Gaia 任務：太陽來矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Gaia: Here Comes the Sun
• 影片來源：Galaxy Illustration: N. Risinger (skysurvey.org); 恆星資料：Gaia Mission, ESA, A. S. Sellés (U. Heidelberg) et al.
• 台文翻譯：An-Li Tsai (NSYSU)

[漢羅] Gaia 任務：太陽來矣！

Ùi 銀河系外口轉來 ê 景色會生做按怎？ 歐洲太空總署 ESA ê Gaia 機器人任務 本底是欲回答一个 閣較大 ê 問題，毋過 in 提著 ê 資料會當用 獨立特別 ê 現代觀點 來回答這个問題。 Gaia 是 tī 地球 附近 踅 太陽 咧行 ê 太空船。 伊詳細紀錄恆星 ê 位置，按呢才有法度確定 恆星 ê 位置 tī 一冬內 ê 微小變化。 而且 恆星愈遠，這款變化就愈細，所以咱會當用這來 量恆星 ê 距離。 影片 上開始是 銀河系 ê 插圖，連鞭就 變做 Gaia 恆星資料 ê 3D 視覺化影像。 一寡有名 ê 恆星攏有 in 家己 ê 名，其他恆星就干焦賰 Gaia 目錄 ê 編號。 落尾，影片來到太陽附近，遮有足濟恆星攏是 Gaia 追蹤 ê 目標。 紲落來就來到咱 ê 太陽 矣。 影片欲煞進前，咱會當看著太陽系第 3 粒行星，地球，變甲愈來愈清楚。

[POJ] Gaia jīm-bū: Thài-iông lâi--ah!

Ùi Gîn-hô-hē gōa-kháu tńg--lâi ê kéng-sek ē seⁿ-chò án-nóa? Au-chiu Thài-khong Chóng-sú ESA ê Gaia Ki-khì-lâng jīm-bū pún-té sī beh hôe-tap chi̍t-ê koh-khah tōa ê būn-tê, m̄-koh in the̍h-tio̍h ê chu-liāu ē-tàng iōng to̍k-li̍p te̍k-pa̍t ê hiān-tāi koan-tiám lâi hôe-tap chit-ê būn-tê. Gaia sī tī Tē-kiû hù-kīn se̍h Thài-iông leh kiâⁿ ê thài-khong-chûn. I siông-sè kì-lo̍k hêng-chhiⁿ ê ūi-tì, án-ne chiah ū-hoat-tō͘ khak-tēng hêng-chhiⁿ ê ūi-tì tī chi̍t tang lāi ê bî-sió piàn-hòa. Jî-chhiáⁿ hêng-chhiⁿ jú hn̄g, chit-khoán piàn-hòa tō jú sè, só͘-í lán ē-tàng iōng che lâi niû hêng-chhiⁿ ê kū-lî. Iáⁿ-phìⁿ siōng khai-sí sī Gîn-hô-hē ê chhah-tô͘, liâm-mi to̍h piàn-chò Gaia hêng-chhiⁿ chu-liāu ê 3D sī-kak-hòa iáⁿ-siōng. Chi̍t-kóa ū-miâ ê hêng-chhiⁿ lóng-ū in ka-kī ê miâ, kî-thaⁿ hêng-chhiⁿ to̍h kan-na chhun Gaia bo̍k-lio̍k ê pian-hō. Lo̍h-bóe, iáⁿ-phìⁿ lâi-kàu Thài-iông hù-kīn, chia ū chiok chē hêng-chhiⁿ lóng sī Gaia tui-chong ê bo̍k-piau. Sòa--lo̍h-lâi to̍h lâi-kàu lán ê Thài-iông--ah. Iáⁿ-phìⁿ beh soah chìn-chêng, lán ē-tàng khòaⁿ-tio̍h Thài-iông-hē tē 3 lia̍p kiâⁿ-chhiⁿ, Tē-kiû, piàn-kah lú-lâi-lú chheng-chhó.

[KIP] Gaia jīm-bū: Thài-iông lâi--ah!

Uì Gîn-hô-hē guā-kháu tńg--lâi ê kíng-sik ē senn-tsò án-nuá? Au-tsiu Thài-khong Tsóng-sú ESA ê Gaia Ki-khì-lâng jīm-bū pún-té sī beh huê-tap tsi̍t-ê koh-khah tuā ê būn-tê, m̄-koh in the̍h-tio̍h ê tsu-liāu ē-tàng iōng to̍k-li̍p ti̍k-pa̍t ê hiān-tāi kuan-tiám lâi huê-tap tsit-ê būn-tê. Gaia sī tī Tē-kiû hù-kīn se̍h Thài-iông leh kiânn ê thài-khong-tsûn. I siông-sè kì-lo̍k hîng-tshinn ê uī-tì, án-ne tsiah ū-huat-tōo khak-tīng hîng-tshinn ê uī-tì tī tsi̍t tang lāi ê bî-sió piàn-huà. Jî-tshiánn hîng-tshinn jú hn̄g, tsit-khuán piàn-huà tō jú sè, sóo-í lán ē-tàng iōng tse lâi niû hîng-tshinn ê kū-lî. Iánn-phìnn siōng khai-sí sī Gîn-hô-hē ê tshah-tôo, liâm-mi to̍h piàn-tsò Gaia hîng-tshinn tsu-liāu ê 3D sī-kak-huà iánn-siōng. Tsi̍t-kuá ū-miâ ê hîng-tshinn lóng-ū in ka-kī ê miâ, kî-thann hîng-tshinn to̍h kan-na tshun Gaia bo̍k-lio̍k ê pian-hō. Lo̍h-bué, iánn-phìnn lâi-kàu Thài-iông hù-kīn, tsia ū tsiok tsē hîng-tshinn lóng sī Gaia tui-tsong ê bo̍k-piau. Suà--lo̍h-lâi to̍h lâi-kàu lán ê Thài-iông--ah. Iánn-phìnn beh suah tsìn-tsîng, lán ē-tàng khuànn-tio̍h Thài-iông-hē tē 3 lia̍p kiânn-tshinn, Tē-kiû, piàn-kah lú-lâi-lú tshing-tshó.

[English] Gaia: Here Comes the Sun

What would it look like to return home from outside our galaxy? Although designed to answer greater questions, data from ESA's robotic Gaia mission is helping to provide a uniquely modern perspective on humanity's place in the universe. Gaia orbits the Sun near the Earth and resolves stars' positions so precisely that it can determine a slight shift from its changing vantage point over the course of a year, a shift that is proportionately smaller for more distant stars -- and so determines distance. In the first sequence of the video, an illustration of the Milky Way is shown that soon resolves into a three-dimensional visualization of Gaia star data. A few notable stars are labelled with their common names, while others stars are labelled with numbers from a Gaia catalog. Eventually, the viewer arrives in our stellar neighborhood where many stars were tracked by Gaia, and soon at our home star Sol, the Sun. At the video's end, the reflective glow of Sol's third planet becomes visible: Earth.

詞彙學習