NGC 247 kah in 朋友

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 247 and Friends
• 影像來源 kah 版權：資料來源：Eric Benson, 資料處理：Dietmar Hager
• 台文翻譯：An-Li Tsai (NSYSU)

[漢羅] NGC 247 kah in 朋友

NGC 247 差不多有 7 萬光年大，是一个比銀河較細 ê 捲螺仔星系。 咱量著 伊 ê 距離 kah 咱才差 1100 萬光年爾爾，實在是足近--ê。 Ùi 咱 ê 角度來看，伊趨坦倒，是一个側向星系。 伊是這个視野 ê 主角，望遠鏡看--ê 方向是 南天 ê 海翁座。 星系盤其中一爿有一空，敢若是 針欲穿線彼空，所以有人 kā 叫做「針空星系」。 這張清楚 ê 星系肖像 有足濟 背景星系，其中上顯目 ê 就是 NGC 247 倒爿下跤彼 4 粒 排規排 ê 星系，in 就叫做 Burbidge 星系鍊。 Burbidge 星系鍊 tī 差不多 3 億光年遠 ê 所在。 NGC 247 kah 金爍爍 ê 捲螺仔星系 NGC 253 攏是 玉夫座星系團 ê 成員之一。

[POJ] NGC 247 kah in Pêng-iú

NGC 247 chha-put-to ū 7 bān kng-nî tōa, sī chi̍t-ê pí Gîn-hô khah sè ê kńg-lê-á seng-hē. Lán niû-tio̍h i ê kū-lî kah lán chiah chha 1100 bān kng-nî niā-niā, si̍t-chāi sī chiok kūn--ê. Ùi lán ê kak-tō͘ lâi-khòaⁿ, i chhu thán-tó, sī chi̍t-ê chhek-hiòng seng-hē. I sī chit-ê sī-iá ê chú-kak, bōng-oán-kiàⁿ khòaⁿ--ê hong-hiòng sī lâm-thian ê Hái-ang-chō. Seng-hē-pôaⁿ kî-tiong chi̍t-pêng ū chi̍t khang, ká-ná sī chiam beh chhng sòaⁿ hit khang, só͘-í ū-lâng kā kiò-chò "Chiam-khang Seng-hē". Chit-tiuⁿ chheng-chhó ê seng-hē siàu-siōng ū chiok chē pōe-kéng seng-hē, kî-tiong siōng hiáⁿ-ba̍k ê tio̍h-sī NGC 247 tò-pêng ē-kha hit 4 lia̍p pâi kui pâi ê seng-hē, in to̍h kiò-chò Burbidge Seng-hē-liān. Burbidge Seng-hē-liān tī chha-put-to 3 ek kng-nî hn̄g ê só͘-chāi. NGC 247 kah kim-sih-sih ê kńg-lê-á seng-hē NGC 253 lóng sī Gio̍k-hu-chō Seng-hē-thoân ê sêng-oân chi-it.

[KIP] NGC 247 kah in Pîng-iú

NGC 247 tsha-put-to ū 7 bān kng-nî tuā, sī tsi̍t-ê pí Gîn-hô khah sè ê kńg-lê-á sing-hē. Lán niû-tio̍h i ê kū-lî kah lán tsiah tsha 1100 bān kng-nî niā-niā, si̍t-tsāi sī tsiok kūn--ê. Uì lán ê kak-tōo lâi-khuànn, i tshu thán-tó, sī tsi̍t-ê tshik-hiòng sing-hē. I sī tsit-ê sī-iá ê tsú-kak, bōng-uán-kiànn khuànn--ê hong-hiòng sī lâm-thian ê Hái-ang-tsō. Sing-hē-puânn kî-tiong tsi̍t-pîng ū tsi̍t khang, ká-ná sī tsiam beh tshng suànn hit khang, sóo-í ū-lâng kā kiò-tsò "Tsiam-khang Sing-hē". Tsit-tiunn tshing-tshó ê sing-hē siàu-siōng ū tsiok tsē puē-kíng sing-hē, kî-tiong siōng hiánn-ba̍k ê tio̍h-sī NGC 247 tò-pîng ē-kha hit 4 lia̍p pâi kui pâi ê sing-hē, in to̍h kiò-tsò Burbidge Sing-hē-liān. Burbidge Sing-hē-liān tī tsha-put-to 3 ik kng-nî hn̄g ê sóo-tsāi. NGC 247 kah kim-sih-sih ê kńg-lê-á sing-hē NGC 253 lóng sī Gio̍k-hu-tsō Sing-hē-thuân ê sîng-uân tsi-it.

[English] NGC 247 and Friends

About 70,000 light-years across, NGC 247 is a spiral galaxy smaller than our Milky Way. Measured to be only 11 million light-years distant it is nearby though. Tilted nearly edge-on as seen from our perspective, it dominates this telescopic field of view toward the southern constellation Cetus. The pronounced void on one side of the galaxy's disk recalls for some its popular name, the Needle's Eye galaxy. Many background galaxies are visible in this sharp galaxy portrait, including the remarkable string of four galaxies just below and left of NGC 247 known as Burbidge's Chain. Burbidge's Chain galaxies are about 300 million light-years distant. NGC 247 itself is part of the Sculptor Group of galaxies along with shiny spiral NGC 253.

詞彙學習