內蒙古 天頂 ê 英仙座流星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Perseid Meteors Over Inner Mongolia
• 影片來源：Jeff Dai (TWAN); 音樂：Ibaotu catalog number 771024 (有提著使用權)
• 天頂予你 ê 禮物：你 ê APOD 生日相片是佗一張？ (post 1995)
• 台文翻譯：An-Li Tsai (NSYSU)

[漢羅] 內蒙古 天頂 ê 英仙座流星

你有看著流星無？ 這是 流星雨 時期 逐家上愛問 ê 問題，因為流星是一目𥍉就無去。 這寡飛過天頂 ê 流星是光爍爍。 你若是知影 in 進前 是 其他世界 ê 細粒石頭，可能會予 in 變甲較有價值 毋過 kah 你做伙來 ê 朋友可能袂按呢想。 這支影片 是 kā 2023 年 英仙座流星雨 期間 tī 中國 內蒙古 翕--ê 幾若支短片鉸做伙 ê 影片。 影片拄仔好有翕著幾若粒較光 ê 流星 爍咧爍咧。 今年 2024 年 英仙座流星雨 會閣出現 足濟美麗 ê 流星。 另外一个 有名 ê 流星雨 是 雙生仔座流星雨，伊 tī 12 月中 ê 時陣上強。 今年 12 月中會拄著初一前後，到時若是欲揣流星，較袂去予月光影響著。

[POJ] Lāi-bông-kó͘ thiⁿ-téng ê Eng-sian-chō liû-chhiⁿ

Lí ū khòaⁿ-tio̍h liû-chhiⁿ bô? Che-sī liû-chhiⁿ-hō͘ sî-kî ta̍k-ke siōng-ài mn̄g ê būn-tê, in-ūi liû-chhiⁿ sī chi̍t-ba̍k-nih tō bô-khì. Chit kóa poe-kè thiⁿ-téng ê liû-chhiⁿ sī kng-sih-sih. Lí nā-sī chai-iáⁿ in chìn-chêng sī kî-thaⁿ sè-kài ê sè-lia̍p chio̍h-thâu, khó-lêng ē hō͘-in piàn-kah khah ū kè-ta̍t M̄-koh kah lí chò-hóe lâi ê pêng-iú khó-lêng bē án-ne siūⁿ. Chit-ki iáⁿ-phìⁿ sī kā 2023 nî Eng-sian-chō liû-chhiⁿ-hō͘ kî-kan tī Tiong-kok Lāi-bông-kó͘ hip--ê kúi-ā ki té-phìⁿ ka chò-hóe ê iáⁿ-phìⁿ. Iáⁿ-phìⁿ tú-á-hó ū hip-tio̍h kúi-nā lia̍p khah kng ê liû-chhiⁿ sih-leh sih-leh. Kin-nî 2024 nî Eng-sian-chō liû-chhiⁿ-hō͘ ē koh chhut-hiān chiok chē bí-lē ê liû-chhiⁿ. Lēng-gōa chi̍t-ê ū-miâ ê liû-chhiⁿ-hō͘ sī Siang-siⁿ-á-chō liû-chhiⁿ-hō͘, i tī 12 goe̍h-tiong ê sî-chūn siōng kiông. Kin-nî 12 goe̍h-tiong ē tú-tio̍h chhe-it chêng-āu, kàu-sî nā-sī beh chhōe liû-chhiⁿ, khah bē khì hō͘ goe̍h-kng éng-hióng tio̍h.

[KIP] Lāi-bông-kóo thinn-tíng ê Ing-sian-tsō liû-tshinn

Lí ū khuànn-tio̍h liû-tshinn bô? Tse-sī liû-tshinn-hōo sî-kî ta̍k-ke siōng-ài mn̄g ê būn-tê, in-uī liû-tshinn sī tsi̍t-ba̍k-nih tō bô-khì. Tsit kuá pue-kè thinn-tíng ê liû-tshinn sī kng-sih-sih. Lí nā-sī tsai-iánn in tsìn-tsîng sī kî-thann sè-kài ê sè-lia̍p tsio̍h-thâu, khó-lîng ē hōo-in piàn-kah khah ū kè-ta̍t M̄-koh kah lí tsò-hué lâi ê pîng-iú khó-lîng bē án-ne siūnn. Tsit-ki iánn-phìnn sī kā 2023 nî Ing-sian-tsō liû-tshinn-hōo kî-kan tī Tiong-kok Lāi-bông-kóo hip--ê kuí-ā ki té-phìnn ka tsò-hué ê iánn-phìnn. Iánn-phìnn tú-á-hó ū hip-tio̍h kuí-nā lia̍p khah kng ê liû-tshinn sih-leh sih-leh. Kin-nî 2024 nî Ing-sian-tsō liû-tshinn-hōo ē koh tshut-hiān tsiok tsē bí-lē ê liû-tshinn. Līng-guā tsi̍t-ê ū-miâ ê liû-tshinn-hōo sī Siang-sinn-á-tsō liû-tshinn-hōo, i tī 12 gue̍h-tiong ê sî-tsūn siōng kiông. Kin-nî 12 gue̍h-tiong ē tú-tio̍h tshe-it tsîng-āu, kàu-sî nā-sī beh tshuē liû-tshinn, khah bē khì hōo gue̍h-kng íng-hióng tio̍h.

[English] Perseid Meteors Over Inner Mongolia

Did you see it? One of the more common questions during a meteor shower occurs because the time it takes for a meteor to flash is similar to the time it takes for a head to turn. Possibly, though, the glory of seeing bright meteors shoot across the sky -- while knowing that they were once small pebbles on another world -- might make it all worthwhile, even if your observing partner(s) can't always share in your experience. The featured video is composed of short clips taken in Inner Mongolia, China during the 2023 Perseid Meteor Shower. Several bright meteors were captured while live-reaction audio was being recorded -- just as the meteors flashed. This year's 2024 Perseids also produced many beautiful meteors. Another good meteor shower to watch for is the Geminids which peaks yearly in mid-December, this year with relatively little competing glow from a nearly new Moon.

詞彙學習