太空中看著 ê Manicouagan 隕石坑

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Manicouagan Impact Crater from Space
• 影像來源：NASA, 國際太空站 Expedition 59
• 台文翻譯：An-Li Tsai (NSYSU)

[漢羅] 太空中看著 ê Manicouagan 隕石坑

4 月 11 這工，國際太空站 第 59 號 探險隊 tī 加拿大 魁北克省 天頂 400 公里懸 ê 所在，翕著足大港 ê St. Lawrence 河 kah 足趣味 ê 圓箍仔形湖。 中央正爿有一个 現代化 ê 水庫，就 tī 這个直徑 100 公里大、古早時代就有，毋閣去予侵蝕留落來 ê 隕石坑內底。 Tī 軌道頂懸 看這个古早時代就有 ê 隕石坑是足清楚--ê。 這表示講，地球定定受著 太空石頭 ê 威脅。 Manicouagan 隕石坑已經有 2 億外年 ê 歷史矣。 伊可能是去予直徑 5 公里大 ê 石頭挵出來--ê。 目前咱猶袂揣著會 tī 紲落來 100 冬內 挵著地球 ê 小行星。 NASA 行星防禦協調辦公室 逐個月攏會 公佈新 ê 資料，包括 近地天體 最近 ê 特寫相片，kah 其他可能會挵著地球 ê 彗星 抑是 小行星。

[POJ] Thài-khong-tiong khòaⁿ--tio̍h ê Manicouagan ún-se̍k-kheⁿ

4 goe̍h 11 chit kang, Kok-chè Thài-khong-chām tē 59 hō thàm-hiám-tūi tī Ka-ná-tāi Khoe-pak-khek séng thiⁿ-téng 400 kong-lí koân ê só͘-chāi, hip-tio̍h chiok tōa-káng ê St. Lawrence hô kah chiok chhù-bī ê îⁿ-kho͘-á-hêng ô͘. Tiong-ng chiàⁿ-pêng ū chi̍t-ê hiān-tāi-hòa ê chúi-khò͘, to̍h tī chit-ê ti̍t-kèng 100 kong-lí tōa, kó͘-chá sî-tāi tō ū, m̄-koh khì hō͘ chhim-sit lâu--lo̍h-lâi ê ún-se̍k-kheⁿ lāi-té. Tī kúi-tō téng-koân khòaⁿ chit-ê kó͘-chá sî-tāi tō ū ê ún-se̍k-kheⁿ sī chiok chheng-chhó--ê. Che piáu-sī kóng, Tē-kiû tiāⁿ-tiāⁿ siū-tio̍h thài-khong chio̍h-thâu ê ui-hia̍p. Manicouagan ún-se̍k-kheⁿ í-keng ū 2 ek gōa nî ê le̍k-sú--ah. I khó-lêng sī khì hō͘ ti̍t-kèng 5 kong-lí tōa ê chio̍h-thâu lòng--chhut-lâi--ê. Bo̍k-chêng lán iáu-bē chhōe-tio̍h ē tī sòa--lo̍h-lâi 100 tang lāi lòng-tio̍h Tē-kiû ê sió-kiâⁿ-chheⁿ. NASA Kiâⁿ-chheⁿ Hông-gū Hia̍p-tiau Pān-kong-sek ta̍k kò goe̍h lóng ē kong-pò͘ sin ê chu-liāu, pau-koat kīn-tē thian-thé chòe-kīn ê te̍k-siá siòng-phìⁿ, kah kî-thaⁿ khó-lêng ē lòng-tio̍h Tē-kiû ê hūi-chheⁿ ia̍h-sī sió-kiâⁿ-chheⁿ.

[KIP] Thài-khong-tiong khuànn--tio̍h ê Manicouagan ún-si̍k-khenn

4 gue̍h 11 tsit kang, Kok-tsè Thài-khong-tsām tē 59 hō thàm-hiám-tuī tī Ka-ná-tāi Khue-pak-khik síng thinn-tíng 400 kong-lí kuân ê sóo-tsāi, hip-tio̍h tsiok tuā-káng ê St. Lawrence hô kah tsiok tshù-bī ê înn-khoo-á-hîng ôo. Tiong-ng tsiànn-pîng ū tsi̍t-ê hiān-tāi-huà ê tsuí-khòo, to̍h tī tsit-ê ti̍t-kìng 100 kong-lí tuā, kóo-tsá sî-tāi tō ū, m̄-koh khì hōo tshim-sit lâu--lo̍h-lâi ê ún-se̍k-khenn lāi-té. Tī kuí-tō tíng-kuân khuànn tsit-ê kóo-tsá sî-tāi tō ū ê ún-se̍k-khenn sī tsiok tshing-tshó--ê. Tse piáu-sī kóng, Tē-kiû tiānn-tiānn siū-tio̍h thài-khong tsio̍h-thâu ê ui-hia̍p. Manicouagan ún-se̍k-khenn í-king ū 2 ik guā nî ê li̍k-sú--ah. I khó-lîng sī khì hōo ti̍t-kìng 5 kong-lí tuā ê tsio̍h-thâu lòng--tshut-lâi--ê. Bo̍k-tsîng lán iáu-bē tshuē-tio̍h ē tī suà--lo̍h-lâi 100 tang lāi lòng-tio̍h Tē-kiû ê sió-kiânn-tshenn. NASA Kiânn-tshenn Hông-gū Hia̍p-tiau Pān-kong-sik ta̍k kò gue̍h lóng ē kong-pòo sin ê tsu-liāu, pau-kuat kīn-tē thian-thé tsuè-kīn ê ti̍k-siá siòng-phìnn, kah kî-thann khó-lîng ē lòng-tio̍h Tē-kiû ê huī-tshenn ia̍h-sī sió-kiânn-tshenn.

[English] Manicouagan Impact Crater from Space

Orbiting 400 kilometers above Quebec, Canada, planet Earth, the International Space Station Expedition 59 crew captured this snapshot of the broad St. Lawrence River and curiously circular Lake Manicouagan on April 11. Right of center, the ring-shaped lake is a modern reservoir within the eroded remnant of an ancient 100 kilometer diameter impact crater. The ancient crater is very conspicuous from orbit, a visible reminder that Earth is vulnerable to rocks from space. Over 200 million years old, the Manicouagan crater was likely caused by the impact of a rocky body about 5 kilometers in diameter. Currently, there is no known asteroid with a significant probability of impacting Earth in the next century. Each month, NASA’s Planetary Defense Coordination Office releases an update featuring the most recent figures on near-Earth object close approaches, and other facts about comets and asteroids that could pose a potential impact hazard with Earth.

詞彙學習