M31：仙女座星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：M31: The Andromeda Galaxy
• 影像來源：Subaru (NAOJ), Hubble (NASA/ESA), Mayall (NSF); 資料處理 kah 版權：R. Gendler & R. Croman
• 予老師 kah 學生：歡迎 tī 學校用 APOD
• 台文翻譯：An-Li Tsai (NSYSU)

[漢羅] M31：仙女座星系

M31 仙女座星系 是咱目睭會當直接看著 ê 天體內底 上遠--ê。 伊離咱有 250 萬 光年 遠，是一个大細 超過 20 萬光年 ê 大捲螺仔星系。 雖罔講這个 tī 仙女座 內底 ê 仙女座星雲 有淡薄仔暗，咱猶是看會著。 這張媠甲擋袂牢 ê 望遠鏡影像 是 kā 踅地球行 ê 哈伯太空望遠鏡 kah 地面望遠鏡 Subaru kah Mayall ê 影像資料疊做一張--ê。 影像 ê 對比足明顯 ê，有黃色 ê 核心、暗色彎曲 ê 塗粉帶、伸長 ê 捲螺仔手骨、手骨面頂 ê 藍色星團 kah 紅色星雲。 閣 50 億年，仙女座星系可能 to̍h 會 看較清楚 矣。 Tī 伊 kah 咱 銀河系 合併 抑是 ùi 咱銀河系邊仔 閃過 進前，咱規个天頂會攏是伊。

[POJ] M31: Sian-lú-chō Seng-hē

M31 Sian-lú-chō Seng-hē sī lán ba̍k-chiu ē-tàng ti̍t-chiap khòaⁿ--tio̍h ê thian-thé lāi-té siōng hn̄g--ê. I lî lán ū 250 bān kng-nî hn̄g, sī chi̍t-ê tōa-sè chhiau-kòe 20 bān kng-nî khoah ê tōa kńg-lê-á seng-hē. Sui-bóng-kóng chit-ê tī Sian-lú-chō lāi-té ê Sian-lú-chō seng-hûn ū tām-po̍h-á àm, lán iáu-sī khòaⁿ-ē-tio̍h. Chit-tiuⁿ súi kah tòng-bē-tiâu ê bōng-oán-kiàⁿ iáⁿ-siōng sī kā se̍h Tē-kiû kiâⁿ ê Ha-peh Thài-khong Bōng-oán-kiàⁿ kah tē-bīn bōng-oán-kiàⁿ Subaru kah Mayall ê iáⁿ-siōng chu-liāu tha̍h chò chi̍t-tiuⁿ--ê. Iáⁿ-siōng ê tùi-pí chiok bêng-hián ê, ū n̂g-sek ê he̍k-sim, àm-sek oan-khiau ê thô͘-hún-tòa, chhun-tn̂g ê kńg-lê-á chhiú-kut, chhiú-kut bīn-téng ê nâ-sek seng-thoân kah âng-sek seng-hûn. Koh 50 ek nî, Sian-lú-chō Seng-hē khó-lêng to̍h ē khòaⁿ khah chheng-chhó͘--ah. Tī i kah lán Gîn-hô-hē ha̍p-pèng ia̍h-sī ùi lán Gîn-hô-hē piⁿ-á siám--kòe chìn-chêng, lán kui-ê thiⁿ-téng ē lóng sī i.

[KIP] M31: Sian-lú-tsō Sing-hē

M31 Sian-lú-tsō Sing-hē sī lán ba̍k-tsiu ē-tàng ti̍t-tsiap khuànn--tio̍h ê thian-thé lāi-té siōng hn̄g--ê. I lî lán ū 250 bān kng-nî hn̄g, sī tsi̍t-ê tuā-sè tshiau-kuè 20 bān kng-nî khuah ê tuā kńg-lê-á sing-hē. Sui-bóng-kóng tsit-ê tī Sian-lú-tsō lāi-té ê Sian-lú-tsō sing-hûn ū tām-po̍h-á àm, lán iáu-sī khuànn-ē-tio̍h. Tsit-tiunn suí kah tòng-bē-tiâu ê bōng-uán-kiànn iánn-siōng sī kā se̍h Tē-kiû kiânn ê Ha-peh Thài-khong Bōng-uán-kiànn kah tē-bīn bōng-uán-kiànn Subaru kah Mayall ê iánn-siōng tsu-liāu tha̍h tsò tsi̍t-tiunn--ê. Iánn-siōng ê tuì-pí tsiok bîng-hián ê, ū n̂g-sik ê hi̍k-sim, àm-sik uan-khiau ê thôo-hún-tuà, tshun-tn̂g ê kńg-lê-á tshiú-kut, tshiú-kut bīn-tíng ê nâ-sik sing-thuân kah âng-sik sing-hûn. Koh 50 ik nî, Sian-lú-tsō Sing-hē khó-lîng to̍h ē khuànn khah tshing-tshóo--ah. Tī i kah lán Gîn-hô-hē ha̍p-pìng ia̍h-sī uì lán Gîn-hô-hē pinn-á siám--kuè tsìn-tsîng, lán kui-ê thinn-tíng ē lóng sī i.

[English] M31: The Andromeda Galaxy

The most distant object easily visible to the unaided eye is M31, the great Andromeda Galaxy. Even at some two and a half million light-years distant, this immense spiral galaxy -- spanning over 200,000 light years -- is visible, although as a faint, nebulous cloud in the constellation Andromeda. In contrast, a bright yellow nucleus, dark winding dust lanes, and expansive spiral arms dotted with blue star clusters and red nebulae, are recorded in this stunning telescopic image which combines data from orbiting Hubble with ground-based images from Subaru and Mayall. In only about 5 billion years, the Andromeda galaxy may be even easier to see -- as it will likely span the entire night sky -- just before it merges or passes right by our Milky Way Galaxy.

詞彙學習