16. May 2024
美國 Georgia 州 ê 極光
![Page(/daily/2024/05/20240516)](https://apod.nasa.gov/apod/image/2405/WrightDobbs_Georgia_Aurora_2_1024.jpg)
探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3。
- 原始文章:Aurora Georgia
- 影像來源 kah 版權:Wright Dobbs
- 極光恐龍:報你看著 ê 極光
- 台文翻譯:An-Li Tsai (NSYSU)
[漢羅] 美國 Georgia 州 ê 極光
這是 tī 美國 Georgia 州庄跤暗暝定定看著 ê 景色:天頂 ê 月娘 tī 西爿地平線欲落去矣。 相片是 tī 當地時間 5 月 10 號翻點進前翕--ê,因為感光時間傷長,倒爿彼粒頂月眉煞傷光。 前景有一台長長 ê 灌溉設備,迒過 Bainbridge 市北方 24 公里遠 ê 農地面頂。 這个 tī Georgia 州南部暗暝天頂 閃閃爍爍 ê 極光 khă-tián,確實是真罕得看著 ê 景色。 太陽活跳區 AR 3664 最近 ê 強烈活動,引起地球極端地磁風暴,予本底干焦 tī 南北極才看會著 ê 極光,tī 頂禮拜拜六禮拜 ê 時陣,變做 tī Georgia 州南部、甚至 tī 地球閣較低緯度 ê 所在嘛看會著。 太陽活動力若愈強,地球就會發生愈濟地磁風暴。
[POJ] Bí-kok Georgia chiu ê Ke̍k-kng
Che-sī tī Bí-kok Georgia chiu chng-kha àm-mê tiāⁿ-tiāⁿ khòaⁿ-tio̍h ê kéng-sek: thiⁿ-téng ê goe̍h-niû tī sai-pêng tē-pêng-sòaⁿ beh lo̍k khì-ah. Siòng-phìⁿ sī tī tong-tē sî-kan 5 goe̍h 10 hō hoan-tiám chìn-chêng hip--ê,in-ūi kám kng Sî-kan siuⁿ tn̂g,tò-pêng hit lia̍p téng-goe̍h-bâi soah siuⁿ kng. Chiân-kéng ū chi̍t tâi tn̂g-tn̂g ê koàn-kài siat-pī, hāⁿ-kòe Bainbridge chhī pak-hong 24 kong-lí hn̄g ê lông-tē bīn-téng. Chit-ê tī Georgia chiu lâm-pō͘ àm-mê thiⁿ-téng siám-siám-sih-sih ê ke̍k-kng kha̋-tián, khak-si̍t sī chin hán-tit khòaⁿ-tio̍h ê kéng-sek. Thài-iông oa̍h-thiàu-khu AR 3664 chòe-kīn ê kiông-lia̍t oa̍h-tōng, ín-khí Tē-kiû ke̍k-toan Tē-chû hong-pō, hō͘ pún-té kan-na tī lâm pak-ke̍k chiah khòaⁿ-ē-tio̍h ê ke̍k-kng, tī téng-lé-pài pài-la̍k-lé-pài ê sî-chūn, piàn-chò tī Georgia chiu lâm-pō͘, sīm-chì tī Tē-kiû koh-khah kē hūi-tō͘ ê só͘-chāi mā khòaⁿ-ē-tio̍h. Thài-iông oa̍h-tōng-le̍k nā jú kiông, Tē-kiû to̍h ē hoat-seng jú chē tē-chû hong-pō.
[KIP] Bí-kok Georgia tsiu ê Ki̍k-kng
Tse-sī tī Bí-kok Georgia tsiu tsng-kha àm-mê tiānn-tiānn khuànn-tio̍h ê kíng-sik: thinn-tíng ê gue̍h-niû tī sai-pîng tē-pîng-suànn beh lo̍k khì-ah. Siòng-phìnn sī tī tong-tē sî-kan 5 gue̍h 10 hō huan-tiám tsìn-tsîng hip--ê,in-uī kám kng Sî-kan siunn tn̂g,tò-pîng hit lia̍p tíng-gue̍h-bâi suah siunn kng. Tsiân-kíng ū tsi̍t tâi tn̂g-tn̂g ê kuàn-kài siat-pī, hānn-kuè Bainbridge tshī pak-hong 24 kong-lí hn̄g ê lông-tē bīn-tíng. Tsit-ê tī Georgia tsiu lâm-pōo àm-mê thinn-tíng siám-siám-sih-sih ê ki̍k-kng kha̋-tián, khak-si̍t sī tsin hán-tit khuànn-tio̍h ê kíng-sik. Thài-iông ua̍h-thiàu-khu AR 3664 tsuè-kīn ê kiông-lia̍t ua̍h-tōng, ín-khí Tē-kiû ki̍k-tuan Tē-tsû hong-pō, hōo pún-té kan-na tī lâm pak-ki̍k tsiah khuànn-ē-tio̍h ê ki̍k-kng, tī tíng-lé-pài pài-la̍k-lé-pài ê sî-tsūn, piàn-tsò tī Georgia tsiu lâm-pōo, sīm-tsì tī Tē-kiû koh-khah kē huī-tōo ê sóo-tsāi mā khuànn-ē-tio̍h. Thài-iông ua̍h-tōng-li̍k nā jú kiông, Tē-kiû to̍h ē huat-sing jú tsē tē-tsû hong-pō.
[English] Aurora Georgia
A familiar sight from Georgia, USA, the Moon sets near the western horizon in this rural night skyscape. Captured on May 10 before local midnight, the image overexposes the Moon's bright waxing crescent at left in the frame. A long irrigation rig stretches across farmland about 15 miles north of the city of Bainbridge. Shimmering curtains of aurora shine across the starry sky, definitely an unfamiliar sight for southern Georgia nights. Last weekend, extreme geomagnetic storms triggered by the recent intense activity from solar active region AR 3664 brought epic displays of aurora, usually seen closer to the poles, to southern Georgia and even lower latitudes on planet Earth. As solar activity ramps up, more storms are possible.
詞彙學習(漢羅/POJ/KIP/華語/English)
- 【極光】ke̍k-kng/ki̍k-kng/極光/aurora
- 【地磁風暴】tē-chû hong-pō/tē-tsû hong-pō/地磁風暴/geomagnetic storm
- 【緯度】hūi-tō͘/huī-tōo/緯度/latitudes
- 【灌溉設備】koàn-kài siat-pī/kuàn-kài siat-pī/灌溉設備/irrigation rig
- 【khă-tián】khă-tián/kha̋-tián/布簾/curtain
- 【太陽活跳區】thài-iông oa̍h-thiàu-khu/thài-iông ua̍h-thiàu-khu/太陽活躍區/active region
- 【AR 3664】AR sam-lio̍k-lio̍k-sù/AR sam-lio̍k-lio̍k-sù/AR 3664/AR 3664
- 【翻點】hoan-tiám/huan-tiám/半夜/midnight
- 【頂月眉】téng-goe̍h-bâi/tíng-gue̍h-bâi/上弦月/waxing crescent