積分通量星雲 IFN kah NGC 7771 星系群

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：IFN and the NGC 7771 Group
• 影像來源 kah 版權：Steve Mandel and Bob Fera
• 台文翻譯：An-Li Tsai (NSYSU)

[漢羅] 積分通量星雲 IFN kah NGC 7771 星系群

這是一張 NGC 7771 星系群 做主角 ê 迷人夜空相片。 NGC 7771 tī 飛馬座方向 2 億光年遠 ê 所在，就是相片中央彼粒大粒--ê 側向 捲螺仔星系。 伊 ê 大細差不多有 7500 光年大，下底有 2 个 較細 ê 星系。 伊正爿彼粒大粒--ê，是 正向 捲螺仔星系 NGC 7769。 NGC 7771 星系群 之間有交互作用，所以 in 互相會倚來倚去，經過久長 ê 宇宙時間了後，星系會合併。 欲揣著這款交互作用，看星系是毋是有 變形，抑是 星系之間是毋是有引潮力 搝出來 ê 微弱 恆星流，就會知。 毋過欲看著遮爾清楚 ê 星系群是較困難。 因為深空影像嘛會翕著 前景 ê 一大片 塗粉雲。 這款暗暗霧霧 ê 銀河絹雲，嘛叫做 積分通量星雲 IFN。 這款 暗暗 ê IFN 就 tī 銀河盤 頂懸 幾若百光年遠 ê 所在，會反射咱銀河系內底 ê 恆星光。

[POJ] Chek-hun Thong-liōng Seng-hûn IFN kah NGC 7771 Seng-hē-kûn

Che-sī chi̍t-tiuⁿ NGC 7771 seng-hē-kûn chò chú-kak ê bê-lâng iā-khong siòng-phìⁿ. NGC 7771 tī Hui-má-chō hong-hiòng 2 ek kng-nî hn̄g ê só͘-chāi, to̍h-sī siòng-phìⁿ tiong-ng hit lia̍p tōa-lia̍p--ê chhek-hiòng kńg-lê-á seng-hē. I ê tōa-sè chha-put-to ū 7500 kng-nî tōa, ē-té ū 2 ê khah sè ê seng-hē. I chiàⁿ-pêng hit lia̍p tōa-lia̍p--ê, sī chiàⁿ-hiàⁿ kńg-lê-á seng-hē NGC 7769. NGC 7771 seng-hē-kûn chi-kan ū kau-hō͘-chok-iōng, só͘-í in hō͘-siong ē óa-lâi óa-khì, keng-kòe kú-tn̂g ê ú-tiū sî-kan liáu-āu, seng-hē ē ha̍p-pèng. Beh chhōe-tio̍h chit-khoán kau-hō͘-chok-iōng, khòaⁿ seng-hē sī-m̄-sī ū piàn-hêng, ia̍h-sī seng-hē chi-kan sī-m̄-sī ū ín-tiau-le̍k giú chhut-lâi ê bî-jio̍k hêng-chhiⁿ-liû, to̍h ē chai. M̄-koh beh khòaⁿ-tio̍h chiah-nī chheng-chhó ê seng-hē-kûn sī khah khùn-lân. In-ūi chhim-khong iáⁿ-siōng mā ē hip-tio̍h chiân-kéng ê chi̍t-tōa-phiàn thô͘-hún-hûn. Chit-khoán àm-àm bū-bū ê gîn-hô kìn-hûn, mā kiò-chò Chek-hun Thong-liōng Seng-hûn IFN. Chit-khoán àm-àm ê IFN to̍h tī gîn-hô-pôaⁿ téng-koân kúi-nā pah kng-nî hn̄g ê só͘-chāi, ē hoán-siā lán Gîn-hô-hē lāi-té ê hêng-chhiⁿ-kng.

[KIP] Tsik-hun Thong-liōng Sing-hûn IFN kah NGC 7771 Sing-hē-kûn

Tse-sī tsi̍t-tiunn NGC 7771 sing-hē-kûn tsò tsú-kak ê bê-lâng iā-khong siòng-phìnn. NGC 7771 tī Hui-má-tsō hong-hiòng 2 ik kng-nî hn̄g ê sóo-tsāi, to̍h-sī siòng-phìnn tiong-ng hit lia̍p tuā-lia̍p--ê tshik-hiòng kńg-lê-á sing-hē. I ê tuā-sè tsha-put-to ū 7500 kng-nî tuā, ē-té ū 2 ê khah sè ê sing-hē. I tsiànn-pîng hit lia̍p tuā-lia̍p--ê, sī tsiànn-hiànn kńg-lê-á sing-hē NGC 7769. NGC 7771 sing-hē-kûn tsi-kan ū kau-hōo-tsok-iōng, sóo-í in hōo-siong ē uá-lâi uá-khì, king-kuè kú-tn̂g ê ú-tiū sî-kan liáu-āu, sing-hē ē ha̍p-pìng. Beh tshuē-tio̍h tsit-khuán kau-hōo-tsok-iōng, khuànn sing-hē sī-m̄-sī ū piàn-hîng, ia̍h-sī sing-hē tsi-kan sī-m̄-sī ū ín-tiau-li̍k giú tshut-lâi ê bî-jio̍k hîng-tshinn-liû, to̍h ē tsai. M̄-koh beh khuànn-tio̍h tsiah-nī tshing-tshó ê sing-hē-kûn sī khah khùn-lân. In-uī tshim-khong iánn-siōng mā ē hip-tio̍h tsiân-kíng ê tsi̍t-tuā-phiàn thôo-hún-hûn. Tsit-khuán àm-àm bū-bū ê gîn-hô kìn-hûn, mā kiò-tsò Tsik-hun Thong-liōng Sing-hûn IFN. Tsit-khuán àm-àm ê IFN to̍h tī gîn-hô-puânn tíng-kuân kuí-nā pah kng-nî hn̄g ê sóo-tsāi, ē huán-siā lán Gîn-hô-hē lāi-té ê hîng-tshinn-kng.

[English] IFN and the NGC 7771 Group

Galaxies of the NGC 7771 Group are featured in this intriguing skyscape. Some 200 million light-years distant toward the constellation Pegasus, NGC 7771 is the large, edge-on spiral near center, about 75,000 light-years across, with two smaller galaxies below it. Large spiral NGC 7769 is seen face-on to the right. Galaxies of the NGC 7771 group are interacting, making repeated close passages that will ultimately result in galaxy-galaxy mergers on a cosmic timescale. The interactions can be traced by distortions in the shape of the galaxies themselves and faint streams of stars created by their mutual gravitational tides. But a clear view of this galaxy group is difficult to come by as the deep image also reveals extensive clouds of foreground dust sweeping across the field of view. The dim, dusty galactic cirrus clouds are known as Integrated Flux Nebulae. The faint IFN reflect starlight from our own Milky Way Galaxy and lie only a few hundred light-years above the galactic plane.

詞彙學習