14. May 2024
星團 37
![Page(/daily/2024/05/20240514)](https://apod.nasa.gov/apod/image/2405/NGC2169LRGBQHY183HR_c1024.jpg)
探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3。
- 原始文章:The 37 Cluster
- 影像來源 kah 版權:Sergio Eguivar
- 相簿:Earth Aurora from Solar Active Region 3664
- 台文翻譯:An-Li Tsai (NSYSU)
[漢羅] 星團 37
Tùi 大部份地球人來講,開放星團 NGC 2169 看起來就敢若是宇宙 ê 數字 37。 抑是你感覺這是數字 42? Ùi 咱 ê 角度來看,這个無可能 ê 數字 星群 出現 tī 遮完全是巧合。 伊是 tī 獵戶座 方向 3300 光年遠 ê 所在。 Tùi 銀河系抑是開放星團來講,NGC 2169 是一个細粒星團,才 7 光年闊爾爾。 NGC 2169 ê 恆星 是 ùi 仝一團塗粉氣體生出來--ê,in ê 年歲才 1100 萬歲爾爾。 時間若長,這款 星團 tī 銀河系 內底會 拄著 其他恆星、星際雲,受著引潮力影響,就會散去。 40 外億年前,咱 ê 太陽嘛有可能是 tī 類似 ê 開放星團 內底形成--ê。
[POJ] Seng-thoân 37
Tùi tōa-pō͘-hūn tē-kiû-lâng lâi-kóng, khai-hòng seng-thoân NGC 2169 khòaⁿ--khí-lâi tō káⁿ ná-sī ú-tiū ê sò͘-jī 37. Ia̍h-sī lí kám-kak che-sī sò͘-jī 42? Ùi lán ê kak-tō͘ lâi-khòaⁿ, chit-ê bô-khó-lêng ê sò͘-jī seng-kûn chhut-hiān tī chia oân-choân sī khá-ha̍p. I sī tī La̍h-hō͘-chō hong-hiòng 3300 kng-nî hn̄g ê só͘-chāi. Tùi Gîn-hô-hē ia̍h-sī khai-hòng seng-thoân lâi-kóng, NGC 2169 sī chi̍t-ê sè-lia̍p seng-thoân, chiah 7 kng-nî khoah niā-niā. NGC 2169 ê hêng-chheⁿ sī ùi kāng chi̍t thoân thô͘-hún khì-thé seⁿ--chhut-lâi--ê, in ê nî-hòe chiah 1100 bān-sòe niā-niā. Sî-kan nā tn̂g, chit-khoán seng-thoân tī Gîn-hô-hē lāi-té ē tú-tio̍h kî-thaⁿ hêng-chheⁿ, seng-chè-hûn, siū-tio̍h ín-tiau-le̍k éng-hióng, to̍h ē sòaⁿ--khì. 40 gōa ek nî-chêng, lán ê thài-iông mā ū khó-lêng sī tī lūi-sū ê khai-hòng seng-thoân lāi-té hêng-sêng--ê.
[KIP] Sing-thuân 37
Tuì tuā-pōo-hūn tē-kiû-lâng lâi-kóng, khai-hòng sing-thuân NGC 2169 khuànn--khí-lâi tō kánn ná-sī ú-tiū ê sòo-jī 37. Ia̍h-sī lí kám-kak tse-sī sòo-jī 42? Uì lán ê kak-tōo lâi-khuànn, tsit-ê bô-khó-lîng ê sòo-jī sing-kûn tshut-hiān tī tsia uân-tsuân sī khá-ha̍p. I sī tī La̍h-hōo-tsō hong-hiòng 3300 kng-nî hn̄g ê sóo-tsāi. Tuì Gîn-hô-hē ia̍h-sī khai-hòng sing-thuân lâi-kóng, NGC 2169 sī tsi̍t-ê sè-lia̍p sing-thuân, tsiah 7 kng-nî khuah niā-niā. NGC 2169 ê hîng-tshenn sī uì kāng tsi̍t thuân thôo-hún khì-thé senn--tshut-lâi--ê, in ê nî-huè tsiah 1100 bān-suè niā-niā. Sî-kan nā tn̂g, tsit-khuán sing-thuân tī Gîn-hô-hē lāi-té ē tú-tio̍h kî-thann hîng-tshenn, sing-tsè-hûn, siū-tio̍h ín-tiau-li̍k íng-hióng, to̍h ē suànn--khì. 40 guā ik nî-tsîng, lán ê thài-iông mā ū khó-lîng sī tī luī-sū ê khai-hòng sing-thuân lāi-té hîng-sîng--ê.
[English] The 37 Cluster
For the mostly harmless denizens of planet Earth, the brighter stars of open cluster NGC 2169 seem to form a cosmic 37. Did you expect 42? From our perspective, the improbable numerical asterism appears solely by chance. It lies at an estimated distance of 3,300 light-years toward the constellation Orion. As far as galactic or open star clusters go, NGC 2169 is a small one, spanning about 7 light-years. Formed at the same time from the same cloud of dust and gas, the stars of NGC 2169 are only about 11 million years old. Such clusters are expected to disperse over time as they encounter other stars, interstellar clouds, and experience gravitational tides while hitchhiking through the galaxy. Over four billion years ago, our own Sun was likely formed in a similar open cluster of stars.
詞彙學習(漢羅/POJ/KIP/華語/English)
- 【獵戶座】La̍h-hō͘-chō/La̍h-hōo-tsō/獵戶座/Orion
- 【星群】seng-kûn/sing-kûn/星群/asterism
- 【開放星團】khai-hòng seng-thoân/khai-hòng sing-thuân/開放星團/open cluster of stars
- 【NGC 2169】NGC jī-it-lio̍k-kiú/NGC jī-it-lio̍k-kiú/NGC 2169/NGC 2169