Kunetice 城堡 天頂 ê Olbers 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Olbers over Kunetice Castle
• 影像來源 kah 版權：Petr Horálek / Institute of Physics in Opava
• 台文翻譯：An-Li Tsai (NSYSU)

[漢羅] Kunetice 城堡 天頂 ê Olbers 彗星

彗星 13P/Olbers 每 70 冬 來到 內太陽系 一擺。 伊 tī 6 月30 行到 近日點，就是 kah 太陽上倚 ê 位置。 這張相片翕--ê 是 tī 熱天暗暝 出現 tī 捷克共和國 歷史久長 ê Kunetice 城堡 天頂 ê 哈雷型彗星。 伊這馬欲 轉去 伊 ê 故鄉 Oort 雲 矣。 這張是 7 月 28 紀錄彗星軌跡 ê 合成相片。 咱看會著彗星 ê 闊幅塗粉尾溜、光爍爍 ê 彗鬚、長長 ê 離子尾溜、kah 前景 ê 景色。 這粒彗星 tī 城堡後壁 16 光分遠 ê 所在，背景是北天 ê 天星，彗星就出現 tī 大熊座 下底。 這个山頂城堡 ê 歷史 ùi 15 世紀開始，毋過 彗星是 Heinrich Olbers tī 1815 年發現--ê。 Olbers 彗星 tī 日頭落山了後出現 tī 地球天頂 ê 西北爿，是觀星者 用 天文望遠鏡 kah 雙筒千里鏡 觀測彗星 上好 ê 時機。 彗星 13P Olbers ê 後一擺 行到 近日點，愛等到 2094 年。

[POJ] Kunetice siâⁿ-pó thiⁿ-téng ê Olbers Hūi-chhiⁿ

Hūi-chhiⁿ 13P/Olbers múi 70 tang lâi-kàu Lōe Thài-iông-hē chi̍t-pái. I tī 6 goe̍h 30 kiâⁿ kàu kīn-ji̍t-tiám, to̍h-sī kah Thài-iông siōng óa ê ūi-tì. Chit-tiuⁿ siòng-phìⁿ hip--ê sī tī loa̍h-thiⁿ àm-mî chhut-hiān tī Chia̍p-khek kiōng-hô-kok le̍k-sú kú-tn̂g ê Kunetice siâⁿ-pó thiⁿ-téng ê Ha-lûi-hêng Hūi-chhiⁿ. I chit-má beh tńg-khì i ê kò͘-hiong Oort hûn ah. Chit-tiuⁿ sī 7 goe̍h 28 kì-lo̍k hūi-chhiⁿ khúi-jiah ê ha̍p-sêng siòng-phìⁿ. Lán khòaⁿ-ē-tio̍h hūi-chhiⁿ ê khoah-pak thô͘-hún bóe-liu, kng-sih-sih ê hūi-chhiu, tn̂g-tn̂g ê lī-chú bóe-liu, kah chiân-kéng ê kéng-sek. Chit lia̍p hūi-chhiⁿ tī siâⁿ-pó āu-piah 16 kng-hun hn̄g ê só͘-chāi, pōe-kéng sī pak-thian ê thiⁿ-chhiⁿ, hūi-chhiⁿ to̍h chhut-hiān tī Tōa-hîm-chō ē-té. Chit-ê soaⁿ-téng siâⁿ-pó ê le̍k-sú ùi 15 sè-kí khai-sí, m̄-koh hūi-chhiⁿ sī Heinrich Olbers tī 1815 nî hoat-hiān--ê. Olbers hūi-chhiⁿ tī ji̍t-thâu lo̍h-soaⁿ liáu-āu chhut-hiān tī Tē-kiû thiⁿ-téng ê sai-pak-pêng, sī koan-seng-chiá iōng thian-bûn bōng-oán-kiàⁿ kah siang-tâng chhian-lí-kiàⁿ koan-chhek hūi-chhiⁿ siōng-hó ê sî-ki. Hūi-chhiⁿ 13P Olbers ê āu-chi̍t-pái kiâⁿ kàu kīn-ji̍t-tiám, ài tán kàu 2094 nî.

[KIP] Kunetice siânn-pó thinn-tíng ê Olbers Huī-tshinn

Huī-tshinn 13P/Olbers muí 70 tang lâi-kàu Luē Thài-iông-hē tsi̍t-pái. I tī 6 gue̍h 30 kiânn kàu kīn-ji̍t-tiám, to̍h-sī kah Thài-iông siōng uá ê ūi-tì. Tsit-tiunn siòng-phìnn hip--ê sī tī lua̍h-thinn àm-mî tshut-hiān tī Tsia̍p-khik kiōng-hô-kok li̍k-sú kú-tn̂g ê Kunetice siânn-pó thinn-tíng ê Ha-luî-hîng Huī-tshinn. I tsit-má beh tńg-khì i ê kòo-hiong Oort hûn ah. Tsit-tiunn sī 7 gue̍h 28 kì-lo̍k huī-tshinn khuí-jiah ê ha̍p-sîng siòng-phìnn. Lán khuànn-ē-tio̍h huī-tshinn ê khuah-pak thôo-hún bué-liu, kng-sih-sih ê huī-tshiu, tn̂g-tn̂g ê lī-tsú bué-liu, kah tsiân-kíng ê kíng-sik. Tsit lia̍p huī-tshinn tī siânn-pó āu-piah 16 kng-hun hn̄g ê sóo-tsāi, puē-kíng sī pak-thian ê thinn-tshinn, huī-tshinn to̍h tshut-hiān tī Tuā-hîm-tsō ē-té. Tsit-ê suann-tíng siânn-pó ê li̍k-sú uì 15 sè-kí khai-sí, m̄-koh huī-tshinn sī Heinrich Olbers tī 1815 nî huat-hiān--ê. Olbers huī-tshinn tī ji̍t-thâu lo̍h-suann liáu-āu tshut-hiān tī Tē-kiû thinn-tíng ê sai-pak-pîng, sī kuan-sing-tsiá iōng thian-bûn bōng-uán-kiànn kah siang-tâng tshian-lí-kiànn kuan-tshik huī-tshinn siōng-hó ê sî-ki. Huī-tshinn 13P Olbers ê āu-tsi̍t-pái kiânn kàu kīn-ji̍t-tiám, ài tán kàu 2094 nî.

[English] Comet Olbers over Kunetice Castle

A visitor to the inner solar system every 70 years or so, Comet 13P/Olbers reached its most recent perihelion, or closest approach to the Sun, on June 30. Now on a return voyage to the distant Oort Cloud, the Halley-type comet is recorded here sweeping through northern summer night skies over historic Kunetice Castle, Czech Republic. The composite of tracked exposures for comet and sky, showing the comet's broad dust tail, brighter coma, and long ion tail buffeted by storms and winds from the Sun, and fixed exposures for foreground landscape was recorded on July 28. The comet is about 16 light-minutes beyond the castle and seen against faint background stars below the northern constellation Ursa Major. The hilltop castle dates to the 15th century, while Heinrich Olbers discovered the comet in 1815. Captured here low in northwestern skies just after sunset Comet Olbers, for now, offers skywatchers on planet Earth rewarding telescopic and binocular views. Comet 13P/Olbers' next perihelion passage will be in 2094.

詞彙學習