Uluru 天頂 ê 銀河

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Milky Way over Uluru
• 影像來源 kah 版權：Max Inwood
• 台文翻譯：An-Li Tsai (NSYSU)

[漢羅] Uluru 天頂 ê 銀河

Tī Uluru 天頂彼是啥？ Uluru 是 聯合國世界遺址，是 tī 澳洲 中部 平原 噗出來 ê 一粒 350 公尺懸 ê 無四常 ê 山。 Uluru ê 成份是 沙岩。 伊是 tī 過去 3 億年 ê 時間內底，較軟 ê 岩石去予侵蝕 ê 時陣 沓沓仔形成 ê。 Uluru 地區 tī 過去 2 萬 2000 年 內底，一直 攏有人蹛。 這張相片是頂個月 tī Uluru 翕--ê 夜空景色 kah 銀河系 中央帶，內底包括複雜 ê 烏暗 塗粉 雲絲、發紅光 ê 發射 星雲、kah 幾若十億粒 天星。

[POJ] Uluru thiⁿ-téng ê Gîn-hô

Tī Uluru thiⁿ-téng he sī siáⁿ? Uluru sī Liân-ha̍p-kok Sè-kài Ûi-chí, sī tī Ò-chiu tiong-pō͘ pêng-goân phok chhut-lâi ê chi̍t-lia̍p 350 kong-chhioh koân ê bô sù-siông ê soaⁿ. Uluru ê sêng-hūn sī soa-giâm. I sī tī kòe-khì 3 ek nî ê sî-kan lāi-té, khah nńg ê giâm-chio̍h khì hō͘ chhim-sit ê sî-chūn tau̍h-tau̍h-á hêng-sêng--ê. Uluru tē-khu tī kòe-khì 2 bān 2000 nî lāi-té, it-ti̍t lóng ū-lâng tòa. Chit-tiuⁿ siòng-phìⁿ sī téng kò goe̍h tī Uluru hip--ê iā-khong kéng-sek kah Gîn-hô-hē tiong-iong-tòa, lāi-té pau-koat ho̍k-cha̍p ê o͘-àm thô͘-hún hûn-si, hoat âng-kng ê hoat-siā seng-hûn, kah kúi-nā cha̍p-ek lia̍p thiⁿ-chhiⁿ.

[KIP] Uluru thinn-tíng ê Gîn-hô

Tī Uluru thinn-tíng he sī siánn? Uluru sī Liân-ha̍p-kok Sè-kài Uî-tsí, sī tī Ò-tsiu tiong-pōo pîng-guân phok tshut-lâi ê tsi̍t-lia̍p 350 kong-tshioh kuân ê bô sù-siông ê suann. Uluru ê sîng-hūn sī sua-giâm. I sī tī kuè-khì 3 ik nî ê sî-kan lāi-té, khah nńg ê giâm-tsio̍h khì hōo tshim-sit ê sî-tsūn ta̍uh-ta̍uh-á hîng-sîng--ê. Uluru tē-khu tī kuè-khì 2 bān 2000 nî lāi-té, it-ti̍t lóng ū-lâng tuà. Tsit-tiunn siòng-phìnn sī tíng kò gue̍h tī Uluru hip--ê iā-khong kíng-sik kah Gîn-hô-hē tiong-iong-tuà, lāi-té pau-kuat ho̍k-tsa̍p ê oo-àm thôo-hún hûn-si, huat âng-kng ê huat-siā sing-hûn, kah kuí-nā tsa̍p-ik lia̍p thinn-tshinn.

[English] Milky Way over Uluru

What's happening above Uluru? A United Nations World Heritage Site, Uluru is an extraordinary 350-meter high mountain in central Australia that rises sharply from nearly flat surroundings. Composed of sandstone, Uluru has slowly formed over the past 300 million years as softer rock eroded away. The Uluru region has been a home to humans for over 22,000 years. Recorded last month, the starry sky above Uluru includes the central band of our Milky Way galaxy, complete with complex dark filaments of dust, bright red emission nebulas, and billions of stars.

詞彙學習