希臘 Poseidon 海神廟 天頂 ê 超級月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Supermoon Beyond the Temple of Poseidon
• 影像來源 kah 版權：Alexandros Maragos
• 台文翻譯：An-Li Tsai (NSYSU)

[漢羅] 希臘 Poseidon 海神廟 天頂 ê 超級月娘

Chăng 有超級月娘。 Eng 暗 ê 月娘嘛予人印象足深--ê。 超級月娘 看起來比平常時 ê 月圓 較大 嘛 較光，這是因為 in 較倚地球，贏過 90 葩 ê 月圓。 這擺 ê 超級月娘 拄仔好拄著 藍月。 藍月 毋是 藍色--ê，伊 ê 定義 是 一季內底 4 擺月圓 ê 第 3 擺。 藍月 ê 另外一款定義是一個月 內底 ê 第 2 擺月圓。 這張相片 是 chăng 暗 tī 希臘 翕--ê。 超級藍月 才拄 peh 到 Poseidon 海神廟 後壁，而且是伊看起來上大粒 ê 時陣。 這擺 ê 超級月娘 足特別--ê，因為伊是 4 个連紲出現 ê 超級月娘 ê 頭一个。 紲落來 3 个超級月娘 會出現 tī 9 月，10 月，kah 11 月。

[POJ] Hi-la̍h Poseidon Hái-sîn-biō thiⁿ-téng ê Chhiau-kip goe̍h-niû

Cha̋ng ū chhiau-kip goe̍h-niû. Eng-àm ê goe̍h-niû mā hō͘ lâng ìn-siōng chiok chhim--ê. Chhiau-kip goe̍h-niû khòaⁿ--khí-lâi pí pêng-siông-sî ê goe̍h-îⁿ khah tōa mā khah kng, che-sī in-ūi in khah óa Tē-kiû, iâⁿ-kòe 90 pha ê goe̍h-îⁿ. Chit pái ê chhiau-kip goe̍h-niû tú-á-hó tú-tio̍h Nâ-goe̍h. Nâ-goe̍h m̄-sī nâ-sek--ê, i ê tēng-gī sī chi̍t kùi lāi-té 4 pái goe̍h-îⁿ ê tē 3 pái. Nâ-goe̍h ê lēng-gōa chi̍t-khoán tēng-gī sī chi̍t kò goe̍h lāi-té ê tē 2 pái goe̍h-îⁿ. Chit-tiuⁿ siòng-phìⁿ sī cha̋ng àm tī Hi-la̍h hip--ê. Chhiau-kip Nâ-goe̍h chiah tú peh kàu Poseidon Hái-sîn-biō āu-piah, jî-chhiáⁿ sī i khòaⁿ--khí-lâi siōng tōa-lia̍p ê sî-chūn. Chit pái ê chhiau-kip goe̍h-niû chiok te̍k-pia̍t--ê, in-ūi i sī 4 ê liân-sòa chhut-hiān ê chhiau-kip goe̍h-niû ê thâu-chi̍t-ê. Sòa--lo̍h-lâi 3 ê chhiau-kip goe̍h-niû ē chhut-hiān tī 9 goe̍h, 10 goe̍h, kah 11 goe̍h.

[KIP] Hi-la̍h Poseidon Hái-sîn-biō thinn-tíng ê Tshiau-kip gue̍h-niû

Tsa̋ng ū tshiau-kip gue̍h-niû. Ing-àm ê gue̍h-niû mā hōo lâng ìn-siōng tsiok tshim--ê. Tshiau-kip gue̍h-niû khuànn--khí-lâi pí pîng-siông-sî ê gue̍h-înn khah tuā mā khah kng, tse-sī in-uī in khah uá Tē-kiû, iânn-kuè 90 pha ê gue̍h-înn. Tsit pái ê tshiau-kip gue̍h-niû tú-á-hó tú-tio̍h Nâ-gue̍h. Nâ-gue̍h m̄-sī nâ-sik--ê, i ê tīng-gī sī tsi̍t kuì lāi-té 4 pái gue̍h-înn ê tē 3 pái. Nâ-gue̍h ê līng-guā tsi̍t-khuán tīng-gī sī tsi̍t kò gue̍h lāi-té ê tē 2 pái gue̍h-înn. Tsit-tiunn siòng-phìnn sī tsa̋ng àm tī Hi-la̍h hip--ê. Tshiau-kip Nâ-gue̍h tsiah tú peh kàu Poseidon Hái-sîn-biō āu-piah, jî-tshiánn sī i khuànn--khí-lâi siōng tuā-lia̍p ê sî-tsūn. Tsit pái ê tshiau-kip gue̍h-niû tsiok ti̍k-pia̍t--ê, in-uī i sī 4 ê liân-suà tshut-hiān ê tshiau-kip gue̍h-niû ê thâu-tsi̍t-ê. Suà--lo̍h-lâi 3 ê tshiau-kip gue̍h-niû ē tshut-hiān tī 9 gue̍h, 10 gue̍h, kah 11 gue̍h.

[English] Supermoon Beyond the Temple of Poseidon

A supermoon occurred yesterday. And tonight's moon should also look impressive. Supermoons appear slightly larger and brighter than most full moons because they reach their full phase when slightly nearer to the Earth -- closer than 90 percent of all full moons. This supermoon was also a blue moon given the definition that it is the third of four full moons occurring during a single season. Blue moons are not usually blue, and a different definition holds that a blue moon is the second full moon that occurs during a single month. The featured image captured the blue supermoon right near its peak size yesterday as it was rising beyond the Temple of Poseidon in Greece. This supermoon is particularly unusual in that it is the first of four successive supermoons, the next three occurring in September, October, and November.

詞彙學習