地球 peh 起來：重新處理 ê 影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Earthrise: A Video Reconstruction
• 影片來源：NASA, SVS, Apollo 8 船員；首席動畫師：Ernie Wright；音樂：C Major Prelude by Johann Sebastian Bach
• NASA Administrator Remembers Earthrise Photographer William Anders
• 台文翻譯：An-Li Tsai (NSYSU)

[漢羅] 地球 peh 起來：重新處理過 ê 影片

這支影片 ùi 12 秒開始，有一粒 地球 peh 起來 矣！ 一直到 55.5 年前，人類毋捌看過地球 ùi 月球邊緣 peh 起來，所以這个景色予 阿波羅 8 號 太空船 ê 船員感覺足心適--ê。 這寡 船員 隨開始 翕 阿波羅 8 號 踅月球行 ê 各種精彩景色。 這支 影片 是用現代技術 tùi 彼陣翕 ê 影片重新處理過，予伊看起來敢若是現代 ê 電影。 咱 熟似 ê 地球 tī 咱 無熟似 ê 月球景色 中 peh 起來。 這規个景色 kah 咱 tī 地球看著 月球 peh 起來 ê 概念顛倒反。 對足濟人來講，這个景色嘛提醒咱是一个性命共同體： 這粒 藍色大理石，就是咱生活 ê 所在。 這支 2 分鐘 ê 影片 毋是縮時攝影影片，這是 ùi 阿波羅 8 號 窗仔看著 ê 景色，這是地球 peh 起來 ê 誠實速度。 經過 7 個月 ê 3 擺任務，來到 阿波羅 11 號 任務，太空船毋但踅月球咧行，太空人總算是 登陸月球 矣。

[POJ] Tē-kiû peh--khí-lâi: Tiông-sin chhú-lí kòe ê Iáⁿ-phìⁿ

Chit-ki iáⁿ-phìⁿ ùi 12 bió khai-sí, ū chi̍t-lia̍p Tē-kiû peh--khí-lâi--ah! It-ti̍t kàu 55.5 ní-chêng, jîn-lūi m̄-bat khòaⁿ-kòe Tē-kiû ùi Goe̍h-kiû pian-iân peh--khí-lâi, só͘-í chit-ê kéng-sek hō͘ A-pho-lô 8 hō thài-khong-chûn ê chûn-oân kám-kak chiok sim-sek--ê. Chit kóa chûn-oân sûi khai-sí hip A-pho-lô 8 hō se̍h Goe̍h-kiû kiâⁿ ê kok-chióng cheng-chhái kéng-sek. Chit-ki iáⁿ-phìⁿ sī iōng hiān-tāi ki-su̍t tùi hit-chūn hip--ê iáⁿ-phìⁿ tiông-sin chhú-lí kòe, hō͘ i khòaⁿ--khí-lâi káⁿ-ná sī hiān-tāi ê tiān-iáⁿ. Lán se̍k-sāi ê Tē-kiû tī lán bô se̍k-sāi ê Goe̍h-kiû kéng-sek tiong peh--khí-lâi. Che kui-ê kéng-sek kah lán tī Tē-kiû khòaⁿ--tio̍h Goe̍h-kiû peh--khí-lâi ê kài-liām tian-tò-péng. Tùi chiok chē lâng lâi-kóng, chit-ê kéng-sek mā thê-chhíⁿ lán sī chi̍t-ê sèⁿ-miā kiōng-tông-thé: Chit lia̍p nâ-sek tāi-lí-chio̍h, to̍h-sī lán seng-oa̍h ê só͘-chāi. Chit-ki 2 hun-cheng ê iáⁿ-phìⁿ m̄-sī sok-sî-liap-iáⁿ iáⁿ-phìⁿ, che-sī ùi A-pho-lô 8 hō thang-á khòaⁿ--tio̍h ê kéng-sek, che sī Tē-kiû peh--khí-lâi ê chiâⁿ-si̍t sok-tō͘. Keng-kòe 7 kò goe̍h ê 3 pái jīm-bū, lâi-kàu A-pho-lô 11 hō jīm-bū, Thài-khong-chûn m̄-nā se̍h Goe̍h-kiû leh kiâⁿ, Thài-khong-jîn chóng-sǹg sī teng-lio̍k Goe̍h-kiû--ah.

[KIP] Tē-kiû peh--khí-lâi: Tiông-sin tshú-lí kuè ê Iánn-phìnn

Tsit-ki iánn-phìnn uì 12 bió khai-sí, ū tsi̍t-lia̍p Tē-kiû peh--khí-lâi--ah! It-ti̍t kàu 55.5 ní-tsîng, jîn-luī m̄-bat khuànn-kuè Tē-kiû uì Gue̍h-kiû pian-iân peh--khí-lâi, sóo-í tsit-ê kíng-sik hōo A-pho-lô 8 hō thài-khong-tsûn ê tsûn-uân kám-kak tsiok sim-sik--ê. Tsit kuá tsûn-uân suî khai-sí hip A-pho-lô 8 hō se̍h Gue̍h-kiû kiânn ê kok-tsióng tsing-tshái kíng-sik. Tsit-ki iánn-phìnn sī iōng hiān-tāi ki-su̍t tuì hit-tsūn hip--ê iánn-phìnn tiông-sin tshú-lí kuè, hōo i khuànn--khí-lâi kánn-ná sī hiān-tāi ê tiān-iánn. Lán si̍k-sāi ê Tē-kiû tī lán bô si̍k-sāi ê Gue̍h-kiû kíng-sik tiong peh--khí-lâi. Tse kui-ê kíng-sik kah lán tī Tē-kiû khuànn--tio̍h Gue̍h-kiû peh--khí-lâi ê kài-liām tian-tò-píng. Tuì tsiok tsē lâng lâi-kóng, tsit-ê kíng-sik mā thê-tshínn lán sī tsi̍t-ê sènn-miā kiōng-tông-thé: Tsit lia̍p nâ-sik tāi-lí-tsio̍h, to̍h-sī lán sing-ua̍h ê sóo-tsāi. Tsit-ki 2 hun-tsing ê iánn-phìnn m̄-sī sok-sî-liap-iánn iánn-phìnn, tse-sī uì A-pho-lô 8 hō thang-á khuànn--tio̍h ê kíng-sik, tse sī Tē-kiû peh--khí-lâi ê tsiânn-si̍t sok-tōo. King-kuè 7 kò gue̍h ê 3 pái jīm-bū, lâi-kàu A-pho-lô 11 hō jīm-bū, Thài-khong-tsûn m̄-nā se̍h Gue̍h-kiû leh kiânn, Thài-khong-jîn tsóng-sǹg sī ting-lio̍k Gue̍h-kiû--ah.

[English] Earthrise: A Video Reconstruction

About 12 seconds into this video, something unusual happens. The Earth begins to rise. Never seen by humans before, the rise of the Earth over the limb of the Moon occurred about 55.5 years ago and surprised and amazed the crew of Apollo 8. The crew immediately scrambled to take still images of the stunning vista caused by Apollo 8's orbit around the Moon. The featured video is a modern reconstruction of the event as it would have looked were it recorded with a modern movie camera. The colorful orb of our Earth stood out as a familiar icon rising above a distant and unfamiliar moonscape, the whole scene the conceptual reverse of a more familiar moonrise as seen from Earth. To many, the scene also spoke about the unity of humanity: that big blue marble -- that's us -- we all live there. The two-minute video is not time-lapse -- this is the real speed of the Earth rising through the windows of Apollo 8. Seven months and three missions later, Apollo 11 astronauts would not only circle Earth's moon, but land on it.

詞彙學習