火星 ê 細粒衛星 火衛二 Deimos

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Small Moon Deimos
• 影像來源：HiRISE, MRO, LPL (U. Arizona), NASA
• 台文翻譯：An-Li Tsai (NSYSU)

[漢羅] 火星 ê 細粒衛星 火衛二 Deimos

火星有 2 粒 細粒衛星，火衛一 Phobos kah 火衛二 Deimos，這兩个名是 ùi 希臘文 ê 驚 kah 惶 來--ê。 這是火衛二 Deimos ê 詳細表面圖，兩張攏是。 這寡影像是 NASA 火星探測軌道衛星 頂懸 ê HiRISE kha-mé-lah tī 2009 年翕--ê，這台太空船 ê 長期任務 是監看這粒紅色行星。 火衛二 Deimos 是 火星 2 粒衛星內底 較外口彼粒。 伊是太陽系內底上細粒 ê 衛星之一，直徑才 15 公里爾爾。 火星 這 2 粒衛星 攏是 Washington D.C. ê 美國海軍天文台 內底 ê 美國天文學家 Asaph Hall tī 1877 年揣著--ê。 毋過 tī 1610 年 ê 時陣，天文學家 Johannes Kepler 就講火星有 2 粒衛星矣。 Johannes Kepler 就是寫出 行星運動定律 ê 人。 其實 Kepler ê 預測 毋是根據 科學原理，毋過伊 ê 文章 kah 想法 影響足大--ê。 大甲像 Jonathan Swift 寫 ê 小說「格列佛遊記」嘛講著火星 ê 這 2 粒衛星。 小說是 1726 年寫--ê，比這 2 粒衛星 去予揣著 ê 時間 閣較早 150 冬。

[POJ] Hóe-chhiⁿ ê sè-lia̍p ōe-chhiⁿ Hóe-ōe-jī Deimos

Hóe-chhiⁿ ū 2 lia̍p sè-lia̍p ōe-chhiⁿ, Hóe-ōe-it Phobos kah Hóe-ōe-jī Deimos, chit nn̄g-ê miâ sī ùi Hi-lia̍p bûn ê kiaⁿ kah hiâⁿ lâi--ê. Che-sī Hóe-ōe-jī Deimos ê siông-sè piáu-bīn tô͘, nn̄g tiuⁿ lóng sī. Chit kóa iáⁿ-siōng sī NASA Hóe-chhiⁿ Thàm-chhek Kúi-tō Ōe-chhiⁿ téng-koân ê HiRISE kha-mé-lah tī 2009 nî hip--ê, chit tâi thài-khong-chûn ê tn̂g-kî jīm-bū sī kàm-khòaⁿ chit lia̍p âng-sek kiâⁿ-chhiⁿ. Hóe-ōe-jī Deimos sī Hóe-chhiⁿ 2 lia̍p ōe-chhiⁿ lāi-té khah gōa-kháu hit lia̍p. I sī Thài-iông-hē lāi-té siōng sè-lia̍p ê ōe-chhiⁿ chi-it, ti̍t-kèng chiah 15 kong-lí niā-niā. Hóe-chhiⁿ che 2 lia̍p ōe-chhiⁿ lóng sī Washington D.C. ê Bí-kok Hái-kun Thian-bûn-tâi lāi-té ê Bí-kok thian-bûn ha̍k-ka Asaph Hall tī 1877 nî chhōe-tio̍h--ê. M̄-koh tī 1610 nî ê sî-chūn, thian-bûn ha̍k-ka Johannes Kepler to̍h kóng Hóe-chhiⁿ ū 2 lia̍p ōe-chhiⁿ--ah. Johannes Kepler tio̍h-sī siá-chhut Kiâⁿ-chhiⁿ Ūn-tōng Tēng-lu̍t ê lâng. Kî-si̍t Kepler ê ī-chhek m̄-sī kin-kì kho-ha̍k goân-lí, m̄-koh i ê bûn-chiuⁿ kah siūⁿ-hoat éng-hióng chiok tōa--ê. Tōa kah chhiūⁿ Jonathan Swift siá ê sió-soat "Keh-lia̍t-hu̍t Iû-kì" mà kóng-tio̍h Hóe-chhiⁿ ê che 2 lia̍p ōe-chhiⁿ. Sió-soat sī 1726 nî siá--ê, pí che 2 lia̍p ōe-chhiⁿ khì hō͘ chhōe-tio̍h ê sî-kan koh khah-chá 150 tang.

[KIP] Hué-tshinn ê sè-lia̍p uē-tshinn Hué-uē-jī Deimos

Hué-tshinn ū 2 lia̍p sè-lia̍p uē-tshinn, Hué-uē-it Phobos kah Hué-uē-jī Deimos, tsit nn̄g-ê miâ sī uì Hi-lia̍p bûn ê kiann kah hiânn lâi--ê. Tse-sī Hué-uē-jī Deimos ê siông-sè piáu-bīn tôo, nn̄g tiunn lóng sī. Tsit kuá iánn-siōng sī NASA Hué-tshinn Thàm-tshik Kuí-tō Uē-tshinn tíng-kuân ê HiRISE kha-mé-lah tī 2009 nî hip--ê, tsit tâi thài-khong-tsûn ê tn̂g-kî jīm-bū sī kàm-khuànn tsit lia̍p âng-sik kiânn-tshinn. Hué-uē-jī Deimos sī Hué-tshinn 2 lia̍p uē-tshinn lāi-té khah guā-kháu hit lia̍p. I sī Thài-iông-hē lāi-té siōng sè-lia̍p ê uē-tshinn tsi-it, ti̍t-kìng tsiah 15 kong-lí niā-niā. Hué-tshinn tse 2 lia̍p uē-tshinn lóng sī Washington D.C. ê Bí-kok Hái-kun Thian-bûn-tâi lāi-té ê Bí-kok thian-bûn ha̍k-ka Asaph Hall tī 1877 nî tshuē-tio̍h--ê. M̄-koh tī 1610 nî ê sî-tsūn, thian-bûn ha̍k-ka Johannes Kepler to̍h kóng Hué-tshinn ū 2 lia̍p uē-tshinn--ah. Johannes Kepler tio̍h-sī siá-tshut Kiânn-tshinn Ūn-tōng Tīng-lu̍t ê lâng. Kî-si̍t Kepler ê ī-tshik m̄-sī kin-kì kho-ha̍k guân-lí, m̄-koh i ê bûn-tsiunn kah siūnn-huat íng-hióng tsiok tuā--ê. Tuā kah tshiūnn Jonathan Swift siá ê sió-suat "Keh-lia̍t-hu̍t Iû-kì" mà kóng-tio̍h Hué-tshinn ê tse 2 lia̍p uē-tshinn. Sió-suat sī 1726 nî siá--ê, pí tse 2 lia̍p uē-tshinn khì hōo tshuē-tio̍h ê sî-kan koh khah-tsá 150 tang.

[English] Small Moon Deimos

Mars has two tiny moons, Phobos and Deimos, named for the figures in Greek mythology Fear and Panic. Detailed surface views of smaller moon Deimos are shown in both these panels. The images were taken in 2009, by the HiRISE camera on board the Mars Reconnaissance Orbiter spacecraft on NASA's long-lived mission to monitor the Red Planet. The outermost of the two Martian moons, Deimos is one of the smallest known moons in the Solar System, measuring only about 15 kilometers across. Both Martian moons were discovered in 1877 by Asaph Hall, an American astronomer working at the US Naval Observatory in Washington D.C. But their existence was postulated around 1610 by Johannes Kepler, the astronomer who derived the laws of planetary motion. In this case, Kepler's prediction was not based on scientific principles, but his writings and ideas were so influential that the two Martian moons are discussed in works of fiction such as Jonathan Swift's Gulliver's Travels, written in 1726, over 150 years before their actual discovery.

詞彙學習