太陽系 全家福

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Solar System Family Portrait
• 影像來源：Voyager Project, NASA
• 台文翻譯：An-Li Tsai (NSYSU)

[漢羅] 太陽系 全家福

這張是 1990 年 航海家 1 號太空船 飛到 離太陽 64 億公里遠 ê 所在，越頭翕--ê 頭一張 太陽系 全家福。 這組完整 ê 相片是 ùi 黃道面 頂懸 32 度 ê 所在翕--ê 60 張 拼鬥影像。 其中，航海家 ê 闊幅 kha-mé-lah ùi 倒爿 ê 內太陽系 開始翕。 一直翕到上正爿 ê 冰巨行星 海王星，就是太陽系上遠 ê 行星。 金星 V、地球 E、木星 J、土星 S、天王星 U, kah 海王星 N，攏有用英文字母 kā 標出來。 太陽就 tī 倒爿圓箍仔型相片群中央，上光彼點。 逐粒行星 ê 相片 攏是用 航海家 ê 狹頻 kha-mé-lah 翕--ê。 相片內底看袂著水星，因為離太陽傷近矣，煞光甲看袂著。 火星較拍損，去予 kha-mé-lah 光學系統 散射 ê 日光 閘著矣。 而且，比海王星較倚太陽 ê 細粒冥王星，嘛無翕著。 航海家 1 號 是 NASA 發射到 星際空間 中，飛上久、上遠 ê 太空船。 2024 年 ê 時陣，伊已經離咱 240 億公里遠矣。

[POJ] Thài-iông-hē Choân-ka-hok

Chit-tiuⁿ sī 1990 nî Hâng-hái-ka 1 hō thài-khong-chûn poe-kàu lī Thài-iông 64 ek kong-lí hn̄g ê só͘-chāi, oa̍t-thâu hip--ê thâu chi̍t-tiuⁿ Thài-iông-hē Choân-ka-hok. Chit cho͘ oân-chéng ê siòng-phìⁿ sī ùi n̂g-tō-bīn téng-koân 32 tō͘ ê só͘-chāi hip--ê 60 tiuⁿ pheng-tàu iáⁿ-siōng. Kî-tiong, Hâng-hái-ka ê khoah pak kha-mé-lah ùi tò-pêng ê Lōe Thài-iông-hē khai-sí hip. It-ti̍t hip kàu siōng chiàⁿ-pêng ê peng-kū-kiâⁿ-chhiⁿ Hái-ông-chhiⁿ, to̍h-sī Thài-iông-hē siōng hn̄g ê kiâⁿ-chhiⁿ. Kim-chhiⁿ V, Tē-kiû E, Bo̍k-chhiⁿ J, Thó͘-chhiⁿ S, Thian-ông-chhiⁿ U, kah Hái-ông-chhiⁿ N, lóng-ū iōng eng-bûn jī-bú kā pio chhut-lâi. Thài-iông to̍h tī îⁿ-kho͘-á hêng siòng-phìⁿ kûn tiong-ng, siōng kng hit tiám. Ta̍k lia̍p kiâⁿ-chhiⁿ ê siòng-phìⁿ lóng sī iōng Hâng-hái-ka ê e̍h-pîn kha-mé-lah hip--ê. Siòng-phìⁿ lāi-té khòaⁿ bē-tio̍h Chúi-chhiⁿ, in-ūi lī Thài-iông siuⁿ kīn ah, soah kng kah khòaⁿ bē-tio̍h. Hóe-chhiⁿ khah phah-sńg, khì hō͘ kha-mé-lah kng-ha̍k hē-thóng sàn-siā ê ji̍t-kng cha̍h tio̍h-ah. Jî-chhiáⁿ, pí Hái-ông-chhiⁿ khah óa Thài-iông ê sè-lia̍p Bêng-ông-chhiⁿ, mā bô hip--tio̍h. Hâng-hái-ka 1 hō sī NASA hoat-siā kàu seng-chè khong-kan tiong, poe siōng-kú, siōng hn̄g ê thài-khong-chûn. 2024 nî ê sî-chūn, i í-keng lī lán 240 ek kong-lí hn̄g ah.

[KIP] Thài-iông-hē Tsuân-ka-hok

Tsit-tiunn sī 1990 nî Hâng-hái-ka 1 hō thài-khong-tsûn pue-kàu lī Thài-iông 64 ik kong-lí hn̄g ê sóo-tsāi, ua̍t-thâu hip--ê thâu tsi̍t-tiunn Thài-iông-hē Tsuân-ka-hok. Tsit tsoo uân-tsíng ê siòng-phìnn sī uì n̂g-tō-bīn tíng-kuân 32 tōo ê sóo-tsāi hip--ê 60 tiunn phing-tàu iánn-siōng. Kî-tiong, Hâng-hái-ka ê khuah pak kha-mé-lah uì tò-pîng ê Luē Thài-iông-hē khai-sí hip. It-ti̍t hip kàu siōng tsiànn-pîng ê ping-kū-kiânn-tshinn Hái-ông-tshinn, to̍h-sī Thài-iông-hē siōng hn̄g ê kiânn-tshinn. Kim-tshinn V, Tē-kiû E, Bo̍k-tshinn J, Thóo-tshinn S, Thian-ông-tshinn U, kah Hái-ông-tshinn N, lóng-ū iōng ing-bûn jī-bú kā pio tshut-lâi. Thài-iông to̍h tī înn-khoo-á hîng siòng-phìnn kûn tiong-ng, siōng kng hit tiám. Ta̍k lia̍p kiânn-tshinn ê siòng-phìnn lóng sī iōng Hâng-hái-ka ê e̍h-pîn kha-mé-lah hip--ê. Siòng-phìnn lāi-té khuànn bē-tio̍h Tsuí-tshinn, in-uī lī Thài-iông siunn kīn ah, suah kng kah khuànn bē-tio̍h. Hué-tshinn khah phah-sńg, khì hōo kha-mé-lah kng-ha̍k hē-thóng sàn-siā ê ji̍t-kng tsa̍h tio̍h-ah. Jî-tshiánn, pí Hái-ông-tshinn khah uá Thài-iông ê sè-lia̍p Bîng-ông-tshinn, mā bô hip--tio̍h. Hâng-hái-ka 1 hō sī NASA huat-siā kàu sing-tsè khong-kan tiong, pue siōng-kú, siōng hn̄g ê thài-khong-tsûn. 2024 nî ê sî-tsūn, i í-king lī lán 240 ik kong-lí hn̄g ah.

[English] Solar System Family Portrait

In 1990, cruising four billion miles from the Sun, the Voyager 1 spacecraft looked back to make this first ever Solar System family portrait. The complete portrait is a 60 frame mosaic made from a vantage point 32 degrees above the ecliptic plane. In it, Voyager's wide-angle camera frames sweep through the inner Solar System at the left, linking up with ice giant Neptune, the Solar System's outermost planet, at the far right. Positions for Venus, Earth, Jupiter, Saturn, Uranus, and Neptune are indicated by letters, while the Sun is the bright spot near the center of the circle of frames. The inset frames for each of the planets are from Voyager's narrow-field camera. Unseen in the portrait are Mercury, too close to the Sun to be detected, and Mars, unfortunately hidden by sunlight scattered in the camera's optical system. Closer to the Sun than Neptune at the time, small, faint Pluto's position was not covered. In 2024 Voyager 1, NASA’s longest-running and most-distant spacecraft, is some 15 billion miles away, operating in interstellar space.

詞彙學習