捲螺仔時間圖

Page(/daily/2024/07/20240701)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 捲螺仔時間圖

宇宙開始到今,發生過啥物代誌? 這張 捲螺仔時間圖 有 kā 一寡重點畫出來。 捲螺仔中心是 大爆炸,咱知影這差不多是 138 億年前 開始–ê。 開始幾若十億年左右,原子形成矣。 紲落來 原子 形成 恆星,恆星 kah 氣體 形成 星系咱 ê 太陽地球,這發生 tī 46 億年前。 地球頂懸 ê 性命 大約仔出現 tī 38 億年前,了後開始有 細胞,紲落來 10 億年內出現 光合作用。 差不多 17 億年前,地球頂懸開始有無仝款 ê 多細胞生物 出現。 魚仔類 tī 5 億年前開始 tī 海底咧泅飼奶動物 tī 2 億年前開始 tī 陸地咧行。 人類 tī 600 萬年前開始出現,1 萬年前 開始出現城市。 捲螺仔時間圖就畫到遮,紲落來應該是人類 飛到太空中,這嘛才開始 75 年爾爾。 而且 人工智慧 才拄開始無幾年,這馬已經變甲足重要矣。

[POJ] Kńg-lê-á Sî-kan-tô͘

Ú-tiū khai-sí kàu-taⁿ, hoat-seng-kòe siáⁿ-mih tāi-chì? Chit-tiuⁿ Kńg-lê-á Sî-kan-tô͘ ū kā chi̍t-kóa tiōng-tiám ōe–chhut-lâi. Kńg-lê-á tiong-sim sī tōa-po̍k-chà, lán chai-iáⁿ che chha-put-to sī 138 ek nî-chêng khai-sí–ê. Khai-sí kúi-nā cha̍p-ek nî chó-iū, goân-chú hêng-sêng–ah. Sòa–lo̍h-lâi goân-chú hêng-sêng hêng-chhiⁿ, hêng-chhiⁿ kah khì-thé hêng-sêng seng-hē, lán ê Thài-iông, Tē-kiû, che hoat-seng tī 46 ek nî-chêng. Tē-kiû téng-koân ê sìⁿ-miā tāi-iok-á chhut-hiān tī 38 ek nî-chêng, liáu-āu khai-sí ū sè-pau, sòa–lo̍h-lâi 10 ek nî lāi chhut-hiān kng-ha̍p-chok-iōng. Chha-put-to 17 ek nî-chêng, Tē-kiû téng-koân khai-sí ū-bô kāng-khoán ê to-sè-pau seng-bu̍t chhut-hiān. Hî-á-lūi tī 5 ek nî-chêng khai-sí tī hái-té leh siû, chhī-leng tōng-bu̍t tī 2 ek nî-chêng khai-sí tī lio̍k-tē leh kiâⁿ. Jîn-lūi tī 600 bān nî-chêng khai-sí chhut-hiān, 1 bān nî-chêng khai-sí chhut-hiān siâⁿ-chhī. Kńg-lê-á Sî-kan-tô͘ to̍h ōe kàu chia̍h, sòa–lo̍h-lâi eng-kai sī jîn-lūi poe-kàu thài-khong tiong, che mā chiah khai-sí 75 nî niā-niā. Jî-chhiáⁿ jîn-kang tì-hūi chiah tú-khai-sí bô kúi nî, chit-má í-keng piàn-kah chiok tiōng-iàu–ah.

[KIP] Kńg-lê-á Sî-kan-tôo

Ú-tiū khai-sí kàu-tann, huat-sing-kuè siánn-mih tāi-tsì? Tsit-tiunn Kńg-lê-á Sî-kan-tôo ū kā tsi̍t-kuá tiōng-tiám uē–tshut-lâi. Kńg-lê-á tiong-sim sī tuā-po̍k-tsà, lán tsai-iánn tse tsha-put-to sī 138 ik nî-tsîng khai-sí–ê. Khai-sí kuí-nā tsa̍p-ik nî tsó-iū, guân-tsú hîng-sîng–ah. Suà–lo̍h-lâi guân-tsú hîng-sîng hîng-tshinn, hîng-tshinn kah khì-thé hîng-sîng sing-hē, lán ê Thài-iông, Tē-kiû, tse huat-sing tī 46 ik nî-tsîng. Tē-kiû tíng-kuân ê sìnn-miā tāi-iok-á tshut-hiān tī 38 ik nî-tsîng, liáu-āu khai-sí ū sè-pau, suà–lo̍h-lâi 10 ik nî lāi tshut-hiān kng-ha̍p-tsok-iōng. Tsha-put-to 17 ik nî-tsîng, Tē-kiû tíng-kuân khai-sí ū-bô kāng-khuán ê to-sè-pau sing-bu̍t tshut-hiān. Hî-á-luī tī 5 ik nî-tsîng khai-sí tī hái-té leh siû, tshī-ling tōng-bu̍t tī 2 ik nî-tsîng khai-sí tī lio̍k-tē leh kiânn. Jîn-luī tī 600 bān nî-tsîng khai-sí tshut-hiān, 1 bān nî-tsîng khai-sí tshut-hiān siânn-tshī. Kńg-lê-á Sî-kan-tôo to̍h uē kàu tsia̍h, suà–lo̍h-lâi ing-kai sī jîn-luī pue-kàu thài-khong tiong, tse mā tsiah khai-sí 75 nî niā-niā. Jî-tshiánn jîn-kang tì-huī tsiah tú-khai-sí bô kuí nî, tsit-má í-king piàn-kah tsiok tiōng-iàu–ah.

[English] Time Spiral

What’s happened since the universe started? The time spiral shown here features a few notable highlights. At the spiral’s center is the Big Bang, the place where time, as we know it, began about 13.8 billion years ago. Within a few billion years atoms formed, then stars formed from atoms, galaxies formed from stars and gas, our Sun formed, soon followed by our Earth, about 4.6 billion years ago. Life on Earth begins about 3.8 billion years ago, followed by cells, then photosynthesis within a billion years. About 1.7 billion years ago, multicellular life on Earth began to flourish. Fish began to swim about 500 million years ago, and mammals began walking on land about 200 million years ago. Humans first appeared only about 6 million years ago, and made the first cities only about 10,000 years ago. The time spiral illustrated stops there, but human spaceflight might be added, which started only 75 years ago, and useful artificial intelligence began to take hold within only the past few years.

詞彙學習(漢羅/POJ/KIP/華語/English)

  • 【捲螺仔時間圖】kńg-lê-á sî-kan-tô͘/kńg-lê-á sî-kan-tôo/時間螺旋圖/Time Spiral
  • 【大爆炸】Tōa-po̍k-chà/Tuā-po̍k-tsà/大爆炸/Big Bang
  • 【原子】goân-chú/guân-tsú/原子/atoms
  • 【恆星】hêng-chhiⁿ/hîng-tshinn/恆星/stars
  • 【星系】seng-hē/sing-hē/星系/galaxies
  • 【光合作用】kng-ha̍p-chok-iōng/kng-ha̍p-tsok-iōng/光合作用/photosynthesis
  • 【多細胞生物】to-sè-pau seng-bu̍t/to-sè-pau sing-bu̍t/多細胞生物/multicellular life
  • 【飼奶動物】chhī-leng tōng-bu̍t/tshī-ling tōng-bu̍t/哺乳動物/mammals
  • 【人工智慧】jîn-kang tì-hūi/jîn-kang tì-huī/人工智慧/artificial intelligence

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:地球 peh 起來:重新處理 ê 影片 明仔載 ê 圖:NGC 602:蚵仔星團