Ùi 可見光 到 X 光 ê 毛蟹星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Crab Nebula from Visible to X-Ray
• 影像來源：NASA, ESA, ASI, Hubble, Chandra, IXPE
• 足濟新發現：Chandra Celebrates 25th Anniversary
• 台文翻譯：An-Li Tsai (NSYSU)

[漢羅] Ùi 可見光 到 X 光 ê 毛蟹星雲

毛蟹星雲 ê 動力來源是啥物？ 是一粒大細差不多 kah 城市平大，1 秒鐘 自旋 30 擺、有磁性 ê 中子星。 伊嘛叫做 毛蟹星雲脈動星，是星雲核心 氣體捲螺仔旋中心 ê 光點。 毛蟹星雲 M1 差不多有 10 光年闊。 這張 壯麗 ê 相片 有翕著 捲螺仔旋 ê 中央盤 kah 踅 tī 邊仔、沓沓仔湠出去--ê、足複雜 ê 雲絲。 這張相片是 kā 紅色 ê Hubble 太空望遠鏡 ê 可見光 影像，白色 ê Chandra X 光天文台 ê X 光 影像，kah 茄仔色 ê IXPE 偏振探測器 ê X 光發射線 疊做伙 ê 合成相片。 中央 ê 脈動星 透過 沓沓仔 降低 自旋速度 ê 方式，驅動 毛蟹星雲 產生發射線 kah 脹大，產生 高能 電子 風。 這張 今仔日發表 ê 影像，是欲紀念 NASA 旗艦級 天文台：Chandra X 光天文台 發射 25 週年。

[POJ] Ùi Khó-kiàn-kng kàu X-kng ê Mô͘-hē Seng-hûn

Mô͘-hē Seng-hûn ê tōng-le̍k lâi-goân sī siáⁿ-mih? Sī chi̍t-lia̍p tōa-sè chha-put-to kah siâⁿ-chhī pêⁿ tōa, 1 bió-cheng chū-soân 30 pái, ū chû-sèng ê tiong-chú-chhiⁿ. I mā kiò-chò Mô͘-hē Seng-hûn Me̍h-tōng-chhiⁿ, sī seng-hûn he̍k-sim khì-thé kńg-lê-á-chn̄g tiong-sim ê kng-tiám. Mô͘-hē Seng-hûn M chha-put-to ū 10 kng-nî khoah. Chit-tiuⁿ chòng-lē ê siòng-phìⁿ ū hip-tio̍h kńg-lê-á-chn̄g ê tiong-ng-pôaⁿ kah se̍h tī piⁿ-á, tau̍h-tau̍h-á thòaⁿ--chhut-khì--ê, chiok ho̍k-cha̍p ê hûn-si. Chit-tiuⁿ siòng-phìⁿ sī kā âng-sek ê Hubble Thài-khong Bōng-oán-kiàⁿ ê khó-kiàn-kng iáⁿ-siōng, pe̍h-sek ê Chandra X-kng Thian-bûn-tâi ê X-kng iáⁿ-siōng, kah kiô-á-sek ê IXPE Phian-chìn Thàm-chhek-khì ê X-kng hoat-siā-sòaⁿ tha̍h chò-hóe ê ha̍p-sêng siòng-phìⁿ. Tiong-ng ê me̍h-tōng-chhiⁿ thàu-kòe tau̍h-tau̍h-á kàng-kē chū-soân sok-tō͘ ê hong-sek, khu-tōng Mô͘-hē Seng-hûn sán-seng hoat-siā-sòaⁿ kah tiùⁿ-tōa, sán-seng ko-lêng tiān-chú-hong. Chit-tiuⁿ kin-á-ji̍t hoat-pió ê iáⁿ-siōng, sī beh kì-liām NASA kî-kàm-kip thian-bûn tâi: Chandra X-kng Thian-bûn-tâi hoat-siā 25 chiu-nî.

[KIP] Uì Khó-kìan-kng kàu X-kng ê Môo-hē Sing-hûn

Môo-hē Sing-hûn ê tōng-li̍k lâi-guân sī siánn-mih? Sī tsi̍t-lia̍p tuā-sè tsha-put-to kah siânn-tshī pênn tuā, 1 bió-tsing tsū-suân 30 pái, ū tsû-sìng ê tiong-tsú-tshinn. I mā kiò-tsò Môo-hē Sing-hûn Me̍h-tōng-tshinn, sī sing-hûn hi̍k-sim khì-thé kńg-lê-á-tsn̄g tiong-sim ê kng-tiám. Môo-hē Sing-hûn M1 tsha-put-to ū 10 kng-nî khuah. Tsit-tiunn tsòng-lē ê siòng-phìnn ū hip-tio̍h kńg-lê-á-tsn̄g ê tiong-ng-puânn kah se̍h tī pinn-á, ta̍uh-ta̍uh-á thuànn--tshut-khì--ê, tsiok ho̍k-tsa̍p ê hûn-si. Tsit-tiunn siòng-phìnn sī kā âng-sik ê Hubble Thài-khong Bōng-uán-kiànn ê khó-kìan-kng iánn-siōng, pe̍h-sik ê Chandra X-kng Thian-bûn-tâi ê X-kng iánn-siōng, kah kiô-á-sik ê IXPE Phian-tsìn Thàm-tshik-khì ê X-kng huat-siā-suànn tha̍h tsò-hué ê ha̍p-sîng siòng-phìnn. Tiong-ng ê me̍h-tōng-tshinn thàu-kuè ta̍uh-ta̍uh-á kàng-kē tsū-suân sok-tōo ê hong-sik, khu-tōng Môo-hē Sing-hûn sán-sing huat-siā-suànn kah tiùnn-tuā, sán-sing ko-lîng tiān-tsú-hong. Tsit-tiunn kin-á-ji̍t huat-pió ê iánn-siōng, sī beh kì-liām NASA kî-kàm-kip thian-bûn tâi: Chandra X-kng Thian-bûn-tâi huat-siā 25 tsiu-nî.

[English] The Crab Nebula from Visible to X-Ray

What powers the Crab Nebula? A city-sized magnetized neutron star spinning around 30 times a second. Known as the Crab Pulsar, it is the bright spot in the center of the gaseous swirl at the nebula's core. About 10 light-years across, the spectacular picture of the Crab Nebula (M1) frames a swirling central disk and complex filaments of surrounding and expanding glowing gas. The picture combines visible light from the Hubble Space Telescope in red and blue with X-ray light from the Chandra X-ray Observatory shown in white, and diffuse X-ray emission detected by Imaging X-ray Polarimetry Explorer (IXPE) in diffuse purple. The central pulsar powers the Crab Nebula's emission and expansion by slightly slowing its spin rate, which drives out a wind of energetic electrons. The featured image released today, the 25th Anniversary of the launch of NASA's flagship-class X-ray Observatory: Chandra.

詞彙學習