觀音圈 kah 霧虹

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Glory and Fog Bow
• 影像影片來源 kah 版權：Cem Özkeser and Yasin İlcebay
• 台文翻譯：An-Li Tsai (NSYSU)

[漢羅] 觀音圈 kah 霧虹

六月底 ê 時陣，有一个 tī 土耳其 Bursa 省 騎 o͘-tó͘-bái 欲去 Uludağ 山 ê 人，發現 in 家己 行 tī 低雲 kah 雲霧頂懸。 大粒日頭 就 tī in 後壁，山 ê 另外一爿 是 美麗 ê 大氣 觀音圈 kah 霧虹。 一寡人 kā 叫做 聖光 抑是 Brocken 幽靈。 這有當時仔嘛會當 ùi 飛龍機 抑是 大樓 內底 看著。 伊看起來就親像是 一个較光 ê 圓箍仔 kā 較烏 ê 巨人 箍 tī 內底。 是講，烏暗巨人其實是 觀測者 tī 日頭 對面留落來 ê 烏影。 咱來看這支 90 MB ê 影片 就知。 雲 kah 霧 是 足細粒 ê 水珠仔組成--ê，比雨水 閣較細粒。 In 會坳射、反射日光，產生這款 彩色 日箍 kah 闊幅 ê 霧虹。

[POJ] Koan-im-khoan kah Bū-khēng

La̍k goe̍h-té ê sî-chūn, ū chi̍t-ê tī Thó͘-ní-kî Bursa séng khiâ o͘-tó͘-bái beh khì Uludağ soaⁿ ê lâng, hoat-hiān in ka-kī kiâⁿ tī kē-hûn kah hûn-bū téng-koân. Tōa-lia̍p ji̍t-thâu to̍h tī in āu-piah, soaⁿ ê lēng-gōa chi̍t-pêng sī bí-lē ê tāi-khì Koan-im-khoan kah Bū-khēng. Chi̍t kóa lâng kā kiò-chò sèng-kng ia̍h-sī Brocken iu-lêng. Che ū-tang-sî-á mā ē-tàng ùi poe-lêng-ki ia̍h-sī tōa-lâu lāi-té khòaⁿ--tio̍h. I khòaⁿ--khí-lâi to̍h chhin-chhiūⁿ sī chi̍t-ê khah kng ê îⁿ-kho͘-á kā khah o͘ ê kū-jîn kho͘ tī lāi-té. Sī-kóng, o͘-àm kū-jîn kî-si̍t sī koan-chhek-chiá tī ji̍t-thâu tùi-bīn lâu--lo̍h-lâi ê o͘-iáⁿ. Lán lâi-khòaⁿ chit-ki 90 MB ê iáⁿ-phìⁿ to̍h chai. Hûn kah bū sī chiok sè-lia̍p ê chúi-chu-á cho͘-sêng--ê, pí hō͘-chúi koh-khah sè-lia̍p. In ē au-siā, hoán-siā ji̍t-kng, sán-seng chit-khoán chhái-sek ji̍t-kho͘ kah khoah-pak ê bū-khēng.

[KIP] Kuan-im-khuan kah Bū-khīng

La̍k gue̍h-té ê sî-tsūn, ū tsi̍t-ê tī Thóo-ní-kî Bursa síng khiâ oo-tóo-bái beh khì Uludağ suann ê lâng, huat-hiān in ka-kī kiânn tī kē-hûn kah hûn-bū tíng-kuân. Tuā-lia̍p ji̍t-thâu to̍h tī in āu-piah, suann ê līng-guā tsi̍t-pîng sī bí-lē ê tāi-khì Kuan-im-khuan kah Bū-khīng. Tsi̍t kuá lâng kā kiò-tsò sìng-kng ia̍h-sī Brocken iu-lîng. Tse ū-tang-sî-á mā ē-tàng uì pue-lîng-ki ia̍h-sī tuā-lâu lāi-té khuànn--tio̍h. I khuànn--khí-lâi to̍h tshin-tshiūnn sī tsi̍t-ê khah kng ê înn-khoo-á kā khah oo ê kū-jîn khoo tī lāi-té. Sī-kóng, oo-àm kū-jîn kî-si̍t sī kuan-tshik-tsiá tī ji̍t-thâu tuì-bīn lâu--lo̍h-lâi ê oo-iánn. Lán lâi-khuànn tsit-ki 90 MB ê iánn-phìnn to̍h tsai. Hûn kah bū sī tsiok sè-lia̍p ê tsuí-tsu-á tsoo-sîng--ê, pí hōo-tsuí koh-khah sè-lia̍p. In ē au-siā, huán-siā ji̍t-kng, sán-sing tsit-khuán tshái-sik ji̍t-khoo kah khuah-pak ê bū-khīng.

[English] Glory and Fog Bow

On a road trip up Mount Uludağ in Bursa province, Turkey these motorcyclists found themselves above low clouds and fog in late June. With the bright Sun directly behind them, the view down the side of the great mountain revealed a beautiful, atmospheric glory and fog bow. Known to some as the heiligenschein or the Specter of the Brocken, a glory can also sometimes be seen from airplanes or even high buildings. It often appears to be a dark giant surrounded by a bright halo. Of course the dark giant is just the shadow of the observer (90MB video) cast opposite the Sun. The clouds and fog are composed of very small water droplets, smaller than rain drops, that refract and reflect sunlight to create the glory's colorful halo and this more extensive fog bow.

詞彙學習