妝甲親像土星 ê 月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Moon Dressed Like Saturn
• 影像來源 kah 版權：Francisco Sojuel
• 天頂予你 ê 禮物：你 ê APOD 生日相片是佗一張？ (自 1995 開始)
• 台文翻譯：An-Li Tsai (NSYSU)

[漢羅] 妝甲親像土星 ê 月娘

是按怎土星會遮爾大粒？ 毋是啦！這是 地球 ê 雲閘 tī 月娘 頭前啦！ 月娘這馬是月眉形--ê，毋閣咱會看著規粒月娘，是因為伊反射 地球光，嘛叫做 Da Vinci ê 光。 太陽 直接 kā 月球 ê 腹肚底照予光，成做一个 月眉形。 這就表示講，太陽這馬一定是 tī 地平線下底，而且這張相片是 tī 日出進前翕--ê。 這張 會予人閣看一擺 ê 相片是 tī 2019 年 12 月 24 翕--ê。 兩工後，月娘會 ùi 日頭面頭前趨過，產生 日食。 前景 ê 電火是 ùi 瓜地馬拉 ê 小鎮來--ê，伊 to̍h tī Pacaya 大火山 ê 後壁。

[POJ] Chng kah chhiⁿ-chhiūⁿ Thó͘-chhiⁿ ê Goe̍h-niû

Sī án-ná Thó͘-chhiⁿ ē chiah-nī tōa-lia̍p? M̄-sī la̍h! Che sī Tē-kiû ê hûn cha̍h tī goe̍h-niû thâu-chêng la̍h! Goe̍h-niû chit-má sī goe̍h-bâi-hêng--ê, m̄-koh lán ē khòaⁿ-tio̍h kui-lia̍p goe̍h-niû, sī in-ūi i hoán-siā Tē-kiû-kng, mā kiò-chò Da Vinci glow ê kng. Thài-iông ti̍t-chiap kā Goe̍h-kiû ê pak-tó͘ chiò hō͘ kng, chiâⁿ chò chi̍t-ê goe̍h-bâi-hêng. Che to̍h piáu-sī kóng, Thài-iông chit-má it-tēng sī tī tē-pêng-sòaⁿ ē-té, jī-cháiⁿ chit-tiuⁿ siòng-phìⁿ sī tī ji̍t-chhut chìn-chêng hip--ê. Chit-tiuⁿ ē hō͘ lâng koh khòaⁿ chi̍t-pái ê siòng-phìⁿ sī tī 2019 nî 12 goe̍h 24 hip--ê. Nn̄g kang āu, goe̍h-niû ē ùi ji̍t-thâu bīn-thâu-chêng chhu kòe, sán-seng ji̍t-si̍t. Chiân-kéng ê tiān-hóe sī ùi Koa-tē-má-la ê sió-tìn lâi--ê, i to̍h tī Pacaya tōa hóe-soaⁿ ê āu-piah.

[KIP] Tsng kah tshinn-tshiūnn Thóo-tshinn ê Gue̍h-niû

Sī án-ná Thóo-tshinn ē tsiah-nī tuā-lia̍p? M̄-sī la̍h! Tse sī Tē-kiû ê hûn tsa̍h tī gue̍h-niû thâu-tsîng la̍h! Gue̍h-niû tsit-má sī gue̍h-bâi-hîng--ê, m̄-koh lán ē khuànn-tio̍h kui-lia̍p gue̍h-niû, sī in-uī i huán-siā Tē-kiû-kng, mā kiò-tsò Da Vinci glow ê kng. Thài-iông ti̍t-tsiap kā Gue̍h-kiû ê pak-tóo tsiò hōo kng, tsiânn tsò tsi̍t-ê gue̍h-bâi-hîng. Tse to̍h piáu-sī kóng, Thài-iông tsit-má it-tīng sī tī tē-pîng-suànn ē-té, jī-tsáinn tsit-tiunn siòng-phìnn sī tī ji̍t-tshut tsìn-tsîng hip--ê. Tsit-tiunn ē hōo lâng koh khuànn tsi̍t-pái ê siòng-phìnn sī tī 2019 nî 12 gue̍h 24 hip--ê. Nn̄g kang āu, gue̍h-niû ē uì ji̍t-thâu bīn-thâu-tsîng tshu kuè, sán-sing ji̍t-si̍t. Tsiân-kíng ê tiān-hué sī uì Kua-tē-má-la ê sió-tìn lâi--ê, i to̍h tī Pacaya tuā hué-suann ê āu-piah.

[English] A Moon Dressed Like Saturn

Why does Saturn appear so big? It doesn't -- what is pictured are foreground clouds on Earth crossing in front of the Moon. The Moon shows a slight crescent phase with most of its surface visible by reflected Earthlight known as Da Vinci glow. The Sun directly illuminates the brightly lit lunar crescent from the bottom, which means that the Sun must be below the horizon and so the image was taken before sunrise. This double take-inducing picture was captured on 2019 December 24, two days before the Moon slid in front of the Sun to create a solar eclipse. In the foreground, lights from small Guatemalan towns are visible behind the huge volcano Pacaya.

詞彙學習