Tatra 山脈 ê 夜空

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Night Sky over the Tatra Mountains
• 影像來源：Marcin Rosadziński; 文稿：Natalia Lewandowska (SUNY Oswego)
• 宇宙 ê 入口：APOD 亂數產生器
• 台文翻譯：An-Li Tsai (NSYSU)

[漢羅] Tatra 山脈 ê 夜空

Slovakia 共和國 kah 波蘭 ê 自然邊界是 Tatra 山脈。 Tatra 山 是 Carpathians 山脈 上懸 ê 山。 Tùi 天文攝影師 來講，遮是一个足有名 ê 所在。 這張相片 是 5 月份翕--ê，你會當看著咱 銀河系 中心 kah 一寡有名 ê 恆星工場，像 內海仔星雲 kah Omega 星雲，就出現 tī Tatra 山脈天頂。 恆星工場 內底攏是 水素離子，這是做水 ê 基本元素，咱地球頂懸上濟-- ê 就是水。 所有 tī 宇宙 內底咱所知影 ê 性命形式，水是一項 足重要 ê 元素。 這个 水，就 tī 相片前景 ê Bialka 河 內底。

[POJ] Tatra soaⁿ-me̍h ê Iā-khong

Slovakia kiōng-hô-kok kah Pho-lân ê chū-jiân pian-kài sī Tatra soaⁿ-me̍h. Tatra soaⁿ sī Carpathians soaⁿ-me̍h siōng koân ê soaⁿ. Tùi thian-bûn liap-iáⁿ-su lâi-kóng, chia sī chi̍t-ê chiok ū-miâ ê só͘-chāi. Chit-tiuⁿ siòng-phìⁿ sī 5 goe̍h-hūn hip--ê, lí ē-tàng khòaⁿ-tio̍h lán Gîn-hô-hē tiong-sim kah chi̍t-kóa ū-miâ ê hêng-chhiⁿ kang-tiûⁿ, chhiūⁿ Lāi-hái-á Seng-hûn kah Omega Seng-hûn, to̍h chhut-hiān tī Tatra soaⁿ-me̍h thiⁿ-téng. Hêng-chhiⁿ kang-tiûⁿ lāi-té lóng sī chúi-sò͘ lī-chú, che-sī chò chúi ê ki-pún goân-sò͘, lán Tē-kiû téng-koân siōng chē--ê to̍h-sī chúi. Só͘-ū tī ú-tiū lāi-té lán só͘ chai-iáⁿ ê sìⁿ-miā hêng-sek, chúi sī chi̍t-hāng chiok tiōng-iàu ê goân-sò͘. Chit-ê chúi, to̍h tī siòng-phìⁿ chiân-kéng ê Bialka Hô lāi-té.

[KIP] Tatra suann-me̍h ê Iā-khong

Slovakia kiōng-hô-kok kah Pho-lân ê tsū-jiân pian-kài sī Tatra suann-me̍h. Tatra suann sī Carpathians suann-me̍h siōng kuân ê suann. Tuì thian-bûn liap-iánn-su lâi-kóng, tsia sī tsi̍t-ê tsiok ū-miâ ê sóo-tsāi. Tsit-tiunn siòng-phìnn sī 5 gue̍h-hūn hip--ê, lí ē-tàng khuànn-tio̍h lán Gîn-hô-hē tiong-sim kah tsi̍t-kuá ū-miâ ê hîng-tshinn kang-tiûnn, tshiūnn Lāi-hái-á Sing-hûn kah Omega Sing-hûn, to̍h tshut-hiān tī Tatra suann-me̍h thinn-tíng. Hîng-tshinn kang-tiûnn lāi-té lóng sī tsuí-sòo lī-tsú, tse-sī tsò tsuí ê ki-pún guân-sòo, lán Tē-kiû tíng-kuân siōng tsē--ê to̍h-sī tsuí. Sóo-ū tī ú-tiū lāi-té lán sóo tsai-iánn ê sìnn-miā hîng-sik, tsuí sī tsi̍t-hāng tsiok tiōng-iàu ê guân-sòo. Tsit-ê tsuí, to̍h tī siòng-phìnn tsiân-kíng ê Bialka Hô lāi-té.

[English] A Night Sky over the Tatra Mountains

A natural border between Slovakia and Poland is the Tatra Mountains. A prominent destination for astrophotographers, the Tatras are the highest mountain range in the Carpathians. In the featured image taken in May, one can see the center of our Milky Way galaxy with some of its famous stellar nurseries, the Lagoon and Omega Nebula, just over the top of the Tatras. Stellar nurseries are full of ionized hydrogen, a fundamental component for the formation of Earth-abundant water. As a fundamental ingredient in all known forms of life, water is a crucial element in the Universe. Such water can be seen in the foreground in the form of the Bialka River.

詞彙學習