún sing-thuân ê hîng-tshinn kang-tiûnn pau tī lāi-té. Si̍t-tsè-siōng, lán í-king tsai-iánn NGC 1333 lāi-té ū pí 100 bān huè koh-khah tsió-huè ê hîng-tshinn, m̄-koh tuā-pōo-hūn lóng khì hōo muá-sì-kè ê sing-thôo tsa̍h-tiâu--ah, sóo-í kng-ha̍k bōng-uán-kiànn khuànn bē-tio̍h. Tsit-ê luān-tsau-tsau ê khuân-kíng khó-lîng kah lán Thài-iông tī 45 ik nî-tsîng tú hîng-sîng ê sî-tsūn ū sîng.

[English] Young Star Cluster NGC 1333

This spectacular mosaic of images from the James Webb Space Telescope peers into the heart of young star cluster NGC 1333. A mere 1,000 light-years distant toward the heroic constellation Perseus, the nearby star cluster lies at the edge of the large Perseus molecular cloud. Part of Webb's deep exploration of the region to identify low mass brown dwarf stars and free floating planets, the space telescope's combined field of view spans nearly 2 light-years across the dusty cluster's turbulent stellar nursery. In fact, NGC 1333 is known to harbor stars less than a million years old, though most are hidden from optical telescopes by the pervasive stardust. The chaotic environment may be similar to one in which our own Sun formed over 4.5 billion years ago.

詞彙學習