火星岩石 頂懸 ê 豹紋

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Leopard Spots on Martian Rocks
• 影像來源：NASA(https://www.nasa.gov /), JPL-Caltech, MSSS, Perseverance Rover
• 新 ê 語言版本：APOD is now available from Brazil in Portuguese
• 台文翻譯：An-Li Tsai (NSYSU)

[漢羅] 火星岩石 頂懸 ê 豹紋

這寡無四常 ê 斑 是按怎來--ê？ 這個月初 咧探索 火星 ê NASA 毅力號探測車，發現 火星岩石 頂懸有 淺色 ê 斑，每一搭外口攏有一輾較烏 ê 箍仔。 這寡奇怪 ê 圖樣 去 hŏng 叫做 豹紋，kah 地球頂懸 ê 哺食者 足仝--ê，所以科學家 咧 研究這寡圖樣 是毋是 古早時代 ê 火星性命 留落來--ê。 相片 內底 ê 斑，直徑才幾若 毫米 爾爾，是 tī 一塊 叫做 Cheyava Falls ê 大塊岩石 頂懸揣著--ê， 有一个 hŏng 激動毋過 猶未證明 ê 解說 是，足久以前 ê 微生物 透過 化學反應產生能量，予岩石 ùi 紅色 變做 白色，而且留一輾烏色箍仔落來，就親像是地球岩石頂懸出現 ê 斑仝款。 就算其他 非生物學 ê 解說 可能會贏，毋過這款 kah 生物起源可能有關係 ê 解說，會引起較濟人注意。

[POJ] Hóe-chhiⁿ Giâm-chio̍h téng-koân ê Pà-bûn

Chit kóa bô sù-siông ê pan sī án-chóaⁿ lâi--ê? Chit kò goe̍h-chhe leh thàm-soh Hóe-chhiⁿ ê NASA Gē-le̍k-hō Thàm-chhek-chhia, hoat-hiān Hóe-chhiⁿ giâm-chio̍h téng-koân ū chhián-sek ê pan, múi-chi̍t tah gōa-kháu lóng-ū chi̍t liàn khah o͘ ê kho͘-á. Chit kóa kî-koài ê tô͘-iūⁿ khì hőng kiò-chò pà-bûn, kah Tē-kiû téng-koân ê pō͘-si̍t-chiá chiok kāng--ê, só͘-í kho-ha̍k-ka leh gián-kiù chit kóa tô͘-iūⁿ sī-m̄-sī kó͘-chá sî-tāi ê Hóe-chhiⁿ sìⁿ-miā lâu--lo̍h-lâi--ê. Siòng-phìⁿ lāi-té ê pan, ti̍t-kèng chiah kúi-nā hô-bí niā-niā, sī tī chi̍t-tè kiò-chò Cheyava Falls ê tōa tè giâm-chio̍h téng-koân chhōe-tio̍h--ê, Ū chi̍t-ê hőng kek-tōng m̄-koh iáu-bōe chèng-bêng ê kái-soeh sī, chiok kú í-chêng ê bî-seng-bu̍t thàu-kòe hòa-ha̍k hoán-èng sán-seng lêng-liōng, hō͘ giâm-chio̍h ùi âng-sek piàn-chò pe̍h-sek, jî-chhiáⁿ lâu chi̍t-liàn o͘-sek kho͘-á lo̍h-lâi, to̍h chhin-chhiūⁿ sī Tē-kiû giâm-chio̍h téng-koân chhut-hiān ê pan kāng-khoán. Tō-sǹg kî-thaⁿ hui seng-bu̍t-ha̍k ê kái-soeh khó-lêng ē iâⁿ, m̄-koh chit-khoán kah seng-bu̍t khí-goân khó-lêng ū koan-hē ê kái-soeh, ē ín-khí khah-chē lâng chù-ì.

[KIP] Hué-tshinn Giâm-tsio̍h tíng-kuân ê Pà-bûn

Tsit kuá bô sù-siông ê pan sī án-tsuánn lâi--ê? Tsit kò gue̍h-tshe leh thàm-soh Hué-tshinn ê NASA Gē-li̍k-hō Thàm-tshik-tshia, huat-hiān Hué-tshinn giâm-tsio̍h tíng-kuân ū tshián-sik ê pan, muí-tsi̍t tah guā-kháu lóng-ū tsi̍t liàn khah oo ê khoo-á. Tsit kuá kî-kuài ê tôo-iūnn khì hőng kiò-tsò pà-bûn, kah Tē-kiû tíng-kuân ê pōo-si̍t-tsiá tsiok kāng--ê, sóo-í kho-ha̍k-ka leh gián-kiù tsit kuá tôo-iūnn sī-m̄-sī kóo-tsá sî-tāi ê Hué-tshinn sìnn-miā lâu--lo̍h-lâi--ê. Siòng-phìnn lāi-té ê pan, ti̍t-kìng tsiah kuí-nā hô-bí niā-niā, sī tī tsi̍t-tè kiò-tsò Cheyava Falls ê tuā tè giâm-tsio̍h tíng-kuân tshuē-tio̍h--ê, Ū tsi̍t-ê hőng kik-tōng m̄-koh iáu-buē tsìng-bîng ê kái-sueh sī, tsiok kú í-tsîng ê bî-sing-bu̍t thàu-kuè huà-ha̍k huán-ìng sán-sing lîng-liōng, hōo giâm-tsio̍h uì âng-sik piàn-tsò pe̍h-sik, jî-tshiánn lâu tsi̍t-liàn oo-sik khoo-á lo̍h-lâi, to̍h tshin-tshiūnn sī Tē-kiû giâm-tsio̍h tíng-kuân tshut-hiān ê pan kāng-khuán. Tō-sǹg kî-thann hui sing-bu̍t-ha̍k ê kái-sueh khó-lîng ē iânn, m̄-koh tsit-khuán kah sing-bu̍t khí-guân khó-lîng ū kuan-hē ê kái-sueh, ē ín-khí khah-tsē lâng tsù-ì.

[English] Leopard Spots on Martian Rocks

What is creating these unusual spots? Light-colored spots on Martian rocks, each surrounded by a dark border, were discovered earlier this month by NASA's Perseverance Rover currently exploring Mars. Dubbed leopard spots because of their seemingly similarity to markings on famous Earth-bound predators, these curious patterns are being studied with the possibility they were created by ancient Martian life. The pictured spots measure only millimeters across and were discovered on a larger rock named Cheyava Falls. The exciting but unproven speculation is that long ago, microbes generated energy with chemical reactions that turned rock from red to white while leaving a dark ring, like some similarly appearing spots on Earth rocks. Although other non-biological explanations may ultimately prevail, speculation focusing on this potential biological origin is causing much intrigue.

詞彙學習