日落時 ê 太陽活跳區 AR 3664

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：AR 3664 on a Setting Sun
• 影像來源 kah 版權：Marco Meniero
• 相簿：Earth Aurora from Solar Active Region 6443
• 台文翻譯：An-Li Tsai (NSYSU)

[漢羅] 日落時 ê 太陽活跳區 AR 3664

伊比地球閣較大。 伊大甲毋免閣放大，你就會當 tī 太陽 表面看著伊。 伊有強大 複雜 ê 磁場 kah 足濟 烏烏 ê 太陽烏子。 伊去予標做 AR 3664，最近這幾年來愈變愈大區，這馬已經是上大區矣，而且引起連紲爆炸，造成大量高能粒子去攏地球，形成 美麗 ê 極光。 而且可能會繼續落去。 就算像 AR 3664 這款 太陽活跳區 足危險–ê，這區 ê 日冕物質噴射 (CME) 猶未 tùi 地球軌道衛星 抑是 地球表面電力網路 造成嚴重 ê 傷害。 相片 內底是幾若工前 tī 意大利 羅馬 Civitavecchia 日落 ê 時陣翕著 ê 大區太陽活跳區。 合成影像 包括短時間感光 ê 太陽表面，kah 模擬實際上看會著 ê 景色。 上落尾，AR 3664 這馬 tī 太陽表面是 愈踅愈離開 地球，而且這區可能會 活到伊閣踅轉來。

[POJ] Ji̍t-lo̍h sî ê Thài-iông Oa̍h-thiàu-khu AR 3664

I pí Tē-kiû koh-khah tōa. I tōa kah m̄-bián koh hòng-tōa, lí to̍h ē-tàng tī Thài-iông piáu-bīn khòaⁿ-tio̍h i. I ū kiông-tāi ho̍k-cha̍p ê chû-tiûⁿ kah chiok chē o͘-o͘ ê Thài-iông o͘-chú. I khì hō͘ pio chò AR 3664, chòe-kīn chit kúi nî lâi lú piàn jú tōa khu, chit-má í-keng sī siōng-tōa khu–ah, jî-chhiáⁿ ín-khí liân-sòa po̍k-chà, chō-sêng tāi-liōng ko-lêng lia̍p-chú khì lóng Tē-kiû, hêng-sêng bí-lē ê ke̍k-kng. Jî-chhiáⁿ khó-lêng ē kè-sio̍k lo̍h-khì. Tō-sǹg chhiūⁿ AR 3664 chit-khoán Thài-iông Oa̍h-thiàu-khu chiok hûi-hiám–ê, chit khu ê Ji̍t-bián Bu̍t-chit Phùn-siā (CME) iáu-bōe tùi Tē-kiû kúi-tō ūi-chhiⁿ ia̍h-sī Tē-kiû piáu-bīn tiān-le̍k bāng-lō͘ chō-sêng giâm-tiōng ê siong-hāi. Siòng-phìⁿ lāi-té sī kúi-nā kang chêng tī I-tá-lī Lô-má Civitavecchia ji̍t-lo̍h ê sî-chūn hip-tio̍h ê tōa khu Thài-iông Oa̍h-thiàu-khu. Ha̍p-sêng iáⁿ-siōng pau-koat té sî-kan kám-kng ê Thài-iông piáu-bīn, kah bô͘-gí si̍t-chè-siōng khòaⁿ–ē-tio̍h ê kéng-sek. Siāng-lo̍h-bóe, AR 3664 chit-má tī Thài-iông piáu-bīn sī jú se̍h jú lī-khui Tē-kiû, jî-chhiáⁿ chit khu khó-lêng ē oa̍h kàu i koh se̍h tńg-lâi.

[KIP] Ji̍t-lo̍h sî ê Thài-iông Ua̍h-thiàu-khu AR 3664

I pí Tē-kiû koh-khah tuā. I tuā kah m̄-bián koh hòng-tuā, lí to̍h ē-tàng tī Thài-iông piáu-bīn khuànn-tio̍h i. I ū kiông-tāi ho̍k-tsa̍p ê tsû-tiûnn kah tsiok tsē oo-oo ê Thài-iông oo-tsú. I khì hōo pio tsò AR 3664, tsuè-kīn tsit kuí nî lâi lú piàn jú tuā khu, tsit-má í-king sī siōng-tuā khu–ah, jî-tshiánn ín-khí liân-suà po̍k-tsà, tsō-sîng tāi-liōng ko-lîng lia̍p-tsú khì lóng Tē-kiû, hîng-sîng bí-lē ê ki̍k-kng. Jî-tshiánn khó-lîng ē kè-sio̍k lo̍h-khì. Tō-sǹg tshiūnn AR 3664 tsit-khuán Thài-iông Ua̍h-thiàu-khu tsiok huî-hiám–ê, tsit khu ê Ji̍t-bián Bu̍t-tsit Phùn-siā (CME) iáu-buē tuì Tē-kiû kuí-tō uī-tshinn ia̍h-sī Tē-kiû piáu-bīn tiān-li̍k bāng-lōo tsō-sîng giâm-tiōng ê siong-hāi. Siòng-phìnn lāi-té sī kuí-nā kang tsîng tī I-tá-lī Lô-má Civitavecchia ji̍t-lo̍h ê sî-tsūn hip-tio̍h ê tuā khu Thài-iông Ua̍h-thiàu-khu. Ha̍p-sîng iánn-siōng pau-kuat té sî-kan kám-kng ê Thài-iông piáu-bīn, kah bôo-gí si̍t-tsè-siōng khuànn–ē-tio̍h ê kíng-sik. Siāng-lo̍h-bué, AR 3664 tsit-má tī Thài-iông piáu-bīn sī jú se̍h jú lī-khui Tē-kiû, jî-tshiánn tsit khu khó-lîng ē ua̍h kàu i koh se̍h tńg-lâi.

[English] AR 3664 on a Setting Sun

It was larger than the Earth. It was so big you could actually see it on the Sun’s surface without magnification. It contained powerful and tangled magnetic fields as well as numerous dark sunspots. Labelled AR 3664, it developed into one of the most energetic areas seen on the Sun in recent years, unleashing a series of explosions that led to a surge of energetic particles striking the Earth, which created beautiful auroras. And might continue. Although active regions on the Sun like AR 3664 can be quite dangerous, this region’s Coronal Mass Ejections have not done, as yet, much damage to Earth-orbiting satellites or Earth-surface electrical grids. Pictured, the enormous active region was captured on the setting Sun a few days ago from Civitavecchia, Rome, Italy. The composite image includes a very short exposure taken of just the Sun’s surface, but mimics what was actually visible. Finally, AR 3664 is now rotating away from the Earth, although the region may survive long enough to come around again.

詞彙學習（漢羅/POJ/KIP/華語/English）

• 【太陽烏子】Thài-iông o͘-chú/Thài-iông oo-tsú/太陽黑子/sunspot
• 【極光】ke̍k-kng/ki̍k-kng/極光/auroras
• 【太陽活跳區】Thài-iông Oa̍h-thiàu-khu/Thài-iông Ua̍h-thiàu-khu/太陽活躍區/active region
• 【AR 3664】AR sam-lio̍k-lio̍k-sù/AR sam-lio̍k-lio̍k-sù/AR 3664/Active Region 3664
• 【磁場】chû-tiûⁿ/tsû-tiûnn/磁場/magnetic field
• 【日冕物質噴射】Ji̍t-bián Bu̍t-chit Phùn-siā/Ji̍t-bián Bu̍t-tsit Phùn-siā/日冕物質拋射/coronal mass ejection (CME)
• 【極光】ke̍k-kng/ki̍k-kng/極光/auroras