太陽咧跳舞

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Sun Dance
• 影片來源：NASA, SDO; 資料處理：Alan Watson via Helioviewer
• 台文翻譯：An-Li Tsai (NSYSU)

[漢羅] 太陽咧跳舞

有當時仔，咱 ê 太陽表面 敢若是咧跳舞。 比論講，2012 年中，NASA 踅太陽 ê 太陽動力學衛星天文台 就 翕著 一个 予人印象足深 ê 日珥，就敢若咧 跳舞 仝款。 這支 3 點鐘久 ê 縮時攝影影片 是 tī 紫外光波段 翕--ê。 圓箍仔形 ê 磁場 是 太陽 ê 高溫 電漿 流。 這个 咧跳舞 ê 日珥，規模是足大--ê，規粒 地球 攏去予包 tī 這條高溫氣體 弧 內底。 袂出聲 ê 日珥 通常 會擋 一個月，而且有可能會 tī 日冕物質噴射 (CME) 中爆發，kā 高溫氣體 擲到 太陽系 內底。 產生 太陽日珥 ê 能量機制到今猶是一个 研究 主題。 Kah 2012 年仝款，今年太陽表面 ê 活動閣開始變強 矣，嘛開始出現足濟 太陽絲 kah 日珥。

[POJ] Thài-iông leh Thiàu-bú

Ū-tang-sî-á, lán ê Thài-iông piáu-bīn káⁿ-nā sī leh thiàu-bú. Pí-lūn-kóng, 2012 nî-tiong, NASA se̍h Thài-iông ê Thài-iông Tāng-le̍k-ha̍k Ūi-chhiⁿ Thian-bûn-tâi thài-khong-chûn to̍h hip-tio̍h chi̍t-ê hō͘ lâng ìn-siōng chiok chhim ê ji̍t-ní, to̍h káⁿ-ná leh thiàu-bú kāng-khoán. Chit-ki 3 tiám-cheng kú ê sok-sî-liap-iáⁿ iáⁿ-phìⁿ sī tī chí-gōa-kng pho-tōaⁿ hip--ê. Îⁿ-kho͘-á-hêng ê chû-tiûⁿ sī Thài-iông ê ko-un tiān-chiuⁿ-liû. Chit-ê leh thiàu-bú ê ji̍t-ní, kui-bô͘ sī chiok tōa--ê, kui-lia̍p Tē-kiû lóng khì hō͘ pau tī chit tiâu ko-un khì-thé hô͘ lāi-té. Bē chhut-siaⁿ ê ji̍t-ní thong-siông ē tòng chi̍t kò goe̍h, jî-chhiáⁿ ū khó-lêng ē tī Ji̍t bián Bu̍t-chit Phùn-siā (CME) tiong po̍k-hoat, kā ko-un khì-thé tàn kàu Thài-iông-hē lāi-té. Sán-seng Thài-iông ji̍t-ní ê lêng-liōng ki-chè kàu-taⁿ iáu-sī chi̍t-ê gián-kiù chú-tê. Kah 2012 nî kāng-khoán, kin-nî Thài-iông piáu-bīn ê oa̍h-tōng koh khai-sí piàn kiông ah, mā khai-sí chhut-hiān chiok chē thài-iông-si kah ji̍t-ní.

[KIP] Thài-iông leh Thiàu-bú

Ū-tang-sî-á, lán ê Thài-iông piáu-bīn kánn-nā sī leh thiàu-bú. Pí-lūn-kóng, 2012 nî-tiong, NASA se̍h Thài-iông ê Thài-iông Tāng-li̍k-ha̍k Uī-tshinn Thian-bûn-tâi thài-khong-tsûn to̍h hip-tio̍h tsi̍t-ê hōo lâng ìn-siōng tsiok tshim ê ji̍t-ní, to̍h kánn-ná leh thiàu-bú kāng-khuán. Tsit-ki 3 tiám-tsing kú ê sok-sî-liap-iánn iánn-phìnn sī tī tsí-guā-kng pho-tuānn hip--ê. Înn-khoo-á-hîng ê tsû-tiûnn sī Thài-iông ê ko-un tiān-tsiunn-liû. Tsit-ê leh thiàu-bú ê ji̍t-ní, kui-bôo sī tsiok tuā--ê, kui-lia̍p Tē-kiû lóng khì hōo pau tī tsit tiâu ko-un khì-thé hôo lāi-té. Bē tshut-siann ê ji̍t-ní thong-siông ē tòng tsi̍t kò gue̍h, jî-tshiánn ū khó-lîng ē tī Ji̍t bián Bu̍t-tsit Phùn-siā (CME) tiong po̍k-huat, kā ko-un khì-thé tàn kàu Thài-iông-hē lāi-té. Sán-sing Thài-iông ji̍t-ní ê lîng-liōng ki-tsè kàu-tann iáu-sī tsi̍t-ê gián-kiù tsú-tê. Kah 2012 nî kāng-khuán, kin-nî Thài-iông piáu-bīn ê ua̍h-tōng koh khai-sí piàn kiông ah, mā khai-sí tshut-hiān tsiok tsē thài-iông-si kah ji̍t-ní.

[English] Sun Dance

Sometimes, the surface of our Sun seems to dance. In the middle of 2012, for example, NASA's Sun-orbiting Solar Dynamic Observatory spacecraft imaged an impressive prominence that seemed to perform a running dive roll like an acrobatic dancer. The dramatic explosion was captured in ultraviolet light in the featured time-lapse video covering about three hours. A looping magnetic field directed the flow of hot plasma on the Sun. The scale of the dancing prominence is huge -- the entire Earth would easily fit under the flowing arch of hot gas. A quiescent prominence typically lasts about a month and may erupt in a Coronal Mass Ejection (CME), expelling hot gas into the Solar System. The energy mechanism that creates a solar prominence is still a topic of research. Like in 2012, this year the Sun's surface is again quite active and features many filaments and prominences.

詞彙學習