月娘 kā 土星 食去矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moon Eclipses Saturn
• 影像來源 kah 版權：Pau Montplet Sanz
• 天文相簿：2024 年 8 月 ê 月掩土星
• 台文翻譯：An-Li Tsai (NSYSU)

[漢羅] 月娘 kā 土星 食去矣！

土星若是消失去 會按怎？ 伊有當時仔確實會無去。 毋過，伊毋是消失去矣，伊只是去予 頭前 ê 月娘 閘牢矣。 這款現象就叫做 土食，講較正確咧，這是 月 掩 土星。 幾若工前，地球頂懸有一大片所在，ùi 秘魯、大西洋、到 意大利，攏看著這个現象。 這張彩色相片 是 目前為止上清楚 ê 數位合成相片，較暗 ê 土星 kah 較光 ê 月娘 之間 ê 光暗有重新調整過。 這張相片是 發生掩星進前，tī 西班牙 加泰隆尼亞 ê Breda 翕--ê。 到年尾進前，逐個月攏會發生 月 掩 土星。 毋過愛徛著位，才看會著這个一目𥍉就無去 ê 現象。

[POJ] Goe̍h-niû kā Thó͘-chhiⁿ chia̍h-khì--ah!

Thó͘-chhiⁿ nā-sī siau-sit khì ē án-chóaⁿ? I ū-tang-sî-á khak-si̍t ē bô-khì. M̄-koh, i m̄-sī siau-sit khì--ah, i chí-sī khì hō͘ thâu-chêng ê goe̍h-niû cha̍h-tiâu--ah. Chit-khoán hiān-siōng to̍h kiò-chò Thó͘-si̍t, kóng kah chèng-khak leh, che-sī Goe̍h Iám Thó͘-chhiⁿ. Kúi-nā kang chêng, Tē-kiû téng-koân ū chi̍t-tōa-phiàn só͘-chāi, ùi Pì-ló͘, Tāi-se-iûⁿ, kàu I-tà-lī, lóng khòaⁿ-tio̍h chit-ê hiān-siōng. Chit-tiuⁿ chhái-sek siòng-phìⁿ sī bo̍k-chêng ûi-chí siōng chheng-chhó ê sò͘-ūi ha̍p-sêng siòng-phìⁿ, khah àm ê Thó͘-chhiⁿ kah khah kng ê goe̍h-niû chi-kan ê kng àm ū tiông-sin tiâu-chéng kòe. Chit-tiuⁿ siòng-phìⁿ sī hoat-seng iám-chhiⁿ chìn-chêng, tī Se-pan-gâ Ka-thài-liông-nî-a ê Breda hip--ê. Kàu nî-bóe chìn-chêng, ta̍k kò goe̍h lóng ē hoat-seng Goe̍h Iám Thó͘-chhiⁿ. M̄-koh ài khiā tio̍h7 ūi, chiah khòaⁿ-ē-tio̍h chit-ê chi̍t-ba̍k-nih to̍h bô-khì ê hiān-siōng.

[KIP] Gue̍h-niû kā Thóo-tshinn tsia̍h-khì--ah!

Thóo-tshinn nā-sī siau-sit khì ē án-tsuánn? I ū-tang-sî-á khak-si̍t ē bô-khì. M̄-koh, i m̄-sī siau-sit khì--ah, i tsí-sī khì hōo thâu-tsîng ê gue̍h-niû tsa̍h-tiâu--ah. Tsit-khuán hiān-siōng to̍h kiò-tsò Thóo-si̍t, kóng kah tsìng-khak leh, tse-sī Gue̍h Iám Thóo-tshinn. Kuí-nā kang tsîng, Tē-kiû tíng-kuân ū tsi̍t-tuā-phiàn sóo-tsāi, uì Pì-lóo, Tāi-se-iûnn, kàu I-tà-lī, lóng khuànn-tio̍h tsit-ê hiān-siōng. Tsit-tiunn tshái-sik siòng-phìnn sī bo̍k-tsîng uî-tsí siōng tshing-tshó ê sòo-uī ha̍p-sîng siòng-phìnn, khah àm ê Thóo-tshinn kah khah kng ê gue̍h-niû tsi-kan ê kng àm ū tiông-sin tiâu-tsíng kuè. Tsit-tiunn siòng-phìnn sī huat-sing iám-tshinn tsìn-tsîng, tī Se-pan-gâ Ka-thài-liông-nî-a ê Breda hip--ê. Kàu nî-bué tsìn-tsîng, ta̍k kò gue̍h lóng ē huat-sing Gue̍h Iám Thóo-tshinn. M̄-koh ài khiā tio̍h7 uī, tsiah khuànn-ē-tio̍h tsit-ê tsi̍t-ba̍k-nih to̍h bô-khì ê hiān-siōng.

[English] Moon Eclipses Saturn

What if Saturn disappeared? Sometimes, it does. It doesn't really go away, though, it just disappears from view when our Moon moves in front. Such a Saturnian eclipse, more formally called an occultation, was visible along a long swath of Earth -- from Peru, across the Atlantic Ocean, to Italy -- only a few days ago. The featured color image is a digital fusion of the clearest images captured during the event and rebalanced for color and relative brightness between the relatively dim Saturn and the comparatively bright Moon. Saturn and the comparative bright Moon. The exposures were all taken from Breda, Catalonia, Spain, just before occultation. Eclipses of Saturn by our Moon will occur each month for the rest of this year. Each time, though, the fleeting event will be visible only to those with clear skies -- and the right location on Earth.

詞彙學習