土衛二 Enceladus 表面 ê 虎紋

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Fresh Tiger Stripes on Saturn's Enceladus
• 影像來源：NASA, ESA, JPL, SSI, Cassini Imaging Team
• 探索你 ê 宇宙：APOD 亂數產生器
• 台文翻譯：An-Li Tsai (NSYSU)

[漢羅] 土衛二 Enceladus 表面 ê 虎紋

土星 ê 衛星 土衛二 Enceladus ê 地下海洋，是毋是會 ùi 海底山谷 流出來？ 這款去予 叫做 虎紋 ê 長溝仔，kā 冰 ùi 土衛二 Enceladus 冷凍 ê 內部 噴到 太空中，tī 衛星 南極 ê 天頂 形成 冰珠仔雲，這就是神祕 ê 土星環 E 環 ê 來源。 這个證據是 ùi 2004 年 到 2017 年 踅 土星 ê Cassini 機器人太空船 來--ê。 這張相片 是 近距離 飛過 土衛二 Enceladus ê 懸解析度影像。 這張 假色相片 內底 ê 藍色 條紋，就是這个叫做 虎紋 ê 特別紋路。 土衛二 Enceladus 是按怎會遮爾活跳跳，到今猶是一个謎。 伊 ê 厝邊衛星 土衛一 Mimas kah 伊差不多大細，毋過是 死殗殗。 科學家 tùi 噴出來 ê 冰粒 做分析，證據表示講，土衛二 Enceladus 內底有複雜 ê 有機分子。 這款 厚炭素 ê 大分子 會當支持 土衛二 Enceladus 地下 可能 有 性命 ê 假說，毋過猶無法度證明講 伊有。

[POJ] Thó͘-ūi-jī Enceladus piáu-bīn ê Hó͘-bûn

Thó͘-chhiⁿ ê ūi-chhiⁿ Thó͘-ūi-jī Enceladus ê tē-hā hái-iûⁿ, sī-m̄-sī ē ùi hái-té soaⁿ-kok lâu chhut-lâi? Chit-khoán khì hō͘ kiò-chò hó͘-bûn ê tn̂g kau-á, kā peng ùi Thó͘-ūi-jī Enceladus léng-tòng ê lōe-pō͘ phùn kàu thài-khong tiong, tī ūi-chhiⁿ lâm-ke̍k ê thiⁿ-téng hêng-sêng peng-chu-á-hûn, che to̍h-sī sîn-pì ê Thó͘-chhiⁿ-khoân E-khoân ê lâi-goân. Chit-ê chèng-kì sī ùi 2004 nî kàu 2017 nî se̍h Thó͘-chhiⁿ ê Cassini Ke-khì-lâng Thài-khong-chûn lâi--ê. Chit-tiuⁿ siòng-phìⁿ sī kīn kū-lī poe-kòe Thó͘-ūi-jī Enceladus ê koân kái-sek-tō͘ iáⁿ-siōng. Chit-tiuⁿ ká-sek siòng-phìⁿ lāi-té ê nâ-sek tiâu-bûn, to̍h-sī chit-ê kiò-chò hó͘-bûn ê te̍k-pia̍t bûn-lō͘. Thó͘-ūi-jī Enceladus sī-án-chóaⁿ ē chiah-nī oa̍h-thiàu-thiàu, kàu-taⁿ iáu-sī chi̍t-ê bī. I ê chhù-piⁿ ūi-chhiⁿ Thó͘-ūi-it Mimas kah i chha-put-to tōa-sè, m̄-koh sī sí-giān-giān. kho-ha̍k-ka tùi phùn chhut-lâi ê peng-lia̍p chò hun-sek, chèng-kì piáu-sī kóng, Thó͘-ūi-jī Enceladus lāi-té ū ho̍k-cha̍p ê iú-ki hun-chú. Chit-khoán kāu thòaⁿ-sò͘ ê tōa hun-chú ē-tàng chi-chhî Thó͘-ūi-jī Enceladus tē-hā khó-lêng ū sìⁿ-miā ê ká-soat, m̄-koh iáu bô-hoat-tō͘ chèng-bêng kóng i ū.

[KIP] Thóo-uī-jī Enceladus piáu-bīn ê Hóo-bûn

Thóo-tshinn ê uī-tshinn Thóo-uī-jī Enceladus ê tē-hā hái-iûnn, sī-m̄-sī ē uì hái-té suann-kok lâu tshut-lâi? Tsit-khuán khì hōo kiò-tsò hóo-bûn ê tn̂g kau-á, kā ping uì Thóo-uī-jī Enceladus líng-tòng ê luē-pōo phùn kàu thài-khong tiong, tī uī-tshinn lâm-ki̍k ê thinn-tíng hîng-sîng ping-tsu-á-hûn, tse to̍h-sī sîn-pì ê Thóo-tshinn-khuân E-khuân ê lâi-guân. Tsit-ê tsìng-kì sī uì 2004 nî kàu 2017 nî se̍h Thóo-tshinn ê Cassini Ke-khì-lâng Thài-khong-tsûn lâi--ê. Tsit-tiunn siòng-phìnn sī kīn kū-lī pue-kuè Thóo-uī-jī Enceladus ê kuân kái-sik-tōo iánn-siōng. Tsit-tiunn ká-sik siòng-phìnn lāi-té ê nâ-sik tiâu-bûn, to̍h-sī tsit-ê kiò-tsò hóo-bûn ê ti̍k-pia̍t bûn-lōo. Thóo-uī-jī Enceladus sī-án-tsuánn ē tsiah-nī ua̍h-thiàu-thiàu, kàu-tann iáu-sī tsi̍t-ê bī. I ê tshù-pinn uī-tshinn Thóo-uī-it Mimas kah i tsha-put-to tuā-sè, m̄-koh sī sí-giān-giān. kho-ha̍k-ka tuì phùn tshut-lâi ê ping-lia̍p tsò hun-sik, tsìng-kì piáu-sī kóng, Thóo-uī-jī Enceladus lāi-té ū ho̍k-tsa̍p ê iú-ki hun-tsú. Tsit-khuán kāu thuànn-sòo ê tuā hun-tsú ē-tàng tsi-tshî Thóo-uī-jī Enceladus tē-hā khó-lîng ū sìnn-miā ê ká-suat, m̄-koh iáu bô-huat-tōo tsìng-bîng kóng i ū.

[English] Fresh Tiger Stripes on Saturn's Enceladus

Do underground oceans vent through canyons on Saturn's moon Enceladus? Long features dubbed tiger stripes are known to be spewing ice from the moon's icy interior into space, creating a cloud of fine ice particles over the moon's South Pole and creating Saturn's mysterious E-ring. Evidence for this has come from the robot Cassini spacecraft that orbited Saturn from 2004 to 2017. Pictured here, a high resolution image of Enceladus is shown from a close flyby. The unusual surface features dubbed tiger stripes are visible in false-color blue. Why Enceladus is active remains a mystery, as the neighboring moon Mimas, approximately the same size, appears quite dead. An analysis of ejected ice grains has yielded evidence that complex organic molecules exist inside Enceladus. These large carbon-rich molecules bolster -- but do not prove -- that oceans under Enceladus' surface could contain life.

詞彙學習