超新星殘骸 CTA 1

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Supernova Remnant CTA 1
• 影像來源 kah 版權：Thomas Lelu
• 台文翻譯：An-Li Tsai (NSYSU)

[漢羅] 超新星殘骸 CTA 1

CTA 1 內底有一粒 恬 chih-chih ê 脈動星。 超新星殘骸 是 天文學家 tī 1960 年 ê 時陣，tī 無線電波 發現 ê 發射源，了後才知影伊是 大質量恆星 死亡爆炸 ê 階段。 毋過科學家無 tī 無線電波波段 揣著 這粒 脈動星。 脈動星就是大質量恆星 核心崩塌 留落來 ê 殘骸，是一粒 會自旋 ê 中子星。 超新星爆炸拄開始 1 萬年 ê 時陣，星際屑仔雲 tī 光學波段 是 足暗--ê。 這張 深空望遠鏡影像 是 tī 仙王座 北爿翕--ê。 這个星場有 2 度闊，咱會當 tī 可見光波段 看著 CTA 1 咧脹大 ê 衝擊波前。 雖罔講科學家無揣著 無線電波 ê 脈動星，毋過 Fermi Gamma-光 太空望遠鏡 tī 2008 年 量著 CTA 1 ê 脈動輻射，證明講這个 超新星殘骸 內底 確實有一粒 咧 自旋 ê 中子星。 這个發射源去予人認為是 一大陣 脈動星 ê 頭一粒。 這寡脈動星 tī 無線電波波段 是 恬 chih-chih，毋過 tī 高能 ê gamma 光 量著--ê，是活跳跳。

[POJ] Chhiau-sin-seng Chân-hâi CTA 1

CTA 1 lāi-té ū chi̍t-lia̍p tiām-chih-chih ê me̍h-tōng-chhiⁿ. Chhiau-sin-seng chân-hâi sī thian-bûn ha̍k-ka tī 1960 nî ê sî-chūn, tī bô-sòaⁿ tiān-pho hoat-hiān ê hoat-siā-goân, liáu-āu chiah chai-iáⁿ i sī tōa chit-liōng hêng-chhiⁿ sí-bông po̍k-chà ê kai-tōaⁿ. M̄-koh kho-ha̍k-ka bô tī bô-sòaⁿ-tiān-pho pho-tōaⁿ chhōe-tio̍h chit lia̍p me̍h-tōng-chhiⁿ. Me̍h-tōng-chhiⁿ to̍h-sī tōa chit-liōng hêng-chhiⁿ he̍k-sim pang-la̍p lâu--lo̍h-lâi ê chân-hâi, sī chi̍t-lia̍p ē chū-soân ê tiong-chú-chhiⁿ. Chhiau-sin-seng po̍k-chà tú-khai-sí 1 bān-nî ê sî-chūn, seng-chè sap-á-hûn tī kng-ha̍k pho-tōaⁿ sī chiok àm--ê. Chit-tiuⁿ chhim-khong bōng-oán-kiàⁿ iáⁿ-siōng sī tī Sian-ông-chō pak-pêng hip--ê. Chit-ê seng-tiûⁿ ū 2 tō͘ khoah, lán ē-tàng tī khó-kiàn-kng pho-tōaⁿ khòaⁿ-tio̍h CTA 1 leh tiùⁿ-tōa ê chhiong-kek pho-chiân. Sui-bóng kóng kho-ha̍k-ka bô chhōe-tio̍h bô-sòaⁿ tiān-pho ê me̍h-tōng-chhiⁿ, m̄-koh Fermi Gamma kng Thài-khong Bōng-oán-kiàⁿ tī 2008 nî niû-tio̍h CTA 1 ê me̍h-tōng hok-siā, chèng-bêng kóng chit-ê chhiau-sin-seng chân-hâi lāi-té khak-si̍t ū chi̍t-lia̍p leh chū-soân ê tiong-chú-chhiⁿ. Chit-ê hoat-siā-goân khì hō͘ lâng jīn-ûi sī chi̍t-tōa-tīn me̍h-tōng-chhiⁿ ê thâu chi̍t-lia̍p. Chit kóa me̍h-tōng-chhiⁿ tī bô-sòaⁿ tiān-pho pho-tōaⁿ sī tiām-chih-chih, m̄-koh tī ko-lêng ê gamma kng niû-tio̍h--ê, sī oa̍h-thiàu-thiàu.

[KIP] Tshiau-sin-sing Tsân-hâi CTA 1

CTA 1 lāi-té ū tsi̍t-lia̍p tiām-tsih-tsih ê me̍h-tōng-tshinn. Tshiau-sin-sing tsân-hâi sī thian-bûn ha̍k-ka tī 1960 nî ê sî-tsūn, tī bô-suànn tiān-pho huat-hiān ê huat-siā-guân, liáu-āu tsiah tsai-iánn i sī tuā tsit-liōng hîng-tshinn sí-bông po̍k-tsà ê kai-tuānn. M̄-koh kho-ha̍k-ka bô tī bô-suànn-tiān-pho pho-tuānn tshuē-tio̍h tsit lia̍p me̍h-tōng-tshinn. Me̍h-tōng-tshinn to̍h-sī tuā tsit-liōng hîng-tshinn hi̍k-sim pang-la̍p lâu--lo̍h-lâi ê tsân-hâi, sī tsi̍t-lia̍p ē tsū-suân ê tiong-tsú-tshinn. Tshiau-sin-sing po̍k-tsà tú-khai-sí 1 bān-nî ê sî-tsūn, sing-tsè sap-á-hûn tī kng-ha̍k pho-tuānn sī tsiok àm--ê. Tsit-tiunn tshim-khong bōng-uán-kiànn iánn-siōng sī tī Sian-ông-tsō pak-pîng hip--ê. Tsit-ê sing-tiûnn ū 2 tōo khuah, lán ē-tàng tī khó-kiàn-kng pho-tuānn khuànn-tio̍h CTA 1 leh tiùnn-tuā ê tshiong-kik pho-tsiân. Sui-bóng kóng kho-ha̍k-ka bô tshuē-tio̍h bô-suànn tiān-pho ê me̍h-tōng-tshinn, m̄-koh Fermi Gamma kng Thài-khong Bōng-uán-kiànn tī 2008 nî niû-tio̍h CTA 1 ê me̍h-tōng hok-siā, tsìng-bîng kóng tsit-ê tshiau-sin-sing tsân-hâi lāi-té khak-si̍t ū tsi̍t-lia̍p leh tsū-suân ê tiong-tsú-tshinn. Tsit-ê huat-siā-guân khì hōo lâng jīn-uî sī tsi̍t-tuā-tīn me̍h-tōng-tshinn ê thâu tsi̍t-lia̍p. Tsit kuá me̍h-tōng-tshinn tī bô-suànn tiān-pho pho-tuānn sī tiām-tsih-tsih, m̄-koh tī ko-lîng ê gamma kng niû-tio̍h--ê, sī ua̍h-thiàu-thiàu.

[English] Supernova Remnant CTA 1

There is a quiet pulsar at the heart of CTA 1. The supernova remnant was discovered as a source of emission at radio wavelengths by astronomers in 1960 and since identified as the result of the death explosion of a massive star. But no radio pulses were detected from the expected pulsar, the rotating neutron star remnant of the massive star's collapsed core. Seen about 10,000 years after the initial supernova explosion, the interstellar debris cloud is faint at optical wavelengths. CTA 1's visible wavelength emission from still expanding shock fronts is revealed in this deep telescopic image, a frame that spans about 2 degrees across a starfield in the northern constellation of Cepheus. While no pulsar has since been found at radio wavelengths, in 2008 the Fermi Gamma-ray Space Telescope detected pulsed emission from CTA 1, identifying the supernova remnant's rotating neutron star. The source has been recognized as the first in a growing class of pulsars that are quiet at radio wavelengths but pulse in high-energy gamma-rays.

詞彙學習