NGC 6946 ê 正面

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Facing NGC 6946
• 影像來源 kah 版權：Roberto Marinoni
• 台文翻譯：An-Li Tsai (NSYSU)

[漢羅] NGC 6946 ê 正面

咱 銀河系 徛 tī 一个袂䆀 ê 地點，遮會看著 NGC 6946 ê 正面。 這粒大範美麗 ê 捲螺仔星系 tī 仙王座 2000 萬光年遠 ê 所在，就 tī 塗粉 kah 天星 組成 ê 宇宙面紗後壁。 這張 清楚 ê 星系望遠鏡相片 ùi 核心到外口 ê 色水變化是，老恆星 ê 黃光、少年星團 ê 藍光、到 捲螺仔手骨頂懸 恆星形成區 ê 紅光。 NGC 6946 ê 紅外光 影像嘛足光--ê。 伊有豐富 ê 氣體 kah 塗粉，表示講伊有足懸 ê 恆星出生率 kah 死亡率。 實際上，自 20 世紀初開始，NGC 6946 已經 去予人揣著 幾若十粒 新 ê 超新星，這是大質量恆星 死亡爆炸 ê 階段。 NGC 6946 有 4 萬光年大，伊嘛叫做 煙火星系。

[POJ] NGC 6946 ê Chiàⁿ-bīn

Lán Gîn-hô-hē khiā tī chi̍t-ê bē-bái ê tē-tiám, chia ē khòaⁿ-tio̍h NGC 6946 ê chiàⁿ-bīn. Chit lia̍p tōa-pān bí-lē ê kńg-lê-á seng-hē tī Sian-ông-chō 2000 bān kng-nî hn̄g ê só͘-chāi, to̍h tī thô͘-hún kah thiⁿ-chhiⁿ cho͘-sêng ê ú-tiū bīn-se āu-piah. Chit-tiuⁿ chheng-chhó ê seng-hē bōng-oán-kiàⁿ siòng-phìⁿ ùi he̍k-sim kàu gōa-kháu ê sek-chúi piàn-hòa sī, lāu hêng-chhiⁿ ê n̄g-kng, siàu-liân seng-thoân ê nâ-kng, kàu kńg-lê-á chhiú-kut téng-koân hêng-chhiⁿ hêng-sêng-khu ê âng-kng. NGC 6946 ê âng-gōa-kng iáⁿ-siōng mā chiok kng--ê. I ū hong-hù ê khì-thé kah thô͘-hún, piáu-sī kóng i ū chiok koân ê hêng-chhiⁿ chhut-seng-lu̍t kah sí-bông-lu̍t. Si̍t-chè-siōng, chū 20 sè-kí chho͘ khai-sí, NGC 6946 í-keng khì hō͘ lâng chhōe-tio̍h kúi-nā-cha̍p lia̍p sin ê chhiau-sin-seng, che-sī tōa chit-liōng hêng-chhiⁿ sí-bông po̍k-chà ê kai-tōaⁿ. NGC 6946 ū 4 bān kng-nî tōa, i mā kiò-chò Ian-hóe Seng-hē.

[KIP] NGC 6946 ê Tsiànn-bīn

Lán Gîn-hô-hē khiā tī tsi̍t-ê bē-bái ê tē-tiám, tsia ē khuànn-tio̍h NGC 6946 ê tsiànn-bīn. Tsit lia̍p tuā-pān bí-lē ê kńg-lê-á sing-hē tī Sian-ông-tsō 2000 bān kng-nî hn̄g ê sóo-tsāi, to̍h tī thôo-hún kah thinn-tshinn tsoo-sîng ê ú-tiū bīn-se āu-piah. Tsit-tiunn tshing-tshó ê sing-hē bōng-uán-kiànn siòng-phìnn uì hi̍k-sim kàu guā-kháu ê sik-tsuí piàn-huà sī, lāu hîng-tshinn ê n̄g-kng, siàu-liân sing-thuân ê nâ-kng, kàu kńg-lê-á tshiú-kut tíng-kuân hîng-tshinn hîng-sîng-khu ê âng-kng. NGC 6946 ê âng-guā-kng iánn-siōng mā tsiok kng--ê. I ū hong-hù ê khì-thé kah thôo-hún, piáu-sī kóng i ū tsiok kuân ê hîng-tshinn tshut-sing-lu̍t kah sí-bông-lu̍t. Si̍t-tsè-siōng, tsū 20 sè-kí tshoo khai-sí, NGC 6946 í-king khì hōo lâng tshuē-tio̍h kuí-nā-tsa̍p lia̍p sin ê tshiau-sin-sing, tse-sī tuā tsit-liōng hîng-tshinn sí-bông po̍k-tsà ê kai-tuānn. NGC 6946 ū 4 bān kng-nî tuā, i mā kiò-tsò Ian-hué Sing-hē.

[English] Facing NGC 6946

From our vantage point in the Milky Way Galaxy, we see NGC 6946 face-on. The big, beautiful spiral galaxy is located just 20 million light-years away, behind a veil of foreground dust and stars in the high and far-off constellation Cepheus. In this sharp telescopic portrait, from the core outward the galaxy's colors change from the yellowish light of old stars in the center to young blue star clusters and reddish star forming regions along the loose, fragmented spiral arms. NGC 6946 is also bright in infrared light and rich in gas and dust, exhibiting a high star birth and death rate. In fact, since the early 20th century ten confirmed supernovae, the death explosions of massive stars, were discovered in NGC 6946. Nearly 40,000 light-years across, NGC 6946 is also known as the Fireworks Galaxy.

詞彙學習