瑞典天頂 ê 青色極光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Green Aurora over Sweden
• 影像來源 kah 版權：Göran Strand
• 天頂予你 ê 禮物：What picture did APOD feature on your birthday? (post 1995)
• 台文翻譯：An-Li Tsai (NSYSU)

[漢羅] 瑞典天頂 ê 青色極光

有一个明亮 ê 青色極光迒過規个天頂。 這个極光景色是 2016 年 tī 瑞典 Östersund ê 庄跤翕--ê。 攝影師 kā 6 張相片合併做這張欲 180 度 ê 全景圖。 這个 極光 上引人注意 ê 部份就是伊 ê 外形就親像是虹。 前景是 Storsjön 湖，極光後壁 ê 天頂有幾若个咱熟似 ê 星座 kah 北極星。 是講誠拄仔，極光 無閘著 倒爿下跤 ê 月娘。 極光出現了後 隔轉工，太陽日冕 頂懸出現 一大空，予能量特別懸 ê 粒子流入去 太陽系 內底。 青色極光 是 地球頂層大氣 內底 ê 酸素 原子 kah 電子 重新結合產生--ê。

[POJ] Sūi-tián thiⁿ-téng ê Chheⁿ-sek Ke̍k-kng

Ū chi̍t-ê bêng liāng ê chheⁿ-sek ke̍k-kng hāⁿ-kòe kui-ê thiⁿ-téng. Chit-ê ke̍k-kng kéng-sek sī 2016 nî tī Sūi-tián Östersund ê chng-kha hip--ê. Liap-iáⁿ-su kā 6 tiuⁿ siòng-phìⁿ ha̍p-pèng chò chit-tiuⁿ beh 180 tō͘ ê choân-kéng-tô͘. Chit-ê ke̍k-kng siōng ín-lâng chù-ì ê pō͘-hūn tio̍h-sī i ê gōa-hêng to̍h chhin-chhiūⁿ sī khēng. Chiân-kéng sī Storsjön ô͘, ke̍k-kng āu-piah ê thiⁿ-téng ū kúi-nā ê lán se̍k-sāi ê seng-chō kah pak-ke̍k-chheⁿ. Sī-kóng chiâⁿ tú-á, ke̍k-kng bô cha̍h-tio̍h tò-pêng ē-kha ê goe̍h-niû. Ke̍k-kng chhut-hiān liáu-āu keh-tńg-kang, Thài-iông ji̍t bián téng-koân chhut-hiān chi̍t tōa-khang, hō͘ lêng-liōng te̍k-pia̍t koân ê lia̍p-chú lâu ji̍p-khì Thài-iông-hē lāi-té. Chheⁿ-sek ke̍k-kng sī Tē-kiû téng-chân tāi-khì lāi-té ê sàng-sò͘ goân-chú kah tiān-chú tiông-sin kiat-ha̍p sán seⁿ--ê.

[KIP] Suī-tián thinn-tíng ê Tshenn-sik Ki̍k-kng

Ū tsi̍t-ê bîng liāng ê tshenn-sik ki̍k-kng hānn-kuè kui-ê thinn-tíng. Tsit-ê ki̍k-kng kíng-sik sī 2016 nî tī Suī-tián Östersund ê tsng-kha hip--ê. Liap-iánn-su kā 6 tiunn siòng-phìnn ha̍p-pìng tsò tsit-tiunn beh 180 tōo ê tsuân-kíng-tôo. Tsit-ê ki̍k-kng siōng ín-lâng tsù-ì ê pōo-hūn tio̍h-sī i ê guā-hîng to̍h tshin-tshiūnn sī khīng. Tsiân-kíng sī Storsjön ôo, ki̍k-kng āu-piah ê thinn-tíng ū kuí-nā ê lán si̍k-sāi ê sing-tsō kah pak-ki̍k-tshenn. Sī-kóng tsiânn tú-á, ki̍k-kng bô tsa̍h-tio̍h tò-pîng ē-kha ê gue̍h-niû. Ki̍k-kng tshut-hiān liáu-āu keh-tńg-kang, Thài-iông ji̍t bián tíng-kuân tshut-hiān tsi̍t tuā-khang, hōo lîng-liōng ti̍k-pia̍t kuân ê lia̍p-tsú lâu ji̍p-khì Thài-iông-hē lāi-té. Tshenn-sik ki̍k-kng sī Tē-kiû tíng-tsân tāi-khì lāi-té ê sàng-sòo guân-tsú kah tiān-tsú tiông-sin kiat-ha̍p sán senn--ê.

[English] Green Aurora over Sweden

It was bright and green and stretched across the sky. This striking aurora display was captured in 2016 just outside of Östersund, Sweden. Six photographic fields were merged to create the featured panorama spanning almost 180 degrees. Particularly striking aspects of this aurora include its sweeping arc-like shape and its stark definition. Lake Storsjön is seen in the foreground, while several familiar constellations and the star Polaris are visible through the aurora, far in the background. Coincidently, the aurora appears to avoid the Moon visible on the lower left. The aurora appeared a day after a large hole opened in the Sun's corona, allowing particularly energetic particles to flow out into the Solar System. The green color of the aurora is caused by oxygen atoms recombining with ambient electrons high in the Earth's atmosphere.

詞彙學習