突尼西亞 天頂 ê 銀河

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Milky Way Over Tunisia
• 影像來源 kah 版權：Makrem Larnaout
• 台文翻譯：An-Li Tsai (NSYSU)

[漢羅] 突尼西亞 天頂 ê 銀河

這暗 無月娘。 前景是 突尼西亞 ê Lars 地下田庄 ê 出入口。 天頂彼个毋是普通 ê 星系，是咱 銀河系 ê 中央帶。 而且天頂彼逝嘛毋是普通 ê 流星，伊是金光閃閃 ê 火流星，可能是 ùi 舊年 ê 英仙座流星雨 來--ê。 這張合成影像 是用 仝一台 kha-mé-lah tī 仝一位連紲感光翕--ê。 今年 ê 英仙座流星雨 上強彼工 是 這禮拜六。 等 頂半月 落去了後，差不多半暝彼陣，應該就會拄著。 為著欲 好好仔觀賞 流星雨，你需要一个好天暗暝、好坐 ê 椅仔、kah 耐心。

[POJ] Tu̍t-nî-se-a thiⁿ-téng ê Gîn-hô

Chit àm bô goe̍h-niû. Chiân-kéng sī Tu̍t-nî-se-a ê Lars Tē-hā-chhân-chng ê chhut-ji̍p-kháu. Thiⁿ-téng hit-ê m̄-sī phó͘-thong ê seng-hē, sī lán Gîn-hô-hē ê tiong-ng-tòa. Jî-chhiáⁿ thiⁿ-téng hit chōa mā m̄-sī phó͘-thong ê liû-chhiⁿ, i sī kim-kong-siám-siám ê hóe-liû-chhiⁿ, khó-lêng sī ùi kū-nî ê Eng-sian-chō liû-chhiⁿ-hō͘ lâi--ê. Chit-tiuⁿ ha̍p-sêng iáⁿ-siōng sī iōng kāng chi̍t tâi kha-mé-lah tī kāng chi̍t ūi liân-sòa kám-kng hip--ê. Kin-nî ê Eng-sian-chō liû-chhiⁿ-hō͘ siōng kiông hit-kang sī chit lé-pài-la̍k. Tán téng-pòaⁿ-goe̍h lo̍h-khì liáu-āu, chha-put-to pòaⁿ-mê hit-chūn, èng-kai to̍h ē tú-tio̍h. Ūi tio̍h beh hó-hó-á koan-sióng liû-chhiⁿ-hō͘, lí su-iàu chi̍t-ê hó-thiⁿ àm-mê, hó chē ê í-á, kah nāi-sim.

[KIP] Tu̍t-nî-se-a thinn-tíng ê Gîn-hô

Tsit àm bô gue̍h-niû. Tsiân-kíng sī Tu̍t-nî-se-a ê Lars Tē-hā-tshân-tsng ê tshut-ji̍p-kháu. Thinn-tíng hit-ê m̄-sī phóo-thong ê sing-hē, sī lán Gîn-hô-hē ê tiong-ng-tuà. Jî-tshiánn thinn-tíng hit tsuā mā m̄-sī phóo-thong ê liû-tshinn, i sī kim-kong-siám-siám ê hué-liû-tshinn, khó-lîng sī uì kū-nî ê Ing-sian-tsō liû-tshinn-hōo lâi--ê. Tsit-tiunn ha̍p-sîng iánn-siōng sī iōng kāng tsi̍t tâi kha-mé-lah tī kāng tsi̍t uī liân-suà kám-kng hip--ê. Kin-nî ê Ing-sian-tsō liû-tshinn-hōo siōng kiông hit-kang sī tsit lé-pài-la̍k. Tán tíng-puànn-gue̍h lo̍h-khì liáu-āu, tsha-put-to puànn-mê hit-tsūn, ìng-kai to̍h ē tú-tio̍h. Uī tio̍h beh hó-hó-á kuan-sióng liû-tshinn-hōo, lí su-iàu tsi̍t-ê hó-thinn àm-mê, hó tsē ê í-á, kah nāi-sim.

[English] Milky Way Over Tunisia

That's no moon. On the ground, that's the Lars Homestead in Tunisia. And that's not just any galaxy. That's the central band of our own Milky Way galaxy. Last, that's not just any meteor. It is a bright fireball likely from last year's Perseids meteor shower. The featured image composite combines consecutive exposures taken by the same camera from the same location. This year's Perseids peak during the coming weekend is expected to show the most meteors after the first quarter moon sets, near midnight. To best experience a meteor shower, you should have clear and dark skies, a comfortable seat, and patience.

詞彙學習