太陽活跳區 AR 3664：一大陣太陽烏子

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：AR 3664: Giant Sunspot Group
• 影像來源 kah 版權：Franco Fantasia & Guiseppe Conzo (Gruppo Astrofili Palidoro)
• 相簿：Active Region 3664 on the Sun and Associated Aurora
• 台文翻譯：An-Li Tsai (NSYSU)

[漢羅] 太陽活跳區 AR 3664：一大陣太陽烏子

目前有一區近代上大陣 ê 太陽烏子群，當咧行過太陽表面。 In 是 太陽活跳區 AR 3664，毋但面積大，而且活動力足強–ê，會向 太陽系 擲出粒子雲。 其中，日冕物質噴射 (CME) 有一部份已經影響著地球，賰 ê 部份嘛隨欲來矣。 Tī 極端環境下底，這寡太陽風暴 可能會造成一寡 地球軌道衛星發生故障、地球大氣層 小可仔變形、kah 電力網路無穩定。 In 挵著 地球頂層大氣 ê 時陣，粒子會產生美麗 ê 極光，其中有一寡極光已經出現 tī 比平常時閣較倚南方 ê 地點。 相片內底 ê 太陽活跳區 AR3664 kah 烏色 ê 太陽烏子，是昨昏 tī 意大利 羅馬 翕–ê 可見光影像。 AR3664 ê 太陽烏子群足大–ê，你會當提頂個月 看 日全食 用 ê 日食目鏡來看，就看會著。 這禮拜拜六禮拜，天文愛好者 會 tī 全球無仝所在 ê 暗暝天頂，斟酌揣這寡 光爍爍 閣 特別 ê 極光。

[POJ] Thài-iông Oa̍h-thiàu-khu AR 3664: Chi̍t-tōa-tīn Thài-iông O͘-chú

Bo̍k-chiân ū chi̍t khu kīn-tāi siōng tōa-tīn ê thài-iông o͘-chú-kûn, tng-leh kiâⁿ-kòe Thài-iông piáu-bīn. In sī Thài-iông Oa̍h-thiàu-khu AR 3664, m̄-nā bīn-chek tōa, jî-chhiáⁿ oa̍h-tōng-le̍k chiok kiông–ê, ē hiòng Thài-iông-hē tàn chhut lia̍p-chú-hûn. Kî-tiong, Ji̍t-bián Bu̍t-chit Phùn-siā (CME) ū chi̍t-pō͘-hūn í-keng éng-hióng tio̍h Tē-kiû, chhun ê pō͘-hūn mā sûi beh lâi–ah. Tī ke̍k-toan khoân-kéng ē-té, chit kóa thài-iông hong-pō khó-lêng ē chō-sêng chi̍t-kóa Tē-kiû Kúi-tō Ūi-chheⁿ hoat-seng kò͘-chiong, Tē-kiû tāi-khì-chân sió-khóa-á piàn-hêng, kah tiān-le̍k bāng-lō͘ bô ún-tēng. In lòng-tio̍h Tē-kiû téng-chân tāi-khì ê sî-chūn, lia̍p-chú ē sán-seng bí-lē ê ke̍k-kng, kî-tiong ū chi̍t-kóa ke̍k-kng í-keng chhut-hiān tī pí pêng-siông-sî koh-khah óa lâm-hong ê tē-tiám. Siòng-phìⁿ lāi-té ê Thài-iông Oa̍h-thiàu-khu AR3664 kah o͘-sek ê thài-iông o͘-chú, sī cha-hng tī I-tá-lī Lô-má hip–ê khó-kiàn-kng iáⁿ-siōng. AR3664 ê thài-iông o͘-chú-kûn chiok tōa–ê, lí ē-tàng the̍h téng kò goe̍h khòaⁿ ji̍t-choân-si̍t iōng–ê ji̍t-si̍t ba̍k-kiàⁿ lâi-khòaⁿ, to̍h khòaⁿ-ē-tio̍h. Chit lé-pài pài-la̍k-lé-pài, thian-bûn ài-hó-chiá ē tī choân-kiû bô-kâng só͘-chāi ê àm-mê thiⁿ-téng, chim-chiok chhōe chit kóa kng-sih-sih koh te̍k-pa̍t ê ke̍k-kng.

[KIP] Thài-iông Ua̍h-thiàu-khu AR 3664: Tsi̍t-tuā-tīn Thài-iông Oo-tsú

Bo̍k-tsiân ū tsi̍t khu kīn-tāi siōng tuā-tīn ê thài-iông oo-tsú-kûn, tng-leh kiânn-kuè Thài-iông piáu-bīn. In sī Thài-iông Ua̍h-thiàu-khu AR 3664, m̄-nā bīn-tsik tuā, jî-tshiánn ua̍h-tōng-li̍k tsiok kiông–ê, ē hiòng Thài-iông-hē tàn tshut lia̍p-tsú-hûn. Kî-tiong, Ji̍t-bián Bu̍t-tsit Phùn-siā (CME) ū tsi̍t-pōo-hūn í-king íng-hióng tio̍h Tē-kiû, tshun ê pōo-hūn mā suî beh lâi–ah. Tī ki̍k-tuan khuân-kíng ē-té, tsit kuá thài-iông hong-pō khó-lîng ē tsō-sîng tsi̍t-kuá Tē-kiû Kuí-tō Uī-tshenn huat-sing kòo-tsiong, Tē-kiû tāi-khì-tsân sió-khuá-á piàn-hîng, kah tiān-li̍k bāng-lōo bô ún-tīng. In lòng-tio̍h Tē-kiû tíng-tsân tāi-khì ê sî-tsūn, lia̍p-tsú ē sán-sing bí-lē ê ki̍k-kng, kî-tiong ū tsi̍t-kuá ki̍k-kng í-king tshut-hiān tī pí pîng-siông-sî koh-khah uá lâm-hong ê tē-tiám. Siòng-phìnn lāi-té ê Thài-iông Ua̍h-thiàu-khu AR3664 kah oo-sik ê thài-iông oo-tsú, sī tsa-hng tī I-tá-lī Lô-má hip–ê khó-kiàn-kng iánn-siōng. AR3664 ê thài-iông oo-tsú-kûn tsiok tuā–ê, lí ē-tàng the̍h tíng kò gue̍h khuànn ji̍t-tsuân-si̍t iōng–ê ji̍t-si̍t ba̍k-kiànn lâi-khuànn, to̍h khuànn-ē-tio̍h. Tsit lé-pài pài-la̍k-lé-pài, thian-bûn ài-hó-tsiá ē tī tsuân-kiû bô-kâng sóo-tsāi ê àm-mê thinn-tíng, tsim-tsiok tshuē tsit kuá kng-sih-sih koh ti̍k-pa̍t ê ki̍k-kng.

[English] AR 3664: Giant Sunspot Group

Right now, one of the largest sunspot groups in recent history is crossing the Sun. Active Region 3664 is not only big – it’s violent, throwing off clouds of particles into the Solar System. Some of these CMEs are already impacting the Earth, and others might follow. At the extreme, these solar storms could cause some Earth-orbiting satellites to malfunction, the Earth’s atmosphere to slightly distort, and electrical power grids to surge. When impacting Earth’s upper atmosphere, these particles can produce beautiful auroras, with some auroras already being reported unusually far south. Pictured here, AR3664 and its dark sunspots were captured yesterday in visible light from Rome, Italy. The AR3664 sunspot group is so large that it is visible just with glasses designed to view last month’s total solar eclipse. This weekend, skygazing enthusiasts will be keenly watching the night skies all over the globe for bright and unusual auroras.

詞彙學習（漢羅/POJ/KIP/華語/English）

• 【太陽活跳區 AR 3664】Thài-iông Oa̍h-thiàu-khu AR sam-lio̍k-lio̍k-sù/Thài-iông oo-tsú-kûn/太陽活躍區 AR 3664/Active Region 3664
• 【太陽烏子群】Thài-iông o͘-chú-kûn/Thài-iông oo-tsú-kûn/太陽黑子群/sunspot group
• 【日冕物質噴射】Ji̍t-bián Bu̍t-chit Phùn-siā/Ji̍t-bián Bu̍t-tsit Phùn-siā/日冕物質拋射/CME (Coronal Mass Ejection)
• 【太陽風暴】thài-iông hong-pō/thài-iông hong-pō/太陽風暴/solar storm
• 【地球軌道衛星】Tē-kiû kúi-tō ūi-chheⁿ/Tē-kiû kuí-tō uī-tshenn/地球軌道衛星/Earth-orbiting satellites
• 【大氣層】tāi-khì-chân/tāi-khì-tsân/大氣層/atmosphere
• 【極光】ke̍k-kng/ki̍k-kng/極光/aurora
• 【日全食】ji̍t-choân-si̍t/ji̍t-chuân-si̍t/日全食/total solar eclipse
• 【日食目鏡】ji̍t-si̍t ba̍k-kiàⁿ/ji̍t-si̍t ba̍k-kiànn/日食目鏡/solar eclipse glasses