NGC 6995：夜婆星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 6995: The Bat Nebula
• 影像來源 kah 版權：Mike Taivalmaa
• 台文翻譯：An-Li Tsai (NSYSU)

[漢羅] NGC 6995：夜婆星雲

你有看著一隻夜婆無？ 這張 宇宙特寫 內底 ê 夜婆，to̍h 出現 tī 面紗星雲 ê 東半爿。 面紗星雲 本身是一个大型超新星殘骸，是大質量 恆星 死亡爆炸 了後，產生 ê 脹大 ê 雲屑仔。 面紗星雲是 圓箍仔形，tī 天鵝座 方向，差不多有 3 度闊。 NGC 6995 私底下嘛叫做 夜婆星雲，tī 天頂看起來干焦半度闊爾爾，這差不多是 月娘 ê 視寸尺。 面紗星雲離 地球 有 1400 光年遠，照這个距離來估算，伊差不多 有 12 光年闊。 這幅組合影像 ê 影像資料是 ùi 狹頻 濾鏡來的。 超新星殘骸 ê 水素原子 發射線是紅色 ê，酸素 原子 ê 強發射線是藍色 ê。 面紗星雲 ê 西半爿 tī 另外一个 季節看起來 就敢若是 尪姨 ê 掃帚，所以伊就去予人叫做 尪姨掃帚 星雲。

[POJ] NGC 6995: Iā-pô Seng-hûn

Lí ū khòaⁿ-tio̍h chi̍t chiah iā-pô bô? I to̍h tī Bīn-se Seng-hûn tang-poàn-pêng ê ú-tiū te̍k-siá chhut-hiān. Bīn-se Seng-hûn pún-sin sī chi̍t-ê tōa-hêng chhiau-sin-seng chân-hâi, sī ùi tōa-chit-liōng hêng-chhiⁿ sí-bông po̍k-chà liáu-āu, sán-seng ê tiùⁿ-tōa ê hûn-sap-á. Bīn-se Seng-hûn sī îⁿ-kho͘-á-hêng, tī Thian-gô-chō hong-hiòng, chha-put-to ū 3 tō͘ khoah. NGC 6995 su-té-hā mā kiò-chò Iā-pô Seng-hûn, tī thiⁿ-téng khòaⁿ--khí-lâi kan-na pòaⁿ-tō͘-khoah niā-niā, chha-put-to sī goe̍h-niû ê sī-chhùn-chhioh. Bīn-se Seng-hûn lî Tē-kiû ū 1400 kng-nî hn̄g, chiàu chit-ê kū-lî lâi kó͘-sǹg, i chha-put-to ū 12 kng-nî khoah. Chit-pak cho͘-ha̍p iáⁿ-siōng ê iáⁿ-siōng chu-liāu sī ùi e̍h-pîn lū-kiàⁿ lâi ê. Chhiau-sin-seng chân-hâi ê chúi-sò͘ goân-chú hoat-siā-sòaⁿ âng-sek ê, sàng-sò͘ goân-chú ê kiông hoat-siā-sòaⁿ sī nâ-sek ê. Bīn-se Seng-hûn ê sai-pòaⁿ-pêng tī lēng-gōa chi̍t-ê kùi-chiat khòaⁿ--khí-lâi to̍h ká-ná sī âng-î ê sàu-chhiú, só͘-í i to̍h khì hō͘ lâng kiò-chò Ang-î Sàu-chhiú Seng-hûn.

[KIP] NGC 6995: Iā-pô Sing-hûn

Lí ū khuànn-tio̍h tsi̍t tsiah iā-pô bô? I to̍h tī Bīn-se Sing-hûn tang-puàn-pîng ê ú-tiū ti̍k-siá tshut-hiān. Bīn-se Sing-hûn pún-sin sī tsi̍t-ê tuā-hîng tshiau-sin-sing tsân-hâi, sī uì tuā-tsit-liōng hîng-tshinn sí-bông po̍k-tsà liáu-āu, sán-sing ê tiùnn-tuā ê hûn-sap-á. Bīn-se Sing-hûn sī înn-khoo-á-hîng, tī Thian-gô-tsō hong-hiòng, tsha-put-to ū 3 tōo khuah. NGC 6995 su-té-hā mā kiò-tsò Iā-pô Sing-hûn, tī thinn-tíng khuànn--khí-lâi kan-na puànn-tōo-khuah niā-niā, tsha-put-to sī gue̍h-niû ê sī-tshùn-tshioh. Bīn-se Sing-hûn lî Tē-kiû ū 1400 kng-nî hn̄g, tsiàu tsit-ê kū-lî lâi kóo-sǹg, i tsha-put-to ū 12 kng-nî khuah. Tsit-pak tsoo-ha̍p iánn-siōng ê iánn-siōng tsu-liāu sī uì e̍h-pîn lū-kiànn lâi ê. Tshiau-sin-sing tsân-hâi ê tsuí-sòo guân-tsú huat-siā-suànn âng-sik ê, sàng-sòo guân-tsú ê kiông huat-siā-suànn sī nâ-sik ê. Bīn-se Sing-hûn ê sai-puànn-pîng tī līng-guā tsi̍t-ê kuì-tsiat khuànn--khí-lâi to̍h ká-ná sī âng-î ê sàu-tshiú, sóo-í i to̍h khì hōo lâng kiò-tsò Ang-î Sàu-tshiú Sing-hûn.

[English] NGC 6995: The Bat Nebula

Do you see the bat? It haunts this cosmic close-up of the eastern Veil Nebula. The Veil Nebula itself is a large supernova remnant, the expanding debris cloud from the death explosion of a massive star. While the Veil is roughly circular in shape and covers nearly 3 degrees on the sky toward the constellation of the Swan (Cygnus), NGC 6995, known informally as the Bat Nebula, spans only 1/2 degree, about the apparent size of the Moon. That translates to 12 light-years at the Veil's estimated distance, a reassuring 1,400 light-years from planet Earth. In the composite of image data recorded through narrow band filters, emission from hydrogen atoms in the remnant is shown in red with strong emission from oxygen atoms shown in hues of blue. Of course, in the western part of the Veil lies another seasonal apparition: the Witch's Broom Nebula.

詞彙學習