麒麟鹿座內底 ê NGC 2403

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 2403 in Camelopardalis
• 影像來源 kah 版權：(Team F.A.C.T.) Lilian Lbt - Cyrille Malo - Maxime Martin - Clément Daniel - Paul Grasset - Louis Leroux-Géré
• 台文翻譯：An-Li Tsai (NSYSU)

[漢羅] 麒麟鹿座內底 ê NGC 2403

壯麗 ê 島宇宙 NGC 2403 就 chhāi tī 長頷頸 ê 麒麟鹿座 內底。 這个捲螺仔星系 kah 咱 ê 距離差不多是 1000 萬光年，大細 5 萬光年大。 照伊 ê 大細來看，伊 ê 大質量恆星形成 HII 區 敢若是傷大。 這區 ê 紅光，是 ùi 水素原子氣體發出來–ê。 大型 ê HII 區是由一陣高溫大質量恆星提供能量。 這寡恆星上落尾會變做 足光 ê 超新星爆炸，結束 in 短短 ê 一生。 NGC 2403 是 M81 星系群 ê 成員之一。 伊 kah 咱本地星系群其中一个成員，三角座星系 M33，足成–ê。 M33 是一个有足豐富恆星形成區 ê 星系。 這張 NGC 2403 肖像 內底，有 尖尖 形體、較光 ê 恆星是咱銀河系內底 ê 前景星。 Tī 這幅深空闊幅 ê 望遠鏡視野相片內底，閣有銀河系內底 暗暗、厚塗粉 ê 星際雲，這嘛叫做 銀河卷雲 抑是 積分通量星雲 IFN。 毋過 NGC 2403 本身 湠出來 ê 較暗 ê 部份，可能是伊 kah 厝邊星系之間 ê 重力交互作用 產生 ê 潮汐恆星流。

[POJ] Kî-lîn-lo̍k-chō lāi-té ê NGC 2403

Chòng-lē ê tó-ú-tiū NGC 2403 to̍h chhāi tī tn̂g ām-kún ê Kî-lîn-lo̍k-chō lāi-té. Chit-ê kńg-lê-á seng-hē kah lán ê kū-lî chha-put-to sī 1000 bān kng-nî, tōa-sè 5 bān kng-nî tōa. Chiàu i ê tōa-sè lâi-khòaⁿ, i ê tōa chit-liōng hêng-chheⁿ hêng-sêng HII khu káⁿ-nā sī siuⁿ tōa. Chit-khu ê âng-kng, sī ùi chúi-sò͘ goân-chú khì-thé hoat–chhut-lâi–ê. Tōa-hêng ê HII khu sī iû chi̍t-tīn ko-un tōa chit-liōng hêng-chheⁿ thê-kiong lêng-liōng. Chit kóa hêng-chheⁿ siāng-lo̍h-bóe ē piàn-chò chiok kng ê chhiau-sin-seng po̍k-chà, kiat-sok in té-té ê it-seng. NGC 2403 sī M81 seng-hē-kûn ê sêng-oân chi-it. I kah lán Pún-tē Seng-hē-kûn kî-tiong chi̍t-ê sêng-oân, Saⁿ-kak-chō Seng-hē M̀3, chiok sêng–ê. M̀3 sī chi̍t-ê ū chiok hong-hù hêng-chheⁿ hêng-sêng-khu ê seng-hē. Chit-tiuⁿ NGC 2403 siàu-siōng lāi-té, ū chiam-chiam hêng-thé, khah kng ê hêng-chheⁿ sī lán Gîn-hô-hē lāi-té ê chiân-kéng-chheⁿ. Tī chit pak chhim-khong khoah-pak ê bōng-oán-kiàⁿ sī-iá siòng-phìⁿ lāi-té, koh-ū Gîn-hô-hē lāi-té àm-àm, kāu thô͘-hún ê seng-chè-hûn, che mā kiò-chò gîn-hô kńg-hûn ia̍h-sī Chek-hun Thong-liōng Seng-hûn IFN. M̄-koh NGC 2403 pún-sin thòaⁿ–chhut-lâi ê khah àm ê pō͘-hūn, khó-lêng sī i kah chhù-piⁿ seng-hē chi-kan ê tiōng-le̍k kāu-hō͘-chok-iōng sán-seng ê tiau-se̍k hêng-chheⁿ-liû.

[KIP] Kî-lîn-lo̍k-tsō lāi-té ê NGC 2403

Tsòng-lē ê tó-ú-tiū NGC 2403 to̍h tshāi tī tn̂g ām-kún ê Kî-lîn-lo̍k-tsō lāi-té. Tsit-ê kńg-lê-á sing-hē kah lán ê kū-lî tsha-put-to sī 1000 bān kng-nî, tuā-sè 5 bān kng-nî tuā. Tsiàu i ê tuā-sè lâi-khuànn, i ê tuā tsit-liōng hîng-tshenn hîng-sîng HII khu kánn-nā sī siunn tuā. Tsit-khu ê âng-kng, sī uì tsuí-sòo guân-tsú khì-thé huat–tshut-lâi–ê. Tuā-hîng ê HII khu sī iû tsi̍t-tīn ko-un tuā tsit-liōng hîng-tshenn thê-kiong lîng-liōng. Tsit kuá hîng-tshenn siāng-lo̍h-bué ē piàn-tsò tsiok kng ê tshiau-sin-sing po̍k-tsà, kiat-sok in té-té ê it-sing. NGC 2403 sī M81 sing-hē-kûn ê sîng-uân tsi-it. I kah lán Pún-tē Sing-hē-kûn kî-tiong tsi̍t-ê sîng-uân, Sann-kak-tsō Sing-hē M33, tsiok sîng–ê. M33 sī tsi̍t-ê ū tsiok hong-hù hîng-tshenn hîng-sîng-khu ê sing-hē. Tsit-tiunn NGC 2403 siàu-siōng lāi-té, ū tsiam-tsiam hîng-thé, khah kng ê hîng-tshenn sī lán Gîn-hô-hē lāi-té ê tsiân-kíng-tshenn. Tī tsit pak tshim-khong khuah-pak ê bōng-uán-kiànn sī-iá siòng-phìnn lāi-té, koh-ū Gîn-hô-hē lāi-té àm-àm, kāu thôo-hún ê sing-tsè-hûn, tse mā kiò-tsò gîn-hô kńg-hûn ia̍h-sī Tsik-hun Thong-liōng Sing-hûn IFN. M̄-koh NGC 2403 pún-sin thuànn–tshut-lâi ê khah àm ê pōo-hūn, khó-lîng sī i kah tshù-pinn sing-hē tsi-kan ê tiōng-li̍k kāu-hōo-tsok-iōng sán-sing ê tiau-si̍k hîng-tshenn-liû.

[English] NGC 2403 in Camelopardalis

Magnificent island universe NGC 2403 stands within the boundaries of the long-necked constellation Camelopardalis. Some 10 million light-years distant and about 50,000 light-years across, the spiral galaxy also seems to have more than its fair share of giant star forming HII regions, marked by the telltale reddish glow of atomic hydrogen gas. The giant HII regions are energized by clusters of hot, massive stars that explode as bright supernovae at the end of their short and furious lives. A member of the M81 group of galaxies, NGC 2403 closely resembles a galaxy in our own local galaxy group with an abundance of star forming regions, M33, the Triangulum Galaxy. Spiky in appearance, bright stars in this portrait of NGC 2403 are in the foreground, within our own Milky Way. Also in the foreground of the deep, wide-field, telescopic image are the Milky Way’s dim and dusty interstellar clouds also known as galactic cirrus or integrated flux nebulae. But faint features that seem to extend from NGC 2403 itself are likely tidal stellar streams drawn out by gravitational interactions with neighboring galaxies.

詞彙學習（漢羅/POJ/KIP/華語/English）

• 【麒麟鹿座】Kî-lîn-lo̍k-chō/Kî-lîn-lo̍k-tsō/長頸鹿座/Camelopardalis
• 【鹿豹座】Lo̍k-pà-chō/Lo̍k-pà-tsō/鹿豹座/Camelopardalis
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star forming region
• 【HII 區】H two khu/H two khu/HII 區/HII region
• 【超新星爆炸】chhiau-sin-seng po̍k-chà/tshiau-sin-sing po̍k-tsà/超新星爆炸/supernova explosion
• 【本地星系群】Pún-tē Seng-hē-kûn/Pún-tē Sing-hē-kûn/本地星系群/Local Galaxy Group
• 【三角座星系】Saⁿ-kak-chō Seng-hē/Sann-kak-tsō Sing-hē/三角座星系/Triangulum Galaxy
• 【重力交互作用】tiōng-le̍k kāu-hō͘-chok-iōng/tiōng-li̍k kāu-hōo-tsok-iōng/重力交互作用/gravitational interactions
• 【潮汐恆星流】tiâu-se̍k hêng-chheⁿ-liû/tiâu-si̍k hîng-tshenn-liû/潮汐恆星流/tidal stellar stream
• 【前景星】chiân-kéng-chheⁿ/tsiân-kíng-tshenn/前景星/foreground star
• 【星際雲】seng-chè-hûn/sing-tsè-hûn/星際雲/interstellar cloud
• 【銀河卷雲】gîn-hô kńg-hûn/gîn-hô kńg-hûn/銀河卷雲/galactic cirrus
• 【積分通量星雲】Chek-hun Thong-liōng Seng-hûn/Tsik-hun Thong-liōng Sing-hûn/積分通量星雲/integrated flux nebulae (IFN)
• 【M81】M peh-cha̍p-it/M peh-tsa̍p-it/M81/M81
• 【M33】M saⁿ-cha̍p-saⁿ/M sann-tsa̍p-sann/M33/M33
• 【NGC 2403】NGC jī-sù-khòng-sam//NGC jī-sù-khòng-samNGC 2403/NGC 2403