夜空下底 ê Villarrica 火山

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Villarrica Volcano Against the Sky
• 影片來源 kah 版權：Gabriel Muñoz; Text: Natalia Lewandowska (SUNY Oswego)
• 台文翻譯：An-Li Tsai (NSYSU)

[漢羅] 夜空下底 ê Villarrica 火山

羅馬神話 ê 火神 Vulcan 提伊 ê 摃槌仔 tī 天頂摃一下，火 就著矣。 這是最近 tī 智利 Villarrica 火山 ê 火。 這个火實際上是 ùi 熔去 ê 石頭 來 ê 發光水煙 kah 火山烌。 天頂 ê 光是 tī 咱 銀河系 kah 麥哲倫星系 內底 ê 遙遠恆星。 火 kah 光就 tī 這張相片內底互相呼應。 Tī 這支縮時攝影影片 中，地球頂懸 ê Villarrica 火山噴發，伊家己 tī 天星滿滿 ê 夜空下底咧自轉。 地球 頂懸 有 1350 粒火山，kah 木星 ê 衛星 木衛一 Io 仝款，攏是 太陽系 內底 上蓋 活跳跳 ê 地質環境。 雖罔講兩个世界攏有遮爾媠 ê 景色，毋過兩个世界頂懸 ê 火山 形成 ê 原因無仝。 地球 ê 火山是 地球枋塊 之間沓沓仔徙動產生--ê。 木衛一 Io ê 火山是 木星 ê 引潮力 kā 伊 ê 地殼 搝 甲 變形 產生--ê。

[POJ] Iā-khong ē-té ê Villarrica hóe-soaⁿ

Lô-má sîn-ōe ê hóe-sîn Vulcan the̍h i ê kòng-thûi-á tī thiⁿ-téng kòng chi̍t-ē, hóe to̍h to̍h--ah. Che-sī chòe-kīn tī Tì-lī Villarrica hóe-soaⁿ ê hóe. Chit-ê hóe si̍t-chè-siōng sī ùi iûⁿ--khì ê chio̍h-thâu lâi ê hoat-kng chúi-ian kah hóe-soaⁿ-hu. Thiⁿ-téng ê kng sī tī lán Gîn-hô-hē kah Be̍h-tiat-lûn Seng-hē lāi-té ê iâu-oán hêng-chhiⁿ. Hóe kah kng to̍h tī chit-tiuⁿ siòng-phìⁿ lāi-té hō͘-siong ho͘-èng. Tī chit-ki sok-sî-liap-iáⁿ iáⁿ-phìⁿ tiong, Tē-kiû téng-koân ê Villarrica hóe-soaⁿ phùn-hoat, i ka-kī tī thiⁿ-chhiⁿ móa-móa ê iā-khong ē-té leh chū-choán. Tē-kiû téng-koân ū 1350 lia̍p hóe-soaⁿ, kah Bo̍k-chhiⁿ ê ūi-chhiⁿ Bo̍k-ūi-it Io kāng-khoán, lóng sī Thài-iông-hē lāi-té siōng-kài oa̍h-thiàu-thiàu ê tē-chit khoân-kéng. Sui-bóng kóng nn̄g-ê sè-kài lóng-ū chiah-nī súi ê kéng-sek, m̄-koh nn̄g-ê sè-kài téng-koân ê hóe-soaⁿ hêng-sêng ê goân-in bô-kâng. Tē-kiû ê hóe-soaⁿ sī Tē-kiû pang-tè chi-kan tau̍h-tau̍h-á sóa-tāng sán-seng--ê. Bo̍k-ūi-it Io ê hóe-soaⁿ sī Bo̍k-chhiⁿ ê ín-tiâu-le̍k kā i ê tē-khak giú kah piàn-hêng sán-seng--ê.

[KIP] Iā-khong ē-té ê Villarrica hué-suann

Lô-má sîn-uē ê hué-sîn Vulcan the̍h i ê kòng-thuî-á tī thinn-tíng kòng tsi̍t-ē, hué to̍h to̍h--ah. Tse-sī tsuè-kīn tī Tì-lī Villarrica hué-suann ê hué. Tsit-ê hué si̍t-tsè-siōng sī uì iûnn--khì ê tsio̍h-thâu lâi ê huat-kng tsuí-ian kah hué-suann-hu. Thinn-tíng ê kng sī tī lán Gîn-hô-hē kah Be̍h-tiat-lûn Sing-hē lāi-té ê iâu-uán hîng-tshinn. Hué kah kng to̍h tī tsit-tiunn siòng-phìnn lāi-té hōo-siong hoo-ìng. Tī tsit-ki sok-sî-liap-iánn iánn-phìnn tiong, Tē-kiû tíng-kuân ê Villarrica hué-suann phùn-huat, i ka-kī tī thinn-tshinn muá-muá ê iā-khong ē-té leh tsū-tsuán. Tē-kiû tíng-kuân ū 1350 lia̍p hué-suann, kah Bo̍k-tshinn ê uī-tshinn Bo̍k-uī-it Io kāng-khuán, lóng sī Thài-iông-hē lāi-té siōng-kài ua̍h-thiàu-thiàu ê tē-tsit khuân-kíng. Sui-bóng kóng nn̄g-ê sè-kài lóng-ū tsiah-nī suí ê kíng-sik, m̄-koh nn̄g-ê sè-kài tíng-kuân ê hué-suann hîng-sîng ê guân-in bô-kâng. Tē-kiû ê hué-suann sī Tē-kiû pang-tè tsi-kan ta̍uh-ta̍uh-á suá-tāng sán-sing--ê. Bo̍k-uī-it Io ê hué-suann sī Bo̍k-tshinn ê ín-tiâu-li̍k kā i ê tē-khak giú kah piàn-hîng sán-sing--ê.

[English] Villarrica Volcano Against the Sky

When Vulcan, the Roman god of fire, swings his blacksmith's hammer, the sky is lit on fire. A recent eruption of Chile's Villarrica volcano shows the delicate interplay between this fire -- actually glowing steam and ash from melted rock -- and the light from distant stars in our Milky Way galaxy and the Magellanic Clouds galaxies. In the featured timelapse video, the Earth rotates under the stars as Villarrica erupts. With about 1350 volcanoes, our planet Earth rivals Jupiter's moon Io as the most geologically active place in the Solar System. While both have magnificent beauty, the reasons for the existence of volcanoes on both worlds are different. Earth's volcanoes typically occur between slowly shifting outer shell plates, while Io's volcanoes are caused by gravitational flexing resulting from Jupiter's tidal gravitational pull.

詞彙學習