恆星工場 Messier 17

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Star Factory Messier 17
• 影像來源 kah 版權：Gaetan Maxant
• 台文翻譯：An-Li Tsai (NSYSU)

[漢羅] 恆星工場 Messier 17

咱附近有一个叫做 Messier 17 ê 恆星工廠，就 tī 5500 光年遠、厚星雲 ê 人馬座 內底。 照這个距離來算，1.5 度 ê 視野 差不多是 150 光年闊。 這張 清楚 ê 彩色合成影像，主要是欲翕 這寡較暗 ê 氣體塗粉雲 ê 細節，相片 ê 背景是 銀河 中央 ê 恆星。 Tī M17 內底，有 ùi 宇宙雲 kah 塗粉做出來 ê 高溫大質量恆星。 In 所產生 ê 恆星風 kah 高能輻射光，沓沓仔 kā 賰--ê 星際物質 吹走，產生這款 海綿質 外形 kah 彎彎曲曲 ê 形體。 M17 嘛叫做 Omega 星雲，抑是 天鵝星雲。

[POJ] Hêng-chhiⁿ Kang-tiûⁿ Messier 17

Lán hù-kīn ū chi̍t-ê kiò-chò Messier 17 ê hêng-chhiⁿ kang-tiûⁿ, to̍h tī 5500 kng-nî hn̄g, kāu seng-hûn ê Jîn-má-chō lāi-té Tī chit-ê kū-lī lâi sǹg, 1.5 tō͘ ê sī-iá chha-put-to sī 150 kng-nî khoah. Chit-tiuⁿ chheng-chhó ê chhái-sek ha̍p-sêng iáⁿ-siōng, chú-iàu sī beh hip chit kóa khah àm ê khì-thé thô͘-hún hûn ê sè-chiat, siòng-phìⁿ ê pōe-kéng sī Gîn-hô tiong-ng ê hêng-chhiⁿ. Tī M17 lāi-té, ū ùi ú-tiū hûn kah thô͘-hún chò-chhut-lâi ê ko-un tōa-chit-liōng hêng-chhiⁿ. In só͘ sán-seng ê hêng-chhiⁿ-hong kah ko-lêng hok-siā-kng, tau̍h-tau̍h-á kā chhun--ê sinng-chè bu̍t-chit chhoe-cháu, sán-seng chit-khoán hái-mî-chit gōa-hêng kah oan-oan-khiau-khiau ê hêng-thé. M17 mā kiò-chò Omega Seng-hûn, ia̍h-sī Thian-gô Seng-hûn.

[KIP] Hîng-tshinn Kang-tiûnn Messier 17

Lán hù-kīn ū tsi̍t-ê kiò-tsò Messier 17 ê hîng-tshinn kang-tiûnn, to̍h tī 5500 kng-nî hn̄g, kāu sing-hûn ê Jîn-má-tsō lāi-té Tī tsit-ê kū-lī lâi sǹg, 1.5 tōo ê sī-iá tsha-put-to sī 150 kng-nî khuah. Tsit-tiunn tshing-tshó ê tshái-sik ha̍p-sîng iánn-siōng, tsú-iàu sī beh hip tsit kuá khah àm ê khì-thé thôo-hún hûn ê sè-tsiat, siòng-phìnn ê puē-kíng sī Gîn-hô tiong-ng ê hîng-tshinn. Tī M17 lāi-té, ū uì ú-tiū hûn kah thôo-hún tsò-tshut-lâi ê ko-un tuā-tsit-liōng hîng-tshinn. In sóo sán-sing ê hîng-tshinn-hong kah ko-lîng hok-siā-kng, ta̍uh-ta̍uh-á kā tshun--ê sinng-tsè bu̍t-tsit tshue-tsáu, sán-sing tsit-khuán hái-mî-tsit guā-hîng kah uan-uan-khiau-khiau ê hîng-thé. M17 mā kiò-tsò Omega Sing-hûn, ia̍h-sī Thian-gô Sing-hûn.

[English] Star Factory Messier 17

A nearby star factory known as Messier 17 lies some 5,500 light-years away in the nebula-rich constellation Sagittarius. At that distance, this 1.5 degree wide field-of-view would span about 150 light-years. In the sharp color composite image faint details of the region's gas and dust clouds are highlighted with narrowband image data against a backdrop of central Milky Way stars. The stellar winds and energetic radiation from hot, massive stars already formed from M17's stock of cosmic gas and dust have slowly carved away at the remaining interstellar material, producing the nebula's cavernous appearance and the undulating shapes within. A popular stop on telescopic tours of the cosmos, M17 is also known as the Omega or the Swan Nebula.

詞彙學習