北天 ê 極光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：North Celestial Aurora
• 影像來源 kah 版權：Chirag Upreti
• 極光恐龍：報你看著 ê 極光
• 台文翻譯：An-Li Tsai (NSYSU)

[漢羅] 北天 ê 極光

Tī 這个彩色夜景內底，這寡 恆星軌跡 ê 優雅弧線，反映 ê 是地球逐工 ê 自轉。 為著欲製造這張 縮時攝影 合成相片，攝影師 tī 5 月 12 這工 tiàm 美國 紐約 Catskills 區 ê Ashokan 水庫 水岸，kā kha-mé-lah 固定 tī 三跤馬頂懸，連紲翕幾若張相片。 北極星 就 tī 恆星軌跡弧線 ê 中心附近。 倒爿較大箍 ê 恆星軌跡 是頂月眉，投影 tī 水庫頂懸，產生強烈 ê 倒影。 因為 強烈 ê 太陽活動 引起 最近 ê 地磁風暴，所以 真罕得看著 ê 彩色北極光，嘛 tī 有 北極星 kah 北天極 ê 夜空中閃閃爍爍。

[POJ] Pak-thian ê Ke̍k-kng

Tī chit-ê chhái-sek iā-kéng lāi-té, chit kóa hêng-chheⁿ khúi-jiah ê iu-ngá hô͘-sòaⁿ, hoán-èng ê sī Tē-kiû ta̍k-kang ê chū-choán. Ūi tio̍h beh chè-chō chit-tiuⁿ sok-sî-liap-iáⁿ ha̍p-sêng siòng-phìⁿ, liap-iáⁿ-su tī 5 goe̍h 12 chit kang tiàm Bí-kok Niú-iok Catskills khu ê Ashokan chúi-khò͘ chúi-hōaⁿ, kā kha-mé-lah kò͘-tēng tī saⁿ-kha-bé téng-koân, liân-sòa hip kúi-nā tiuⁿ siòng-phìⁿ. Pak-ke̍k-chheⁿ to̍h tī hêng-chheⁿ khúi-jiah hô͘-sòaⁿ ê tiong-sim hù-kīn. Tò-pêng khah tōa-kho͘ ê hêng-chheⁿ khúi-jiah sī téng-goe̍h-bâi, tâu-iáⁿ tī chúi-khò͘ téng-koân, sán-seng kiông-lia̍t ê tò-iáⁿ. In-ūi kiông-lia̍t ê Thài-iông oa̍h-tāng ín-khí chòe-kīn ê tē-chû hong-pō, só͘-í chin hán-tit khòaⁿ-tio̍h ê chhái-sek pak-ke̍k-kng, mā tī ū Pak-ke̍k-chheⁿ kah pak-thian-ke̍k ê iā-khong tiong siám-siám-sih-sih.

[KIP] Pak-thian ê Ki̍k-kng

Tī tsit-ê tshái-sik iā-kíng lāi-té, tsit kuá hîng-tshenn khuí-jiah ê iu-ngá hôo-suànn, huán-ìng ê sī Tē-kiû ta̍k-kang ê tsū-tsuán. Uī tio̍h beh tsè-tsō tsit-tiunn sok-sî-liap-iánn ha̍p-sîng siòng-phìnn, liap-iánn-su tī 5 gue̍h 12 tsit kang tiàm Bí-kok Niú-iok Catskills khu ê Ashokan tsuí-khòo tsuí-huānn, kā kha-mé-lah kòo-tīng tī sann-kha-bé tíng-kuân, liân-suà hip kuí-nā tiunn siòng-phìnn. Pak-ki̍k-tshenn to̍h tī hîng-tshenn khuí-jiah hôo-suànn ê tiong-sim hù-kīn. Tò-pîng khah tuā-khoo ê hîng-tshenn khuí-jiah sī tíng-gue̍h-bâi, tâu-iánn tī tsuí-khòo tíng-kuân, sán-sing kiông-lia̍t ê tò-iánn. In-uī kiông-lia̍t ê Thài-iông ua̍h-tāng ín-khí tsuè-kīn ê tē-tsû hong-pō, sóo-í tsin hán-tit khuànn-tio̍h ê tshái-sik pak-ki̍k-kng, mā tī ū Pak-ki̍k-tshenn kah pak-thian-ki̍k ê iā-khong tiong siám-siám-sih-sih.

[English] North Celestial Aurora

Graceful star trail arcs reflect planet Earth's daily rotation in this colorful night skyscape. To create the timelapse composite, on May 12 consecutive exposures were recorded with a camera fixed to a tripod on the shores of the Ashokan Reservoir, in the Catskills region of New York, USA. North star Polaris is near the center of the star trail arcs. The broad trail of a waxing crescent Moon is on the left, casting a strong reflection across the reservoir waters. With intense solar activity driving recent geomagnetic storms, the colorful aurora borealis or northern lights, rare to the region, shine under Polaris and the north celestial pole.

詞彙學習