土衛十二 Helene ê 立體相片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Stereo Helene
• 影像來源：Cassini Imaging Team, ISS, JPL, ESA, NASA; 立體影像：Roberto Beltramini
• 台文翻譯：An-Li Tsai (NSYSU)

[漢羅] 土衛十二 Helene ê 立體相片

Kā 你 ê 3D 目鏡提來，囥 tī 土星 ê 細粒冰衛星，土衛十二 Helene 邊仔。 Helene 是一粒 Trojan 衛星，就是 tī Lagrange 點踅土星咧行。 這个名號了袂䆀，因為 Helene 是希臘神話內底，引起 Trojan 戰爭 ê 美女。 Lagrange 點 是 2 粒大質量天體附近 ê 重力穩定點，tī 遮就是 土星 kah 伊上大粒衛星，土衛四 Dione。 實際上，Helene ê 形是不規則形–ê，差不多 36 x 32 x 30 公里大。 伊行 tī Dione 頭前 ê Lagrange 點。 伊 ê 兄弟，土衛三十四 Polydeuces，是行 tī Dione 後壁 ê Lagrange 點。 這張清楚 ê 立體相片 是 kā 2011 年 Cassini 太空船 飛倚 土星 ê 時陣翕–ê 2 張影像合成–ê。 咱看會著 Helene 面對土星這半爿，頂懸有足濟隕石坑 kah 山溝地形。

[POJ] Thó͘-ūi cha̍p-jī Helene ê li̍p-thé siòng-phìⁿ

kā lí ê 3D ba̍k-kiàⁿ the̍h-lâi,khǹg tī Thó͘-chheⁿ ê sè-lia̍p peng ūi-chheⁿ, Thó͘-ūi cha̍p-jī Helene piⁿ-á. Helene sī chi̍t-lia̍p Trojan ūi-chheⁿ, to̍h-sī tī Lagrange tiám se̍h Thó͘-chheⁿ leh kiâⁿ. Chit-ê miâ hō liáu bē-bái, in-ūi Helene sī Hi-lia̍p sîn-ōe lāi-té, ín-khí Trojan chiàn-cheng ê bí-lú. Lagrange tiám sī 2 lia̍p tōa chit-liōng thian-thé hù-kīn ê tiōng-le̍k ún-tēng-tiám, tī chia to̍h-sī Thó͘-chheⁿ kah i siōng tōa-lia̍p ūi-chheⁿ, Thó͘-ūi sì Dione. Si̍t-chè-siōng, Helene ê hêng sī put-kui-chek hêng–ê, chha-put-to 36 sêng 32 sêng 30 kong-lí tōa. I kiâⁿ tī Dione thâu-chêng ê Lagrange tiám. I ê hiaⁿ-tī, Thó͘-ūi saⁿ-cha̍p-sì Polydeuces, sī kiâⁿ tī Dione āu-piah ê Lagrange tiám. Chit-tiuⁿ chheng-chhó ê li̍p-thé siòng-phìⁿ sī kā 2011 nî Cassini thài-khong-chûn poe óa Thó͘-chheⁿ ê sî-chūn hip–ê 2 tiuⁿ iáⁿ-siōng ha̍p-chiâⁿ–ê. Lán khòaⁿ-ē-tio̍h Helene bīn-tùi Thó͘-chheⁿ chit pòaⁿ-pêng, téng-koân ū chiok chē ún-se̍k-kheⁿ kah soaⁿ-kau tē-hêng.

[KIP] Thóo-uī tsa̍p-jī Helene ê li̍p-thé siòng-phìnn

kā lí ê 3D ba̍k-kiànn the̍h-lâi,khǹg tī Thóo-tshenn ê sè-lia̍p ping uī-tshenn, Thóo-uī tsa̍p-jī Helene pinn-á. Helene sī tsi̍t-lia̍p Trojan uī-tshenn, to̍h-sī tī Lagrange tiám se̍h Thóo-tshenn leh kiânn. Tsit-ê miâ hō liáu bē-bái, in-uī Helene sī Hi-lia̍p sîn-uē lāi-té, ín-khí Trojan tsiàn-tsing ê bí-lú. Lagrange tiám sī 2 lia̍p tuā tsit-liōng thian-thé hù-kīn ê tiōng-li̍k ún-tīng-tiám, tī tsia to̍h-sī Thóo-tshenn kah i siōng tuā-lia̍p uī-tshenn, Thóo-uī sì Dione. Si̍t-tsè-siōng, Helene ê hîng sī put-kui-tsik hîng–ê, tsha-put-to 36 sîng 32 sîng 30 kong-lí tuā. I kiânn tī Dione thâu-tsîng ê Lagrange tiám. I ê hiann-tī, Thóo-uī sann-tsa̍p-sì Polydeuces, sī kiânn tī Dione āu-piah ê Lagrange tiám. Tsit-tiunn tshing-tshó ê li̍p-thé siòng-phìnn sī kā 2011 nî Cassini thài-khong-tsûn pue uá Thóo-tshenn ê sî-tsūn hip–ê 2 tiunn iánn-siōng ha̍p-tsiânn–ê. Lán khuànn-ē-tio̍h Helene bīn-tuì Thóo-tshenn tsit puànn-pîng, tíng-kuân ū tsiok tsē ún-si̍k-khenn kah suann-kau tē-hîng.

[English] Stereo Helene

Get out your red/blue glasses and float next to Helene, small, icy moon of Saturn. Appropriately named, Helene is a Trojan moon, so called because it orbits at a Lagrange point. A Lagrange point is a gravitationally stable position near two massive bodies, in this case Saturn and larger moon Dione. In fact, irregularly shaped (about 36 by 32 by 30 kilometers) Helene orbits at Dione’s leading Lagrange point while brotherly ice moon Polydeuces follows at Dione’s trailing Lagrange point. The sharp stereo anaglyph was constructed from two Cassini images captured during a close flyby in 2011. It shows part of the Saturn-facing hemisphere of Helene mottled with craters and gully-like features.

詞彙學習（漢羅/POJ/KIP/華語/English）

• 【3D 目鏡】saⁿ-D ba̍k-kiàⁿ/sann-D ba̍k-kiànn/3D 目鏡/red-blue glasses
• 【土星】Thó͘-chheⁿ/Thóo-tshenn/土星/Saturn
• 【Lagrange 點】Lagrange tiám/Lagrange tiám/拉格朗日點/Lagrange piont
• 【Trojan 衛星】Trojan ūi-chheⁿ/Trojan uī-tshenn/特洛伊衛星/Trojan moon
• 【土衛十二 Helene】Thó͘-ūi cha̍p-jī Helene/Thóo-uī tsa̍p-jī Helene/土衛十二 海倫/Helene
• 【土衛四 Dione】Thó͘-ūi sì Dione/Thóo-uī sì Dione/土衛四 狄俄涅/Dione
• 【土衛三十四 Polydeuces】Thó͘-ūi saⁿ-cha̍p-sì/Thóo-uī sann-tsa̍p-sì/土衛三十四 波呂丟刻斯/Polydeuces
• 【隕石坑】ún-se̍k-kheⁿ/ún-si̍k-khenn/隕石坑/craters
• 【重力穩定點】tiōng-le̍k ún-tēng-tiám/tiōng-li̍k ún-tīng-tiám/重力穩定點/gravitationally stable position