火星：衛星、隕石坑、kah 火山

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Mars: Moon, Craters, and Volcanos
• 影像來源：ESA, DLR, FU Berlin, Mars Express; 資料處理 kah CC 2.0 版 ê 許可: Andrea Luck; h/t: Phil Plait
• 台文翻譯：An-Li Tsai (NSYSU)

[漢羅] 火星：衛星、隕石坑、kah 火山

你若是 ùi 火星頂懸飛過，會看著啥物？ 這張相片 是 火星快車號 太空船 7 月 ê 時陣 ùi 火星 足趣味 ê 一區 頂懸翕--ê。 相片內底上有名 ê 特徵是 Olympus 山，這是 太陽系 內底上大 ê 火山，就 tī 相片正爿頂懸遐。 正爿地平線頂懸有另外一个嘛足大 ê 火星火山：Pavonis 山。 咱閣會當看著這粒 紅色行星 ê 表面 有幾若个 圓 ê 隕石坑。 予人印象較深 ê 是，咧翕這張相片 ê 時陣，中央倒爿有一粒 烏烏--ê，是 註定會死 ê 火衛一 Phobos。 倒爿下底 ê 火星 地表 是 Orcus 塌仔地，伊是長株圓--ê，而且大甲毋是款。 是按怎有這个 神祕 ê 結構，到今咱猶毋知。 ESA ê 機器人太空船 火星快車號 tī 2003 年發射。 Tī 過去足濟 有名 ê 科學 發現 中，伊是一个捌提供證據講 火星頂懸有大型 水體 ê 太空船。

[POJ] Hóe-chhiⁿ: Ūi-chhiⁿ, Ún-se̍k-kheⁿ, kah Hóe-soaⁿ

Lí nā-sī ùi Hóe-chhiⁿ téng-koân poe-kòe, ē khòaⁿ-tio̍h siáⁿ-mih? Chit-tiuⁿ siòng-phìⁿ sī Hóe-chhiⁿ khoài-chhia-hō thài-khong-chûn 7 goe̍h ê sî-chūn ùi Hóe-chhiⁿ chiok chhù-bī ê chi̍t khu téng-koân hip--ê. Siòng-phìⁿ lāi-té siōng ū-miâ ê te̍k-teng sī Olympus soaⁿ, che-sī Thài-iông-hē lāi-té siōng-tōa ê hóe-soaⁿ, to̍h tī siòng-phìⁿ chiàⁿ-pêng téng-koân hia. Chiàⁿ-pêng tē-pêng-sòaⁿ téng-koân ū lēng-gōa chi̍t-ê mā chiok tōa ê Hóe-chhiⁿ hóe-soaⁿ: Pavonis soaⁿ. lán koh ē-tàng khòaⁿ-tio̍h chit lia̍p âng-sek hêng-chhiⁿ ê piáu-bīn ū kúi-nā ê îⁿ ê ún-chio̍h kheⁿ. Hō͘ lâng ìn-sióng khah chhim ê sī, leh hip chit-tiuⁿ siòng-phìⁿ ê sî-chūn, tiong-ng tò-pêng ū chi̍t-lia̍p o͘-o͘--ê, sī chù-tiāⁿ ē sí ê Hóe-ūi-it Phobos. Tò-pêng ē-té ê Hóe-chhiⁿ tē-piáu sī Orcus lap-á-tē, i sī tn̂g-tu îⁿ--ê, jî-chhiáⁿ tōa kah m̄-sī-khoán. Sī-án-chóaⁿ ū chit-ê sîn-pì ê kiat-kò͘, kàu-taⁿ lán iah m̄-chai. ESA ê ke-khì-lâng thài-khong-chûn Hóe-chhiⁿ Khoài-chhia-hō tī 2003 nî hoat-siā. Tī kòe-khì chiok chē ū-miâ ê kho-ha̍k hoat-hiān tiong, i sī chi̍t-ê bat thê-kiong chèng-kì kóng Hóe-chhiⁿ téng-koân ū tōa-hêng chúi-thé ê thài-khong-chûn.

[KIP] Hué-tshinn: Uī-tshinn, Ún-si̍k-khenn, kah Hué-suann

Lí nā-sī uì Hué-tshinn tíng-kuân pue-kuè, ē khuànn-tio̍h siánn-mih? Tsit-tiunn siòng-phìnn sī Hué-tshinn khuài-tshia-hō thài-khong-tsûn 7 gue̍h ê sî-tsūn uì Hué-tshinn tsiok tshù-bī ê tsi̍t khu tíng-kuân hip--ê. Siòng-phìnn lāi-té siōng ū-miâ ê ti̍k-ting sī Olympus suann, tse-sī Thài-iông-hē lāi-té siōng-tuā ê hué-suann, to̍h tī siòng-phìnn tsiànn-pîng tíng-kuân hia. Tsiànn-pîng tē-pîng-suànn tíng-kuân ū līng-guā tsi̍t-ê mā tsiok tuā ê Hué-tshinn hué-suann: Pavonis suann. lán koh ē-tàng khuànn-tio̍h tsit lia̍p âng-sik hîng-tshinn ê piáu-bīn ū kuí-nā ê înn ê ún-tsio̍h khenn. Hōo lâng ìn-sióng khah tshim ê sī, leh hip tsit-tiunn siòng-phìnn ê sî-tsūn, tiong-ng tò-pîng ū tsi̍t-lia̍p oo-oo--ê, sī tsù-tiānn ē sí ê Hué-ūi-it Phobos. Tò-pîng ē-té ê Hué-tshinn tē-piáu sī Orcus lap-á-tē, i sī tn̂g-tu înn--ê, jî-tshiánn tuā kah m̄-sī-khuán. Sī-án-tsuánn ū tsit-ê sîn-pì ê kiat-kòo, kàu-tann lán iah m̄-tsai. ESA ê ke-khì-lâng thài-khong-tsûn Hué-tshinn Khuài-tshia-hō tī 2003 nî huat-siā. Tī kuè-khì tsiok tsē ū-miâ ê kho-ha̍k huat-hiān tiong, i sī tsi̍t-ê bat thê-kiong tsìng-kì kóng Hué-tshinn tíng-kuân ū tuā-hîng tsuí-thé ê thài-khong-tsûn.

[English] Mars: Moon, Craters, and Volcanos

If you could fly over Mars, what might you see? The featured image shows exactly this in the form of a Mars Express vista captured over a particularly interesting region on Mars in July. The picture's most famous feature is Olympus Mons, the largest volcano in the Solar System, visible on the upper right. Another large Martian volcano is visible on the right horizon: Pavonis Mons. Several circular impact craters can be seen on the surface of the aptly named red planet. Impressively, this image was timed to capture the dark and doomed Martian moon Phobos, visible just left of center. The surface feature on the lower left, known as Orcus Patera, is unusual for its large size and oblong shape, and mysterious because the processes that created it still remain unknown. ESA's robotic Mars Express spacecraft was launched in 2003 and, among many notable science discoveries, bolstered evidence that Mars was once home to large bodies of water.

詞彙學習