有 X 級太陽爍光 ê 彼个有名 ê 太陽活跳區 轉來矣

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Solar X Flare as Famous Active Region Returns
• 影像來源：NASA, Solar Dynamics Observatory
• 台文翻譯：An-Li Tsai (NSYSU)

[漢羅] 有 X 級太陽爍光 ê 彼个有名 ê 太陽活跳區 轉來矣

伊轉來矣！ 日頭頂懸彼个有名 ê 太陽活跳區 AR 3664，會 tī 地球產生 咱看會著 ê 極光。 伊 這個月初 踅到日頭後壁去，這馬閣踅轉來矣，猶閣活跳跳。 太陽活跳區 AR 3664 昨昏拄踅轉來地球這爿，而且閣一擺爆發 能量足強 ê X 級 太陽爍光。 這支影片主要是欲翕 ùi 倒爿下跤踅轉來 ê 太陽活跳區。 這是 NASA 踅地球 ê 太陽動力學衛星天文台 昨昏 tī 紫外線波段 翕--ê。 這支影片是 太陽自轉 24 點鐘 ê 縮時攝影影片。 咱注意看影片 2 秒 ê 時陣，倒爿下跤 煏出 足強 ê 太陽爍光。 這寡 ùi 太陽爍光 kah 日冕物質噴射 (CME) 來--ê 高能粒子，袂直接挵著地球產生極光。 毋過科學家會 tī 紲落來 2 禮拜 繼續觀察 這个 面對地球、無四常 ê 太陽活跳區，看伊會按怎發展。

[POJ] Ū X kip Thài-iông Sih-kng ê hit-ê ū-miâ ê Thài-iông Oa̍h-thiàu-khu tńg--lâi--ah

I tńg--lâi0-ah! Ji̍t-thâu téng-koân hit-ê ū-miâ ê thài-iông oa̍h-thiàu-khu AR 3664, ē tī Tē-kiû sán-seng lán khòaⁿ-ē-tio̍h ê ke̍k-kng. I chit kò goe̍h-chhe se̍h kàu ji̍t-thâu āu-piah khì, chit-má koh se̍h tńg--lâi--ah, iáu-koh oa̍h-thiàu-thiàu. Thài-iâng oa̍h-thiàu-khu AR 3664 cha-hng tú se̍h tńg-lâi Tē-kiû chit-pêng, jî-chhiáⁿ koh chi̍t-pái po̍k-hoat lêng-liōng chiok kiông ê X kip thài-iông sih-kng. Chit-ki iáⁿ-phìⁿ chú-iàu sī beh hip ùi tò-pêng ē-kha se̍h--tńg-lâi ê thài-iông oa̍h-thiàu-khu. Che-sī NASA se̍h Tē-kiû ê Thài-iông Tāng-le̍k-ha̍k Ūi-chheⁿ Thian-bûn-tâi cha-hng tī chí-gōa-sòaⁿ pho-tōaⁿ hip--ê. Chit-ki iáⁿ-phìⁿ sī Thài-iông chū-choán 24 tiám-cheng ê sok-sî-liap-iáⁿ iáⁿ-phìⁿ. Lán chù-ì khòaⁿ iáⁿ-phìⁿ 2 bió ê sî-chūn, tò-pêng ē-kha piak chhut chiok kiông ê thài-iông sih-kng. Chit kóa ùi thài-iông sih-kng kah ji̍t bián bu̍t-chit phùn-siā(CME)lâi--ê ko lêng lia̍p-chú,bē ti̍t-chiap lòng-tio̍h tē-kiû sán-seng ke̍k-kng. M̄-koh kho-ha̍k-ka ē tī sòa--lo̍h-lâi 2 lé-pài kè-sio̍k koan-chhat chit-ê bīn-tùi Tē-kiû, bô sù-siông ê thài-iông oa̍h-thiàu-khu, khòaⁿ i ē án-chóaⁿ hoat-tián.

[KIP] Ū X kip Thài-iông Sih-kng ê hit-ê ū-miâ ê Thài-iông Ua̍h-thiàu-khu tńg--lâi--ah

I tńg--lâi0-ah! Ji̍t-thâu tíng-kuân hit-ê ū-miâ ê thài-iông ua̍h-thiàu-khu AR 3664, ē tī Tē-kiû sán-sing lán khuànn-ē-tio̍h ê ki̍k-kng. I tsit kò gue̍h-tshe se̍h kàu ji̍t-thâu āu-piah khì, tsit-má koh se̍h tńg--lâi--ah, iáu-koh ua̍h-thiàu-thiàu. Thài-iâng ua̍h-thiàu-khu AR 3664 tsa-hng tú se̍h tńg-lâi Tē-kiû tsit-pîng, jî-tshiánn koh tsi̍t-pái po̍k-huat lîng-liōng tsiok kiông ê X kip thài-iông sih-kng. Tsit-ki iánn-phìnn tsú-iàu sī beh hip uì tò-pîng ē-kha se̍h--tńg-lâi ê thài-iông ua̍h-thiàu-khu. Tse-sī NASA se̍h Tē-kiû ê Thài-iông Tāng-li̍k-ha̍k Uī-tshenn Thian-bûn-tâi tsa-hng tī tsí-guā-suànn pho-tuānn hip--ê. Tsit-ki iánn-phìnn sī Thài-iông tsū-tsuán 24 tiám-tsing ê sok-sî-liap-iánn iánn-phìnn. Lán tsù-ì khuànn iánn-phìnn 2 bió ê sî-tsūn, tò-pîng ē-kha piak tshut tsiok kiông ê thài-iông sih-kng. Tsit kuá uì thài-iông sih-kng kah ji̍t bián bu̍t-tsit phùn-siā(CME)lâi--ê ko lîng lia̍p-tsú,bē ti̍t-tsiap lòng-tio̍h tē-kiû sán-sing ki̍k-kng. M̄-koh kho-ha̍k-ka ē tī suà--lo̍h-lâi 2 lé-pài kè-sio̍k kuan-tshat tsit-ê bīn-tuì Tē-kiû, bô sù-siông ê thài-iông ua̍h-thiàu-khu, khuànn i ē án-tsuánn huat-tián.

[English] Solar X Flare as Famous Active Region Returns

It's back. The famous active region on the Sun that created auroras visible around the Earth earlier this month has survived its rotation around the far side of the Sun -- and returned. Yesterday, as it was beginning to reappear on the Earth-facing side, the region formerly labeled AR 3664 threw another major solar flare, again in the highest-energy X-class range. The featured video shows the emerging active region on the lower left, as it was captured by NASA's Earth-orbiting Solar Dynamics Observatory yesterday in ultraviolet light. The video is a time-lapse of the entire Sun rotating over 24 hours. Watch the lower-left region carefully at about the 2-second mark to see the powerful flare burst out. The energetic particles from that flare and associated CME are not expected to directly impact the Earth and trigger impressive auroras, but scientists will keep a close watch on this unusually active region over the next two weeks, as it faces the Earth, to see what develops.

詞彙學習